Masengo 27:1-44
27 Sambano ŵalinganyisye yakuti tujende panyasa kwawula ku Italiya. Myoyo ŵampeleche Paulo mmyala mwa jwakulolela asilikali jwine lina lyakwe Juliyasi. Jwalakweju jwalolelaga gulu ja asilikali ja Augusito.
2 Kaneko twajisimene sitima jakutyochela ku Adilamitiyo. Sitimaji jasigele panandi kunyakuka kwawula ku yiko* yakulekanganalekangana ya mungulugulu nyasa m’chigawo* cha Asiya. Myoyo twakwesile sitimaji ni kuwutanda ulendo. Paulendowu twalijisoni ni Alisitako jwakutyochela ku Tesalonika m’chigawo cha Makedoniya.
3 Kundaŵi kwakwe twayiche ku Sidoni. Kweleko kwaliji achimjakwe ŵa Juliyasi. Myoyo jwalakwe ŵatesile yindu mwakumganichisya Paulo mwamti ŵamkundile kuti ajawule kwa achimjakwewo kuti akamsamalile.
4 Patwanyakwiche kweleko, twajesile mwakusyungulila chilumba cha Kupulo ni chakulinga chakuti chilumbacho chituchinjile ku mbungo syatwalimbanaga nasyo.
5 Kaneko twajesile mumbali mwa Kilikiya soni Pamfuliya mpaka twayiche pa chiko cha Mula ku Lukiya.
6 Kweleko jwakulolela asilikali jula ŵajisimene sitima jakutyochela ku Alekisandiliya jajajawulaga ku Italiya, ni ŵatusalile kuti tukwele sitima jelejo.
7 Kaneko twajesile mwapanandipanandi soni mwakulajilila kwa masiku gejinji mpaka twayiche ku Kinido. Ligongo lyakuti mbungo jatulepelekasyaga kuti tujawulejepe kusogolo, twapitile ku Salimone mumbali mwa chilumba cha Kelete ni chakulinga chakuti chilumbachi chituchinjile ku mbungojo.
8 Patwajesile mwakulajilila mumbali mwa chilumbachi, twayiche pamalo gane lina lyakwe Chiko Chambone. Malo gelega galiji mwakuŵandikana ni msinda wa Laseya.
9 Sambano gali gamasile masiku gejinji, jayiche ndaŵi jakuti tunyakuche. Nambope ndaŵiji jaliji jakogoya kwenda panyasa, ligongo atamose ndaŵi jakulijima kulya pa Lisiku lya Mwambo Wakusimasya Ulemwa jaliji jili jimasile kala. Myoyo Paulo ŵasalile
10 ŵanduwo kuti, “Achakulungwa, nguyiwona kuti mpaka yiŵe chenene tuli tutemi panopano. Ligongo naga tukunyakuka, mpaka tujonanje katundu soni sitimaji, nambosoni mpaka tujase umi wetu.”
11 Atamose kuti Paulo jwaŵechete yeleyi, jwakulolela asilikali jula ŵapikanile yaŵasasile jwakwendesya sitima soni msyene sitimajo mmalo mwakupikanila maloŵe ga Paulo.
12 Ligongo lyakuti pachikopo nganipaŵa pambone kutama mundaŵi jakusisima, ŵandu ŵajinji ŵalimbichile yakuti tunyakuche. Jemanjaji ŵasakaga kulola naga mpaka yikomboleche kuja kwika ku chiko cha Finikesi kuti mundaŵi jakusisimajo tukatame kweleko. Chikochi chaliji pa chilumba cha Kelete, mwamti mbali jine ja chikochi jalolite kumpoto cha kungopokolyuŵa soni jine kummwela cha kungopokolyuŵa.
13 Sambano mbungo jamwela pajaputaga mwapanandipanandi, ŵanduwo ŵaganisyaga kuti yaŵasakaga yila chiyikomboleche. Myoyo ŵachuwile nangula* m’mesi ni kutanda kwenda mumbali mwa chilumba cha Kelete.
