Masengo 28:1-31
28 Patwayiche chenene kumkuli, twapikene kuti lina lya chilumbacho lili Melita.
2 Ŵandu ŵa kweleko ŵatulosisye chinonyelo chekulungwa. Wosope ŵatupochele chenene mwamti ŵakolesisye moto ligongo kwaliji mkugwa wula soni kwasisimaga.
3 Nambo Paulo paŵajigele kalitenje ka sasu ni kukaŵika pamoto, pakopweche lijoka ligongo lya mtukuta mwamti lyamlumile paligasa ni kukanilila papopo.
4 Sambano ŵandu ŵa kwelekowo paŵaliweni lijokalyo lili likanilile paligasa lya Paulo, ŵatandite kuŵechetana kuti, “Nditu mundu jweleju ali chigaŵenga, soni atamose kuti akulupwiche panyasa, nambo pachilungamo chakwe, ngakuŵajilwa kuti aŵe ni umi.”
5 Pelepo jwalakwe ŵagambile kupukunya mkonowo mwamti lijokalyo lyagwilile pamoto soni nganilimwulasya.
6 Nambo ŵandu ŵala ŵajembecheyaga kuti ligasa lyakwe chiliyimbe kapena chagambe kugwa ni kuwa. Paŵajembecheye kwa ndaŵi jelewu ŵayiweni kuti pangali chilichose chachikumtendechela. Myoyo ŵachenjile nganisyo syawo ni kutanda kuŵecheta kuti jwalakwejo ali mlungu.
7 Sambano mwakuŵandikana ni pamalo patwalijipo papali migunda ja jwakulamulila jwa pachilumbapo lina lyakwe Papuliyo. Jwalakwe ŵatupochele soni kutusamalila chenene kwa masiku gatatu.
8 Pandaŵi jijiji baba ŵawo Papuliyo ŵaliji chigonele ligongo chilu chaliji chili chikolele moto soni m’matumbo mwaliji mkwapweteka mnope. Myoyo Paulo ŵapite kwa babawo ni ŵapopesile soni kwasajika makono gakwe kaneko ŵaposile.*
9 Payatendekwe yeleyi, ŵandu wosope ŵakulwala pachilumbapo ŵatandite kwika kwa Paulo mwamti jwalakwe ŵaposisye.
10 Ŵanduwo ŵalosisye kuyamichila pakutupa yindu yejinji. Soni patwanyakukaga, ŵatupele chilichose chatwasosechelaga.
11 Pajamasile myesi jitatu, twakwesile sitima jakola yiwanichisyo yakusepa ya ŵanache ŵaŵili ŵachalume ŵa Seu. Sitimaji jaliji jakutyochela ku Alekisandiliya soni jatemi pachilumbapa mundaŵi josope jakusisima.
12 Kaneko twayiche pa chiko* cha Sulakusa, myoyo twatemi pelepo kwa masiku gatatu.
13 Kaneko twapilitisye ulendo wetu mpaka twayiche ku Legio. Kundaŵi kwakwe mbungo jamwela jatandite mwamti jatukamuchisye kuti tukayiche ku Potiyolo palisiku linelyo.
14 Kweleko twasimene abale soni ŵatuŵendile kuti tutame nawo kwa masiku 7. Panyuma pakwe twapitilisye ulendo wakwawula ku Loma.
15 Sambano abale ŵa ku Loma paŵapikene ngani jakwamba m’weji, ŵayiche kukutuchingamila pamalo gakolanjidwa kuti Nyumba Sitatu sya Achalendo, soni ŵane mpaka ŵayiche pa Msika wa Apiyo. Patwaweni jemanjajo, Paulo ŵamyamichile Mlungu soni ŵalimbile mtima.
16 Kaneko patwayiche ku Loma, ŵamkundile Paulo kuti atameje jika ni msilikali jwakumlondela.
17 Nambo gali gamasile masiku gatatu jwalakwe ŵaŵilasisye achakulungwakulungwa ŵakulamulila pasikati pa Ayuda. Wosope paŵasongangene, ŵasalile jemanjajo kuti, “Achalongo achimjangu, atamose kuti nganindenda chilichose chakutindana ni ŵandu ŵa mtundu wetu kapena miyambo ja achinangolo ŵetu, nambope ŵangamwile ku Yelusalemu ni kumbeleka mmyala mwa Aloma mpela mkayidi.
