Masengo 22:1-30
22 “Achalongo achimjangu soni mwanja baba, alinde nasalile muyaŵelele.”
2 Sambano ŵanduwo paŵampikene jwalakwejo ali mkuŵecheta m’chiŵecheto chawo cha Chihebeli, ŵatemi jii kupunda pandanda pala. Kaneko jwalakwe ŵatite,
3 “Une ndili Myuda soni napagwile mu msinda wa Taliso ku Kilikiya. Nambo nalijiganyisye mumsinda awuno, mwamti Gamaliyele ni juŵanjiganyisye. Ŵanjiganyisye kuti nguyeje mnope chilichose chachili mu Chilamusi cha Mose, nambosoni une mbele ndili mkutumichila Mlungu mwakulipeleka mpela mwakutendela jemanja apano.
4 Naliji mkwalagasya mnope achalume ni achakongwe ŵaŵakuyaga Litala lya Ambujeli. Nataŵaga ni kwapeleka ku nyumba ja ukayidi soni ŵane nawulagaga,
5 mwamti jwamkulungwa jwa ŵakutaga mbopesi soni gulu josope ja achakulungwa mpaka andendele umboni ya yeleyi. Najigelesoni yikalata kwa jemanjaji yakunjitichisya kuti njawule kwa achakulungwakulungwa ŵachiyuda ku Damasiko. Kaneko nawutandite ulendo kuti ngataŵe ŵakutama kweleko ni kwika nawo ku Yelusalemu kuno kuti apochele chilango.*
6 “Nambo musi, ndili mkati mwa ulendowu soni panaliji mkuŵandichila ku Damasiko, nagambile kukuwona kuŵala kwakutyochela kwinani kuli kusyungulile panaliji une.
7 Ndaŵi jijojo nagwile pasi kaneko napikene maloŵe gakuti, ‘Saulo, Saulo, ligongo chichi mkundagasya une?’
8 Une najanjile kuti, ‘Ambuje, ana wawojo ŵani?’ Pelepo ŵanjanjile kuti, ‘Une ndili Yesu jwa ku Nasaleti jwele mmwejo mkumlagasya.’
9 Achalume ŵanaliji nawo ŵakuweni kuŵalako, nambo nganapikana maloŵe ga mundu juŵaŵechetaga ni unejo.
10 Pelepo une natite, ‘Ambuje, sambano ndende uli?’ Ambujewo ŵanjanjile kuti, ‘Mjimuche ni mjinjile mu msinda wa Damasiko. Mwelemo mundu jwine chakamsalile yachimsosekwe kutenda.’
11 Nambo pandaŵiji nganingombolaga kulola chilichose ligongo lya machili ga kuŵala kula. Myoyo achalume ŵanaliji nawo ŵala ŵangamwile mkono ni kunjinjisya mu msinda wa Damasiko.
12 “Sambano kweleko kwaliji mundu jwine lina lyakwe Ananiya. Mundu jweleju jwakuyaga Chilamusi mwakulupichika, soni jwakwete mbili jambone pasikati pa Ayuda wosope ŵaŵatamaga kweleko.
13 Jwalakwe ŵayiche panaliji une, ni kusalila kuti, ‘Mlongo mjangu Saulo, mtandilesoni kulola.’ Ndaŵi jijojo natandite kulola soni nam’weni jwalakwejo.
14 Jwalakwe ŵatite, ‘Mlungu jwa achinangolo ŵetu amsagwile mmwejo kuti mmanyilile chakulinga chakwe. Amsagwilesoni kuti mumwone jwakulungamajo soni kuti mpikane maloŵe gakwe.
15 Ligongo mmwejo chimŵe mboni ja Yesu pakwalalichila ŵandu wosope ya yindu yamyiweni soni kuyipikana.
16 Nambi sambano mkwembecheya chichi? Mjimuche ni m’batisidwe, soni mŵilanjile mu lina lya Yesu kuti mkululuchidwe yakulemwa.’
