Masengo 7:1-60
7 Nambo jwamkulungwa jwa ŵakutaga mbopesi jwawusisye kuti, “Ana yeleyi yili yisyene?”
2 Sitefano ŵajanjile kuti, “Achalongo achimjangu soni achatati, apikane. Mlungu jwauchimbichimbi jwawonechele kwa nangolo jwetu Abulahamu ali mkutama ku Mesopotamiya, mkanajawule kukutama ku Halana.
3 Ni ŵamsalile kuti, ‘Mkopoche m’chilambo chenuchi soni mtyoche pasikati pa achalongo achimjenu ni mjawule m’chilambo chele une chinjimlosya.’
4 Myoyo jwalakwe jwakopweche m’chilambo cha Akalideyacho ni kuja kutama ku Halana. Nambo babagwe paŵawile, Mlungu ŵamsalile kuti atyoche kweleko ni kwika m’chilambo achino, chele jemanja akutama apano.
5 Nambo Mlungu nganampa jwalakwejo malo atamose gamnono.* Nambotu ŵamsalile kuti chachimpa chilambo chelechi kuti chiŵe chakwe soni cha yisukulu yakwe, atamose kuti pandaŵijo nganakola mwanache.
6 Nambosoni Mlungu ŵamsalile jwalakwejo kuti yisukulu yakwe yichiŵa achalendo m’chilambo cha achimsyene soni kuti chachiyitenda kuŵa achikapolo mwamti chachiyilagasya kwa yaka 400.
7 Mlungujo ŵatite, ‘Chinjiwuwelusya mtundu wele uchatenda jemanjajo kuŵa achikapolo. Panyuma pa yeleyi, jemanjajo chachikopoka m’chilambomo soni chachindumichila une pamalo agano.’
8 “Mlungu ŵatesile chilanga ni jwalakwejo cha kuwumbala. Myoyo jwalakwe paŵaŵeleche Isaki, ŵamwumbesye pa lisiku lya 8. Kaneko Isaki jwaŵeleche Yakobo, soni Yakobo jwaŵeleche ŵanache ŵachalume 12 ŵele ŵaŵele mitwe ja maŵasa.
9 Soni mitwe ja maŵasaji jatandite kumtendela jelasi* Yosefe juŵaliji mlongo mjawo mpaka ŵamsumisye ku Iguputo. Nambo Mlungu ŵaliji mkumkamuchisya jwalakwejo,
10 soni ŵamkulupwisye mu yakusawusya yakwe yosope. Ŵamtendekasisye jwalakwejo kuŵa jwalunda pameso pa Falawo mwenye jwa ku Iguputo soni kuti mwenyewo amnonyeleje. Kaneko mwenyewo ŵamsagwile kuti alongoleleje yindu mu Iguputo soni panyumba jawo.
11 Kaneko sala jayiche m’chilambo chosope cha Iguputo soni cha Kanani. Nditu, chelechi chaliji chakusawusya chekulungwa mwamti achinangolo ŵetu nganapataga yakulya.
12 Nambo Yakobo ŵapikene kuti ku Iguputo ŵasunjile yakulya, ni ŵatumisye kweleko achinangolo ŵetu ŵala kandanda.
13 Paŵapitesoni kaŵili, Yosefe ŵalimanyikasisye kwa achalongo achimjakwewo, mwamti liŵasa lya Yosefe lyamanyiche kwa Falawo.
14 Myoyo Yosefe ŵatumisye utenga kwa Yakobo babagwe soni achalongo achimjakwe wosope kuti atyoche ku Kanani ni kwika ku Iguputo. Ŵandu wosope pampepe ŵapali 75.
15 Myoyo Yakobo ŵapite ku Iguputo, mwamti ŵawilile kukoko. Nombenawo achinangolo ŵetu ŵala ŵawililesoni kukoko.
16 Kaneko ŵajigele mawupa gawo ni kwawula nago ku Sekemu. Kweleko ŵagasichile m’malembe gele Abulahamu ŵasumile ni mbiya sya silifa kwa ŵanache ŵa Hamoli ku Sekemu.
17 “Sambano pajaŵandichilaga ndaŵi jakuti Mlungu akwanilisye yaŵalangene ni Abulahamu, ŵanduwo ŵaliji ali atupile mnope mu Iguputo.
18 Kaneko mu Iguputomo mwasagulidwe mwenye jwine ni kutanda kulamulila. Mwenye jweleju nganammanyililaga Yosefe.
19 Myoyo ŵatandite kwalagasya ŵandu ŵa mtundu wetu soni ŵakanganichisye achinangolo ŵetuwo kwasa ŵanache ŵawo ni chakulinga chakuti akaŵa ni umi.
20 Ndaŵi jeleji ni jaŵapagwile Mose, soni jwaliji jwakusalala mnope atamose pameso pa Mlungu. Jwalakwe jwaleledwe m’nyumba ja babagwe kwa myesi jitatu.
