Masengo 10:1-48
-
Yaŵayiweni Koneliyo m’mesomkulola (1-8)
-
Petulo akuyiwona yinyama yeswejele m’mesomkulola (9-16)
-
Petulo akwawula kwa Koneliyo (17-33)
-
Petulo akulalichila ngani syambone pakwamba ŵandu ŵamitunduj ine (34-43)
-
“Mlungu jwangali lusagu” (34, 35)
-
-
Ŵandu ŵamitundu jine akupochela msimu weswela soni kubatisidwa (44-48)
10 Sambano ku Kaisaleya kwapali mundu jwine lina lyakwe Koneliyo. Jwalakwe jwaliji jwakulongolela kagulu ka asilikali kakolanjidwa kuti Italiya.
2 Koneliyo jwamkulupililaga Mlungu soni jwaliji jwakogopa Mlungu yimpepe ni ŵamwiŵasa mwakwe wosope. Nambosoni jwatendelaga yambone ŵandu ŵakulaga soni jwaliji mkupopela kwa Mlungu ndaŵi syosope.
3 Lisiku line cha mma 3 koloko* ligulo, Koneliyo ŵaliweni lilayika lya Mlungu mesomkulola lili mkwika kwa jwalakwejo ni kuŵecheta kuti, “Koneliyo!”
4 Pelepo Koneliyo ŵalilolechesye lilayikalyo uli umkamwile woga, kaneko ŵajanjile kuti, “Aŵechete Ambuje ngupikana!” Lilayikalyo lyatite, “Mlungu apikene mapopelo genu soni ayiweni yindu yambone yamkusimwatendela ŵandu ŵakulaga ni akuyikumbuchila.
5 Sambano mwatumisye ŵandu ku msinda wa Yopa kuti akamŵilanje mundu jwine lina lyakwe Simoni jwakusakolanjidwasoni kuti Petulo.
6 Mundu jweleju ali mlendo kunyumba ja Simoni, jwakupalapata mapende jwele nyumba jakwe jili mungulugulu nyasa.”
7 Lilayika lyalyaŵechetaga ni jwalakwejo palyagambile kutyoka, ndaŵi jijojo Koneliyo ŵaŵilasile ŵamasengo ŵakwe ŵaŵili ni msilikali. Msilikalijo jwaliji jwakogopa Mlungu soni jwaliji jumo mwa ŵandu ŵaŵamtumichilaga jwalakwejo.
8 Myoyo Koneliyo ŵasalile jemanjajo chilichose kaneko ŵatumisye ku Yopa.
9 Kundaŵi kwakwe, jemanjaji paŵapitilisyaga ulendo wawo soni paŵaŵandichilaga msindawo, Petulo ŵakwesile penani panyumba* cha mma 12 koloko* musi kuti akapopele.
10 Kaneko jamkwete sala ni ŵasakaga kulya. Sambano chakulya pachaliji mkutelechedwa,
11 jwalakwe ŵakuweni kwinani kuli kuwugwiche soni chindu chakuwoneka mpela chinguwo chekulungwa chili chikamulidwe m’makona mcheche ni kuchituluchisyaga pachilambo chapasi.
12 Pachinguwopo papali mitundu josope ja yinyama ya pachilambo chapasi. Papali yinyama ya ngongolo mcheche nambosoni majoka ni achipulundwe. Papalisoni yijuni yamwinani.
13 Kaneko ŵapikene maloŵe gakumsalila kuti, “Petulo, mnyakuche, msikite chinyama chimo ni mlye!”
14 Nambo Petulo ŵajanjile kuti, “Iyayi Ambuje, ligongo une nganindyeje chilichose changaswejela mwakamulana ni chilamusi.”
15 Myoyo ŵapikenesoni ali mkumsalila kuti, “Yindu yayiswejesye Mlungu mleche kuyisala kuti yili yangaswejela.”
16 Maloŵego gapikanichesoni katatu, soni ndaŵi jijojo chinguwo chila chajigalidwe kwawula kwinani.
17 Petulo paŵaliji mkusimonga kuti yindu yeleyi yikugopolela chichi, ndaŵi jijojo ŵandu ŵakutyochela kwa Koneliyo ŵayiche kunyumba ja Simoni ni ŵajimi pamlango.
