Chikalata Chandanda Chakwawula kwa Atesalonika 1:1-10
1 Une Paulo pampepe ni Silifano* soni Timoteyo nguwulembela mpingo wa ku Tesalonika wawuli wakamulana ni Mlungu Atati soni Ambuje Yesu Klistu.
Umbone mtima wekulungwa soni mtendele uŵe ni jemanja.
2 Ndaŵi syosope tukusamyamichila Mlungu patukusala mena ga jemanja wosope m’mapopelo getu.
3 Pameso pa Mlungu jwetu jwalisoni Atati, tukusamkumbuchila jemanja pa masengo gamwakamwile mwakulupichika soni pa yosope yamtesile ligongo lya chinonyelo. Tukusakumbuchilasoni kupilila kwenu ligongo lya chembecheyo chimkwete mwa Ambuje ŵetu Yesu Klistu.
4 Pakuŵa tukumanyilila kuti Mlungu ni juŵamsagwile jemanja achalongo achimjetu, soni jwalakwe akusamnonyela mnope.
5 Ngani syambone sitwamlalichile jemanja nganitusilalichila ni maloŵepe basi, nambo twasilalichile ni utenga wamachili, ni msimu weswela, soni mwakusimichisya mnope. Jemanjasoni mkumanyilila yatwatendaga kuti tumkamuchisye.
6 Pambesi pakwe mwatandite kutusyasya m’weji soni Ambuje, pakuŵa mwapochele maloŵego ni chisangalalo chakwika ligongo lya msimu weswela atamose kuti mwasimanaga ni yakusawusya yejinji.
7 Ligongo lya yeleyi, jemanja mwaŵele chisyasyo kwa ŵakulupilila wosope ku Makedoniya soni ku Akaya.
8 Yisyene yakwe yili yakuti, ligongo lya jemanja, ŵandu ku Makedoniya soni ku Akaya kosope apikene maloŵe ga Yehofa. Nambosoni ŵandu kulikose apikene yakwamba chikulupi chenu pa Mlungu, mwamti m’weji ngatukusosekwasoni kwasalila chilichose.
9 Jemanjaji akusasala yatwatesile m’weji patwasimene ni jemanja pandanda, soni yamwatesile jemanja pakuleka milungu jenu jakusepa ni kugalawuchila kwa Mlungu jwaumi soni jwakuwona kuti mŵe achikapolo ŵakwe.
10 Mwagalawuchilesoni kwa Mlungu ni chakulinga chakuti mjembecheyeje kwika kwa Mwanache jwakwe kutyochela kwinani, jwelesoni ŵamjimwisye ku chiwa. Mwanache jweleju ali Yesu, jwakusatukulupusya ku chilango* chachikwika.