21 Nambo paŵamlesile jika, mwanache jwamkongwe jwa Falawo ŵamlokwete ni kutanda kumlela mpela mwanache jwakwe.
22 Myoyo Mose ŵajiganyidwe lunda losope lwa ŵandu ŵa ku Iguputo, mwamti yakuŵecheta yakwe yaliji yamachili soni ŵatendaga yindu yekulungwa.
23 “Sambano Mose paŵaliji ni yaka 40, ŵaganisisye mumtima mwakwe yakuti akalole achalongo achimjakwe, ŵanache ŵa Yisalayeli.
24 Kweleko ŵam’weni jumo mwa achalongo achimjakwewo ali mkulagasidwa ni mundu jwa ku Iguputoko. Pelepo jwalakwe ŵamchenjele mlongo mjakwejo soni ŵamwuchisye mundu jwa ku Iguputojo mwakumwulaga.
25 Mosejo jwaganisyaga kuti achalongo achimjakwewo chamanyilile kuti Mlungu akwakulupusya kupitila mwa jwalakwejo, nambo jemanjajo nganamanyilila yeleyi.
26 Kundaŵi kwakwe, jwalakwe ŵapitesoni kwa achalongo achimjakwe ŵala ni ŵasimene achalume ŵaŵili mwa achalongo achimjakwewo ali mkumenyana. Myoyo ŵatandite kwajilanya. Ŵatite, ‘Jemanja mli ŵapaulongo. Sambano ligongo chichi mkumenyana?’
27 Nambo mundu juŵamputaga mjakwejo ŵamtutile Mose ni kuŵecheta kuti, ‘Ana ŵamŵisile ŵani kuti mŵe jwakulamulila soni jwakutujamuka m’weji?
28 Ana mkusaka kumbulagasoni une mpela yimwatesile liso pakumwulaga mundu jwa akuno ku Iguputo jula?’
29 Mose paŵapikene yeleyi, ŵatisile ni kuja kutama mpela mlendo m’chilambo cha Midiyani. Kweleko ŵalombele ni kuŵeleka ŵanache ŵaŵili ŵachalume.
30 “Pali pamasile yaka 40, lilayika lyawonechele kwa jwalakwejo m’chipululu, mwakuŵandikana ni litumbi lya Sinai. Lilayikalyo lyawonechele m’moto wawakolelaga pa liwukutu lya miŵa.
31 Mose paŵayiweni yeleyi, ŵasimonjile. Nambo paŵaŵandichilaga kuti akalolechesye, papikaniche maloŵe ga Yehofa gakuti,
32 ‘Une ndili Mlungu jwa achinangolo ŵenu, Mlungu jwa Abulahamu, jwa Isaki soni jwa Yakobo.’ Pelepo Mose ŵatandite kutetemela soni nganapitilisya kulolechesya liwukutulyo.
33 Yehofa ŵamsalile jwalakwejo kuti, ‘Mwule sapato ku sajo kwenu, ligongo malo gamjimigo gali geswela.
34 Une nakuweni nditu kulagasidwa kwa ŵandu ŵangu ŵali ku Iguputo, soni mbikene kulila kwawo, mwamti chimbiche kuti nakulupusye. Sambano, ngusaka namtumisye ku Iguputo.’
35 Mose jweleju ni juŵamkanile jula mwakuŵecheta kuti, ‘Ana ŵamŵisile ŵani kuti mŵe jwakulamulila soni jwakutujamuka?’ Nambo Mlungu, kupitila mwa lilayika lyalyawonechele pa liwukutu lya miŵa, ŵamtumilesoni jujojo kuti aŵe jwakulamulila soni jwakwakulupusya.
36 Mundu jweleju ŵakopwesye jemanjajo mu Iguputo soni ŵatesile yakusimonjesya kweleko. Ŵatesilesoni yakusimonjesya pa Nyasa Jechejewu soni m’chipululu kwa yaka 40.
37 “Mose jweleju ni jwele ŵasalile ŵanache ŵa Yisalayeli kuti, ‘Mlungu chachimsagula jwakulochesya mpela une pasikati pa achalongo achimjenu ni kumpa jemanja.’
38 Mosejo jwaliji pasikati pa Ayisalayeliwo m’chipululu. Soni mwelemo jwaliji pampepe ni lilayika lyalyaŵechete ni jwalakwejo pa litumbi lya Sinai nambosoni pampepe ni achinangolo ŵetu. Jwalakwejo jwapochele maloŵe ga Mlungu ga umi ni kutupa m’weji.
39 Nambo achinangolo ŵetuwo nganampikanila jwalakwe soni ŵamkanile. Nambosoni munganisyo mwawo jemanjaji ŵawujile ku Iguputo.
40 Jemanjaji ŵamsalile Aloni kuti, ‘Mtupanganyichisye milungu kuti jitulongoleleje, ligongo ngatukumanyilila yayimtendechele Mose jwele ŵatukopwesye m’chilambo cha Iguputo.’