18 Sambano panyuma pakumbusya yiwusyo, nganambata ni magambo galigose gakwenela kumbulajila, mwamti ŵasakaga kungopola.
19 Nambo Ayuda nganakamulana ni yeleyi, myoyo naŵendile kuti magambo gangu akapikanesoni Kaisala. Pakutenda yeleyi ngaŵa kuti nasakaga kulimbana ni ŵandu ŵa mtundu wangu.
20 Paligongo lyeleli naŵilasile jemanja kuti mbechete nawo, pakuŵa une andaŵile ni unyolowu ligongo lya chembecheyo cha mtundu wetu wa Yisalayeli.”
21 Nambo jemanjajo ŵamjanjile Paulo kuti, “M’weji nganitupochela yikalata yiliyose yakwamba mmwejo kutyochela ku Yudeya, soni pangali mundu jwalijose jwamtundu wetu juŵayiche kutyochela kweleko ni kutusalila yakusakala yakwamba mmwejo.
22 Nambo tukuyiwona kuti mpaka yiŵe chenene tuli tupikene nganisyo syenu pangani jeleji, ligongo tukumanyilila kuti kulikose ŵandu akuŵecheta yachabe pakwamba ya kagulu ka dini keleka.”
23 Myoyo ŵapangene lisiku lyakuti chawonegane ni jwalakwejo. Palisikuli Ayudawo ŵayiche ŵajinji kunyumba jiwatamaga jwalakwejo. Myoyo kutandila kundaŵi mpaka ligulo, jwalakwe ŵasalile jemanjajo ngani josope mwakwalondechesya chenene yakwamba Uchimwene wa Mlungu. Jwalakwe ŵalondesisye chenene Chilamusi cha Mose nambosoni yakulemba ya ŵakulochesya mwakwayika pamtima ni chakulinga chakuti amkulupilile Yesu.
24 Ŵandu ŵane ŵatandite kulupilila yaŵaŵecheteyi, nambope ŵane nganakulupilila.
25 Paligongo lyakuti jemanjajo nganapikanganaga, ŵatandite kubalalikangana. Pelepo Paulo ŵasalile jemanjajo kuti:
“Mwakulongoleledwa ni machili ga Mlungu, jwakulochesya Yesaya ŵasasile yakuwona pakwamba ya achinangolo ŵenu.
26 Jwatite, ‘Mjawule kwa ŵandu ŵeleŵa ni mkasalile kuti, “Chimchipikana nditu nambo ngasimpikanichisya kugopolela kwakwe ata panandi, soni chimchilola nditu nambo ngasimmanyilila ata panandi.
27 Pakuŵa ŵandu ŵeleŵa ajumwisye mitima jawo, soni ni mawiwi gawo apikene, nambo ngakutenda kalikose. Awugele meso gawo kuti akalola chilichose, soni awugele mawiwi gawo kuti akapikana kandu ni kupikanichisya kugopolela kwakwe m’mitima jawo kaneko ni kugalawuka mtima kuti naposye.”’
28 Myoyo jemanja mmanyilile kuti chikulupusyo chakutyochela kwa Mlungu chelechi chipite kwa ŵandu ŵamitundu jine, soni jemanjajo chachipikanila nditu.”
29 *——
30 Myoyo jwalakwe jwatemi ku Loma kwa yaka yiŵili m’nyumba jakwe jiŵatamaga mwakulipila mbiya, soni ŵapochelaga chenene ŵandu wosope ŵaŵayikaga kukumlola.
31 Jwalakwe ŵalalichilaga jemanjajo yakwamba Uchimwene wa Mlungu soni kwajiganya yakwamba Ambuje Yesu Klistu mwagopoka pali pangali chilichose chakusokonasya.
Maloŵe Gamwiŵanda
^ Kapena kuti, “ŵalamile.”
^ Ŵane akusati “doko.”
^ Maloŵe ga mundimeji gangasimanikwa mu yakulemba yine yakala mnope. Yeleyi yikulosya kuti nganigaŵa mbali ja Malemba gakusalilidwa ni Mlungu.