14 Nambo mkanijimale ndaŵi jelewu, chimbungo chamachili mnope lina lyakwe Yuloakwilo* chatyochele pachilumbachi ni kuputa panyasapo.
15 Pelepo chimbungocho chaputile mnope pa sitima jetu mwamti yaliji yakusawusya kuti tujawulejepe kusogolo. Myoyo ŵalesile kongolela sitimajo ni twajigalidwe ni mbungojo.
16 Kaneko twayiche mumbali mwa kachilumba kamwana lina lyakwe Kauda. Kachilumbaka katuchinjile panandi ku chimbungochi. Nambope twalepelaga kongolela kaboti kamwana kele kawutidwaga ni sitimaji munyuma.
17 Nambo kaneko ŵakanyakwile ni kukakwesya mu sitimaji. Sambano pakogopela kuti sitimajo mpaka jikasiche, ŵakamula masengo mu sitimajo ŵajigele ngonji ni kujitaŵa sitimajo mwakusyenganya. Nambosoni pakogopela kuti mpaka tukatitimile pamalo gamchenga wejinji m’nyasamo gakolanjidwa kuti Suliti, jemanjajo ŵagopwele ngonji ni yiguwo yakwendechesya sitimajo kuti tugambeje kututidwa ni mbungo.
18 Kundaŵi kwakwe, ŵandu ŵatandite kwasa katundu kuti sitimajo jikasitopelwa ligongo chimbungocho chaputaga mnope sitimajo.
19 Soni pa lisiku lyatatu, ŵajasilesoni yida yine ya mu sitimajo.
20 Twatemi masiku gejinji ngaliwona lyuŵa kapena ndondwa nambosoni chimbungo chamachili chila chaliji mkulimbanape ni m’weji. Myoyo twatandite kukayichila naga chituŵesoni ni umi.
21 Ŵanduwo paŵatemi masiku gejinji ngalya chilichose, Paulo ŵajimi pasikati pawo ni kuŵecheta kuti, “Achakulungwa, yikaŵe kuti ŵapikanile maloŵe gangu gakuti tukatyoka ku Kelete kula yikaliji chenene soni ngamkanitujonanga yindu mpela mwayiŵelelemu.
22 Nambope ngwasalila kuti akadandawula ligongo pangali mundu atamose jumo jwachawe, nambo sitima peji chijikasiche.
23 Chilo chipitechi lilayika lya Mlungu jwangu jwangusamtumichila soni kumtindiŵalila lyajimi pambali pangu
24 ni kusalila une kuti, ‘Mmwe Paulo, mkatenda woga. Mmwejo chimkajime nditu pameso pa Kaisala. Soni ligongo lya mmwejo, Mlungu chiŵakulupusye ŵandu wosope ŵamli nawoŵa.’
25 Myoyo alimbe mtima, ligongo une ngukulupilila nditu kuti Mlungu chatende yindu mwakamulana ni maloŵe gambikene kutyochela kwa lilayika gala.
26 Nambope, sitimaji chijikasiche pachituŵandichile chilumba chinechakwe.”
27 Sambano patwamasile masiku 14, musi ni chilo, tuli mkulagasidwa ni mbungo pa Nyasa ja Adiliya, sikati ja chilo, ŵakukamula masengo mu sitimajo ŵatandite kuganisya kuti tukuŵandichila kumkuli.
28 Myoyo ŵalinjile kusokoka kwa pamalo patwajendelagapo mwamti ŵapatile kuti paliji chiŵandika mamita 36. Kaneko patwajesile kalutando panandi, ŵalinjilesoni kusokoka kwakwe mwamti ŵapatile kuti paliji chiŵandika mamita 27.
29 Sambano pakogopela kuti mpaka tugunde maganga, jemanjajo ŵaponyisye m’mesi manangula mcheche kutyochela kunyuma kwa sitimajo soni ŵaliji mkusachilila mnope kuti kuche mwachitema.