18 Jemanjajo ŵapoposisye ni ŵawusisye naga kweleko kwana mlendo lina lyakwe Simoni jwakolanjidwasoni kuti Petulo.
19 Sambano Petulo paŵaliji mkuganichisya yindu yaŵayiweni yila, msimu weswela wamsalile kuti, “Mpikane! Kuyiche ŵandu ŵatatu ŵakumsaka mmwejo.
20 Myoyo mnyakuche, ni mtuluche mjawule yimpepe ni jemanjajo. Mkakayichila ata panandi, ligongo une ni junatumisye jemanjajo.”
21 Pelepo Petulo ŵatulwiche ni kwawula kuŵaliji ŵanduwo, kaneko ŵatite, “Mundu jwakumsakajotu ni une. Ana ayichile chichi?”
22 Jemanjajo ŵajanjile kuti, “Koneliyo jwali jwamkulungwa jwa asilikali atutumile m’weji. Jwalakwejo ali mundu jwakulupichika soni jwakogopa Mlungu mwamti mtundu wosope wa Ayuda ukusaŵecheta yambone ya jwalakwejo. Mlungu ŵatumisye lilayika kwa jwalakwejo kukumsalila kuti ŵaŵilanjile wawojo kunyumba jakwe ni chakulinga chakuti akapikane yachakaŵechete wawojo.”
23 Myoyo Petulo ŵasalile jemanjajo kuti ajinjile soni ŵatemi nawo mpela achalendo ŵakwe.
Kundaŵi kwakwe ŵanyakwiche ni kwawula yimpepe ni jemanjajo, soni ŵakulupilila ŵane ŵa ku Yopa ŵapite nawo yimpepe.
24 Lisiku linelyo ŵayiche ku Kaisaleya. Pandaŵiji Koneliyo ŵaliji ali mkwajembecheya jemanjajo soni ŵaŵilasile achalongo achimjakwe nambosoni achimjakwe ŵapamtima.
25 Petulo paŵayiche, Koneliyo ŵamchingamile, kaneko ŵamtindiŵalile soni ŵajineme mpaka ngope jakwe pasi.
26 Nambo Petulo ŵamkamwile jwalakwejo ni kumsalila kuti, “Mjimuche, unesoni ndili mundu mpela mmwejo.”
27 Paŵaliji mkuŵechetana, ŵajinjile m’nyumba ni ŵasimene ŵandu ŵajinji ali asongangene mwelemo.
28 Pelepo Petulo ŵasalile jemanjajo kuti, “Jemanja mkumanyilila chenene kuti malamusi ga Ayuda gangakunda kuti Myuda akamulaneje kapena kwawula kwa mundu jwamtundu wine. Nambo Mlungu amanyisye une kuti ngamkolangaga mundu jwalijose kuti ali jwangaswejela.
29 Ni ligongo lyakwe mbiche akuno mwangakayichila pamwatumisye ŵandu kukumbilanga. Myoyo ngusaka manyilile chamumbilanjile.”
30 Kaneko Koneliyo ŵaŵechete kuti, “Pagambile kupita masiku mcheche kutyochela panapopelaga m’nyumba mwangu pandaŵi ja 3 koloko* ligulo. Kaneko mundu juŵawete yakuwala yakunyesimila ŵajimi pasogolo pangu,
31 ni kuŵecheta kuti, ‘Koneliyo, lipopelo lyenu lipikaniche soni Mlungu akuyikumbuchila yindu yambone yamkusimwatendela ŵandu ŵakulaga.
32 Sambano mwatumisye ŵandu ku Yopa kuti akamŵilanje Simoni jwakusakolanjidwasoni kuti Petulo. Mundu jweleju ali mlendo kunyumba ja Simoni, jwakupalapata mapende jwakusatama mungulugulu nyasa.’
33 Ni ligongo lyakwe natumisye mwachitema ŵanduŵa kuti akaŵilanje wawojo soni atesile chenene kwika akuno. Myoyo m’weji tusongene pameso pa Mlungu kuti tupikane yindu yosope yaŵatumile Yehofa kuti atusalile.”
