Chikalata Chandanda Chakwawula kwa Akolinto 11:1-34
11 Musyasyeje une, mpelaga mungutendela unesoni pakumsyasya Klistu.
2 Sambano ngusaka kumyamichila ligongo lyakuti mkusimungumbuchila mu yosope, soni kuti mkukuya chenene yindu yinamsalile kuti myikuyeje.
3 Nambo ngusaka mmanyilile kuti Klistu ali mtwe wa jwamlume, soni jwamlume ali mtwe wa jwamkongwe. Soni Mlungu ali mtwe wa Klistu.
4 Jwamlume jwalijose jwakupopela kapena kulochesya ali awete kandu kumtwe akuwujalusya mtwe wakwe.
5 Nambo jwamkongwe jwalijose jwakupopela kapena kulochesya mkanawale kandu kumtwe akuwujalusya mtwe wakwe, pakuŵa akusaŵa mpela jwamkongwe jwasenjile wumbo.
6 Pakuŵa naga jwamkongwe ngakuwala kandu mumtwe mwakwe, akusosekwa asenje wumbo syakwe. Nambo naga chili chindu chakutesya sooni kwa jwamkongwejo kuti asenje kapena kumyola wumbo syakwe syosope, akusosekwa kuwala kandu mumtwe.
7 Jwamlume ngakusosekwa kuwala kandu kumtwe, pakuŵa jwalakwe ali chiwanichisyo soni uchimbichimbi wa Mlungu. Nambo jwamkongwe ali uchimbichimbi wa jwamlume.
8 Pakuŵa jwamlume nganatyochela kwa jwamkongwe, nambo jwamkongwe jwatyochele kwa jwamlume.
9 Konjechesya pelepa, jwamlume nganapanganyidwa ligongo lya jwamkongwe, nambo jwamkongwe ni juŵapanganyidwe ligongo lya jwamlume.
10 Ni ligongo lyakwe jwamkongwe akusosekwa awaleje kandu mumtwe mpela chimanyisyo chakwapikanila ŵamkwakwe. Atendeje yeleyi ligongo lya malayika.
11 Nambosoni, mumpingo wa Ambuje, jwamkongwe ngaŵa mkusimanikwa pali pangali jwamlume, soni jwamlume ngaŵa mkusimanikwa pali pangali jwamkongwe.
12 Mpela mwayiŵelele kuti jwamkongwe jwapanganyidwe kutyochela kwa jwamlume, myoyosoni jwamlume akusapagwa kutyochela kwa jwamkongwe. Nambo Mlungu ni juŵapanganyisye yindu yosope.
13 Myoyo mlamule mwachimsyene naga yili yakuŵajilwa kuti jwamkongwe apopeleje kwa Mlungu mkanawale kandu mumtwe.
14 Ana chipago chetu ngachikusatujiganya kuti naga jwamlume akwete wumbo syelewu chili chindu chakutesya sooni kwa jwalakwe?
15 Nambo naga jwamkongwe akwete wumbo syelewu, welewo uli uchimbichimbi wakwe. Pakuŵa wumbosyo ŵampele mmalo mwa chakuwala mumtwe.
16 Nambope, naga ŵane akusaka kusisya yeleyi pakusaka kuya ndamo jine, m’weji nganitukolasoni ndamo jine, atamose mipingo josope ja Mlungu nganijikolasoni ndamo jine.
17 Nambotu panguŵecheta ayi ngangumyamichila, ligongo pamsongene pampepe, ngamkusongana ni yakulinga yambone nambo yakusakala.
18 Mbikene kuti pamsongene mumpingo pakusapagwa kugaŵikangana sonitu pane nganiji ngujikulupilila.
19 Ligongo lya yeleyi ngangukayichila kuti pasikati penu mgaŵikangene m’tumagulu. Nambo yeleyi chiyitendekasye kuti ŵandu ŵele Mlungu akwanonyela amanyiche.
20 Pamsongene pampepe, nguyiwona kuti ngamkusonganaga kusyesyene kuti mlye Chakulya Chaligulo cha Ambuje.
21 Pakuŵa pamsongene kuti mlye, mkuŵaga kuti jwalijose alile kala kumangwakwe chakulya chaligulocho. Myoyo, yikusimanikwa kuti ŵane ali ni sala nambo ŵane akolelwe.
22 Ana jemanja nganimkola majumba gakuti mkalileje ni kumwela mwelemo? Ana kapena mkusaka kunyosya mpingo wa Mlungu soni kwatesya sooni ŵanganakola kalikose? Ana mkusaka namsalile chichi kusyesyene? Kapena mkusaka namyamichile? Nambo pangani ajipeji, nganimba namyamichile.
23 Pakuŵa yaŵanjiganyisye Ambuje ni yangumjiganyasoni jemanja yakuti, pa chilo chele Ambuje Yesu ŵapelechedwe, ŵajigele mkate.*
24 Paŵayamichile, ŵawugaŵenyegaŵenye, kaneko ŵatite, “Mkate welewu ukwimila chilu changu chachikupelechedwa ligongo lya jemanja. Mtendeje yeleyi kuti mungumbuchileje.”
25 Ŵatesilesoni myoyo ni chikapu cha finyo ali alile chakulya chaligulo, ni ŵatite, “Chikapuchi chikwimila chilangano chasambano kupitila m’myasi jangu. Mtendeje yeleyi pamkumwa ya m’chikapuchi kuti mungumbuchileje.”
26 Pakuŵa pamkulya mkate welewu soni kumwa ya m’chikapuchi, mkusaŵa mli mkulalichila ya chiwa cha Ambuje, mpaka pachachiyika Ambujewo.
27 Myoyo, jwalijose jwakulya mkate soni kumwa ya m’chikapu cha Ambuje mwangaŵajilwa, chachikola magambo gakuchilemwechesya chilu soni myasi ja Ambuje.
28 Jwalijose akusosekwa aliwungunyeje kaje kuti amanyilile naga ali jwakuŵajilwa. Kaneko mpaka atande kulya mkate soni kumwa ya m’chikapucho.
29 Pakuŵa jwalijose jwakulya soni kumwa mwangamanyilila yachikwimila chilucho, akuliŵilanjila chilango* pandaŵi jakulya soni kumwajo.
30 Ni ligongo lyakwe ŵajinji pasikati penu ali ŵangali machili soni ŵakulwalalwala, soni ŵane ŵawile.*
31 Nambo naga tukulimanyilila achimsyewe, nganituŵa tupochele chilango.
32 Nambope, patupochele chilango, nikuti Yehofa atujamwiche. Pambesi pakwe, jwalakwe ngasatupa chilango pampepe ni chilambo.
33 Myoyo achalongo achimjangu, pamsongene kuti mlye Chakulya Chaligulo cha Ambuje, mwajembecheyeje achimjenu.
34 Naga jwine jimkwete sala, akalye kumangwakwe kogopela kuti mpaka mpochele chilango pamsongene pampepe. Nambo pakwamba ya ngani sinesyo, chinjilondesya jika pachinjiyika kweleko.
Maloŵe Gamwiŵanda
^ Mikate jakala ŵajipanganyaga ni utandi wa tiligu kapena balele.
^ Ŵane akusati “chamuko.”
^ Pelepa akwamba konasika kwa unasi wawo ni Mlungu.