30 Kaneko ŵakamula masengo mu sitimajo ŵasakaga kutila. Myoyo ŵatandite kukatuluchisya m’mesi kaboti kamwana kala pakulambuchisya kuti akusaka akagopole manangula kusogolo kwa sitimajo.
31 Paulo paŵamanyilile yeleyi, ŵamsalile jwakulolela asilikali pampepe ni asilikali kuti, “Naga ŵandu ŵeleŵa akutila mu sitimaji, jemanja ngamkulupuka.”
32 Pelepo asilikali ŵala ŵakatile ngonji syaŵatuluchisyaga kaboti kala ni kukaleka kuti kagwile m’mesi.
33 Sambano chakumasikusiku, Paulo ŵalimbikasisye ŵandu wosope kuti alye yakulya. Ŵatite, “Lelo lili lisiku lya nambala 14 soni ndaŵi josopeji mtemi ngalya kalikose.
34 Myoyo chonde alye yakulya. Atende yeleyi ligongo lya umi wawo, pakuŵa pangali atamose mundu jumo juchawulale.”
35 Sambano Paulo paŵaŵechete yeleyi, ŵajigele mkate* ni kumyamichila Mlungu mwakupopela pameso pa wosopewo. Kaneko ŵawugaŵile ni kutanda kulya.
36 Pelepo ŵandu wosopewo ŵalimbile mtima mwamti nombenawo ŵatandite kujigala yakulya ni kulyaga.
37 Wosope ŵatwakwesile sitimaji twapali ŵandu 276.
38 Jwalijose paŵalile ni kwikuta, ŵanduwo ŵatandite kwasa tiligu m’mesi kuti sitimajo jipepuchilwe.
39 Sambano pakwachele, ŵakukamula masengo mu sitimajo ŵapaweni pamkuli nambo nganagamanyililaga chenene malogo. Nambope ŵachiweni chiko pelepo mwamti ŵaliji ŵakusachilila kuti akakochesye sitimaji pelepo.
40 Myoyo ŵakatile ngonji sya manangula gala ni kugaleka kuti gagwile m’mesi nambosoni ŵagopwele ngonji syakutaŵila yakongolela ya sitimajo. Kaneko ŵakwesisye chinguwo chakusogolo cha sitimajo kuti mbungo jatutile pachikopo.
41 Myoyo paŵalingagalingaga kuti akajime chenene pachikopo, ŵagambile kusimonga kuti sitimajo jititimile kusogolo kwakwe. Jatitimile mumsanga wa m’nyasamo mpaka ngajendasoni. Kaneko matumbela gamachili gatandite kukasa kunyuma kwa sitimajo.
42 Payatendekwe yeleyi asilikali ŵala ŵaganisisye yakuti agambe kwawulaga akayidi wosope ni chakulinga chakuti pakasimanikwa jwakung’ambila ni kutila.
43 Nambo jwakulolela asilikali jula ŵalekasisye jemanjajo kutenda yeleyi ligongo jwalakwe ŵaliji jwakusachilila kumkulupusya Paulo. Myoyo jwalakwe ŵalamwile kuti jwalijose jwampaka akombole kung’ambila aliponye m’mesi ni kung’ambila mpaka kumkuli.
44 Soni kuti ŵakusigalawo akuyeje munyuma, ŵane ali akwesile pa matabwa soni ŵane pa yindu yine ya pa sitima jepasuchejo. Myoyo wosope twayiche chenene kumkuli.
Maloŵe Gamwiŵanda
^ Ŵane akusati “doko.”
^ Ku Mozambique akusati “província.”
^ Nangula chili chindu chausito soni chakola ngonji chiŵachitaŵililaga ku sitima ni kuchiponya m’mesi kuti sitimajo jikajigalika ni mbungo.
^ Jeleji jili mbungo jakutyochela kumpoto cha kungopokolyuŵa.
^ Mikate jakala ŵajipanganyaga ni utandi wa tiligu kapena balele.