34 Pelepo Petulo ŵatandite kuŵecheta kuti, “Sambano manyilile nditu kuti Mlungu jwangali lusagu.
35 Nambo akusampochela mundu jwakutyochela mu mtundu uliwose jwele akusamjogopa jwalakwejo soni kutenda yakuŵajilwa.
36 Mlungu ŵapeleche maloŵe kwa ŵanache ŵa Yisalayeli. Maloŵe gakwe galiji ngani syambone sya mtendele wawukusayika kupitila mwa Yesu Klistu. Jwalakweju ali Ambuje ŵa ŵandu wosope.
37 Jemanja mkumanyilila ngani jele ŵandu ŵaŵechetaga mu Yudeya mosope. Ŵandu ŵatandite kuŵecheta nganiji ku Galileya panyuma pakuti Yohane alalichile ya ubatiso.
38 Ngani jakwe jaliji jakwamba Yesu jwa ku Nasaleti kuti Mlungu ŵamsagwile ni msimu weswela soni ŵampele machili. Jwalakwe ŵajendaga ni kwatendelaga ŵandu yambone soni kwaposya* wosope ŵaŵalagasidwaga ni Satana, ligongo Mlungu ŵaliji ni jwalakwejo.
39 Soni m’weji tuli mboni sya yindu yosope yaŵatesile jwalakwejo m’chilambo cha Ayuda soni ku Yelusalemu. Nambo jemanjajo ŵamwuleje mwakumkomela* pachitela.
40 Mlungu ŵamjimwisye jwalakwejo pa lisiku lyatatu soni ŵamkundile kuti awonechele kwa ŵandu,
41 ngaŵatu kwa ŵandu wosope, nambo kwa mboni syele Mlungu ŵasisagwile chile. Mbonisyo tuli m’weji ŵele twalile soni kumwa najo yimpepe paŵajimwiche ku chiwa.
42 Nambosoni jwalakwe ŵatulamwile kuti tulalichileje kwa ŵandu soni kutendela umboni mwakwanila kuti Mlungu ŵamsagwile jwalakwejo kuŵa jwakulamula ŵandu ŵaumi soni ŵawe.
43 Ŵakulochesya wosope ŵatendele umboni yakwamba Yesujo. Ŵaŵechete kuti kupitila mu lina lyakwe, jwalijose jwakusamkulupilila jwalakwejo, Mlungu chachimkululuchila yakulemwa yakwe.”
44 Sambano Petulo ali mkati mwakuŵecheta yindu yeleyi, msimu weswela wayiche pa ŵandu wosope ŵaŵapikanilaga maloŵego.
45 Pelepo ŵakulupilila ŵaŵaliji ŵawumbale ŵele ŵaŵayiche ni Petulo ŵasimonjile, ligongo mtuka ŵalulele wa msimu weswela waliji mkupelechedwasoni kwa ŵandu ŵa mitundu jine.
46 Pakuŵa ŵapikene jemanjajo ali mkuŵecheta yiŵecheto yachilendo soni ali mkumchimbichisya Mlungu. Kaneko Petulo ŵaŵechete kuti,
47 “Ŵanduŵatu apochele msimu weswela mpela m’weji, ana pana mundu jwampaka aŵechete kuti jemanjaji ngakusosekwa kubatisidwa?”
48 Pelepo jwalakwe ŵalamwile jemanjajo kuti abatisidwe mu lina lya Yesu Klistu. Kaneko jemanjajo ŵamŵendile jwalakwe kuti atame najo kwa masiku nditu.
Maloŵe Gamwiŵanda
^ Maloŵe gakwe gandanda, “awala ja 9.”
^ Pandaŵijo nyumba syejinji penani pakwe paŵaga pafulati pele ŵandu ŵatendelaga yindu yakulekanganalekangana.
^ Maloŵe gakwe gandanda, “awala ja 6.”
^ Maloŵe gakwe gandanda, “awala ja 9.”
^ Kapena kuti, “kwalamisya.”
^ Maloŵe gakwe gandanda, “mwakumkoleka.”