41 Myoyo m’masiku gelego jemanjajo ŵapanganyisye chindu chakuwoneka mpela mwanache jwa ng’ombe. Kaneko ŵatandite kuchipelechela mbopesi soni kuchisangalalila chindu chaŵapanganyisyecho.
42 Pelepo Mlungu ŵalesile jemanjajo soni ŵakundile kuti ayitumichileje yindu yakuwoneka yayili kwinani. Ŵatesile yeleyi mwakamulana ni yayalembedwe m’buku ja Ŵakulochesya, jele jatite, ‘Jemanja ŵa m’nyumba ja Yisalayeli, mbopesi sya nyama soni mbopesi sine syamwapelekaga m’chipululu mula kwa yaka 40, ngaŵa kuti mwasipelekaga kwa une nambo kwa milungu jine.
43 Jemanja mwajigele chitenti cha Moloki soni ndondwa ja mlungu jwakolanjidwa kuti Lefani. Yindu yeleyi mwayipanganyisye kuti myitindiŵalileje. Myoyo chinjimtopola soni chimchijawula kwakutalika kupunda ku Babulo.’
44 “M’chipululu achinangolo ŵetu ŵakwete chitenti chakulosya kuti Mlungu ali ni jemanjajo. Chitenticho ŵachipanganyisye mpela mwaŵaŵechetele Mlungu kwa Mose soni mwakamulana ni yaŵamlosisye.
45 Kaneko achinangolo ŵetu ŵane ŵachipochele chitenticho kutyochela kwa jemanjaji. Myoyo ŵajinjile nacho yimpepe ni Yoswa m’chilambo chaŵatamaga ŵandu ŵa mitundu jine, ŵele Mlungu ŵatopwele pameso pa achinangolo ŵetuwo. Chitenticho chatemipe mpaka m’masiku ga Daudi.
46 Mlungu ŵamnonyelaga Daudi mwamti Daudijo jwaŵendile kuti ataŵe nyumba jakutama Mlungu jwa Yakobo.
47 Nambo Solomo ni juŵataŵile nyumbajo.
48 Nambotu Jwakwinani Mnopejo jwangatamaga m’nyumba syakutaŵidwa ni makono, mpela mwaŵaŵechetele jwakulochesya kuti,
49 ‘Kwinani uli mpando wangu wa umwenye soni chilambo chapasi chili chakupondapo sajo syangu. Ana mpaka mundaŵile une nyumba jamtuli? Akuti myoyo Yehofa. Kapena ana pana malo gakuti mpaka ndame?
50 Ana makono gangu ngaŵa ni gagapanganyisye yindu yosopeyi?’
51 “Jemanja ŵandu ŵakumula mtima, mwugele mawiwi genu soni ngamkusaka kuchenga kaganisye kenu. Ndaŵi syosope mkusakana msimu weswela. Mpela mwele achinangolo ŵenu ŵatendele, jemanjasoni mkutenda myoyo.
52 Ana apali jwakulochesya jwele achinangolo ŵenu nganamlagasya? Nditu, jemanjajo ŵawuleje ŵandu ŵaŵaŵechetele chile yakwika kwa mundu jwakulungamajo, jwelesoni jemanja mwampeleche soni kumwulaga.
53 Jemanja mwapochele Chilamusi kupitila mwa malayika nambo mlepele kuchisunga.”
54 Sambano jemanjajo paŵapikene yeleyi, ŵatumbile mnope soni ŵasakaga kuti agambe kumalana najo.
55 Nambo msimu weswela pawagumbele mwa jwalakwejo, ŵalolite kwinani ni ŵawuweni uchimbichimbi wa Mlungu soni wa Yesu ali ajimi kumkono wamlyo wa Mlungu.
56 Kaneko Sitefano ŵatite, “Alole! Ngukuwona kwinani kuli kuwugwiche soni Mwanache jwa mundu ali ajimi kumkono wamlyo wa Mlungu.”
57 Pelepo jemanjajo ŵagumisile mnope soni ŵasiŵile mawiwi gawo ni magasa ni ŵatandite kumwunjilila jwalakwejo.
58 Kaneko ŵamkopwesye kusa kwa msinda ni kutanda kumponya maganga. Sambano mboni sila syaŵisile yakuwala yawo pasogolo pa mnyamata jwine lina lyakwe Saulo.
59 Jemanjajo paŵaliji mkumponya maganga, Sitefano ŵaŵechete kuti, “Ambuje Yesu, nguleka umi* wangu mmyala mwawo.”
60 Kaneko ŵatindiŵele ni kugumila ni maloŵe gamachili kuti, “Yehofa, akajimba magambo jemanjaji pa chakulemwa chelechi.” Paŵaŵechete yeleyi, ŵawile.*
Maloŵe Gamwiŵanda
^ Maloŵe gakwe gandanda, “malo gakwana lusajo lumo.”
^ Ŵane akusati “dumbo.”
^ Maloŵe gakwe gandanda, “msimu.”
^ Maloŵe gakwe gandanda, “ŵagonile mu chiwa.”