17 “Sambano panawujile ku Yelusalemu napite ku nyumba ja Mlungu ni kutanda kupopela. Ndili mkati mwakupopela, Mlungu ŵandosisye
18 Ambuje. Ambujewo ŵasalile kuti, ‘Mnyakuche mwachitema soni mkopoche mu Yelusalemu muno, ligongo ŵandu ŵa mumsinda awuno ngasapikanila yakulalichila yenu yakwamba une.’
19 Nambo une natite, ‘Ambuje, jemanjajitu akumanyilila chenene kuti une najinjilaga mu sunagoge jilijose, ni kwataŵaga soni kwaputaga ŵandu ŵakwakulupilila wawojo.
20 Atamosesoni paŵaliji mkumwulaga Sitefano, juŵatendelaga umboni ya wawojo, une naliji papopo. Une najitichisye yeleyi soni naliji mkulolela yakuwala ya ŵandu ŵaŵamwulagagawo.’
21 Nambo Ambujewo ŵanjanjile kuti, ‘Mmwejo mnyakuche, ligongo chinamtumisye kwa ŵandu ŵamitundu jine ŵakutama kwakutalika.’”
22 Sambano ŵandu ŵala ŵaliji mkumpikanilape jwalakwejo mpaka paŵaŵechete yindu yeleyi. Kaneko jemanjajo ŵatandite kugumila kuti, “Ngatukusaka kumwonasoni mundu jwelejo pachilambopa, akaŵasoni ni umi jwelejo!”
23 Jemanjajo ŵagumisile mnope, soni ŵaliji mkuponya yakuwala yawo nambosoni ŵaponyaga luwundu mwinani.
24 Ligongo lya yeleyi, jwamkulungwa jwa asilikali jwalamwile kuti Paulo ajinjile najo mwakusatama asilikali ni amkwapule mpaka ali asasile yiŵatesile. Jwamkulungwa jwa asilikalijo jwalamwile yeleyi ni chakulinga chakuti apikanichisye chenene ligongo lyakwe ŵanduwo ŵagumilaga kuti Paulo awulajidwe.
25 Nambo paŵamtaŵile kuti atandeje kumkwapula, Paulo ŵamwusisye jwakulolela asilikali juŵaliji pelepo kuti, “Ana malamusi gakusamkunda jemanja kumkwapula mundu jwa ku Loma mkanamjimbe magambo?”
26 Jwakulolela asilikalijo paŵapikene yeleyi, ŵapite kwa jwamkulungwa jwa asilikali ni kumsalila kuti, “Ana chatende uli sambano? Mundujutu ali jwa ku Loma.”
27 Myoyo jwamkulungwa jwa asilikalijo ŵapite kwa Paulo ni kumwusya kuti, “Musalile, ana mmweji mli jwa ku Loma?” Jwalakwejo ŵajanjile kuti, “Elo.”
28 Kaneko jwamkulungwa jwa asilikalijo ŵatite, “Une napeleche mbiya syejinji kuti mbate ufulu wakuti ku Loma kuŵe kumangwetu.” Paulo ŵajanjile kuti, “Nambo une natesile kupagwa nawo.”
29 Ndaŵi jijojo, asilikali ŵaŵasakaga kuti amputeje ni kumwusyaga yiwusyo ŵala ŵamlesile ni kutyoka. Nombenajo jwamkulungwa jwa asilikali jula ŵatesile woga mnope paŵamanyilile kuti Paulo ali jwa ku Loma soni kuti ŵamtaŵile ni maunyolo.
30 Kundaŵi kwakwe, jwamkulungwa jwa asilikali jula ŵasakaga kumanyilila ligongo lyakwe Ayuda ŵamjimbaga magambo Paulo. Myoyo jwalakwe ŵamgopwele Paulo maunyolo gala soni ŵasongangenye ŵakulolela ŵakutaga mbopesi pampepe ni Luŵala Lwekulungwa lwa Ayuda. Kaneko ŵamjigele Paulo ni kumjawusya kuŵasongene ŵandu kula ni kumjimika pasikati pawo.
Maloŵe Gamwiŵanda
^ Ŵane akusati “chamuko.”