Buku Jandanda ja Ayimwene 15:1-34
15 Mu chaka cha 18 cha Mwenye Yelobowamu mwanache jwa Nebati, Abiyamu jwaŵele mwenye jwa Ayuda.
2 Jwalakwe jwalamulile kwa yaka yitatu ku Yelusalemu. Lina lya mamagwe lyaliji Maaka ŵaŵaliji chisukulu cha Abisalomu.
3 Jwalakwe ŵapitilisye kutenda yakulemwa yosope yaŵatendaga babagwe, soni jwalakwe nganalipelekaga kwa Yehofa Mlungu jwakwe ni mtima wakwe wosope mpela muŵatendele Daudi, nangolo jwakwe.
4 Nambo ligongo lya Daudi, Yehofa Mlungu ŵampele Abiyamujo nyali mu Yelusalemu. Ŵatesile yeleyi mwakumsagula mwanache jwakwe kuti aŵe mwenye ni chakulinga chakuti Yelusalemu apitilisye kusimanikwa.
5 Yaliji myoyo ligongo lyakuti Daudi ŵatesile yindu yambone pameso pa Yehofa soni jwalakwe ŵatesile yosope yele Mlungu ŵamlamulaga mu masiku gosope ga umi wakwe kulekapo ngani ja Uliya Mhiti.
6 Nambosoni m’masiku gosope ga umi wakwe, Lehobowamu ŵatamilaga kumenyana ngondo ni Yelobowamu.
7 Mbili josope ja umi wa Abiyamu soni yosope yajwatesile, yalembedwe mu buku ja mbili ja mundaŵi ja achayimwene ŵa ku Yuda. Papalisoni ngondo pasikati pa Abiyamu ni Yelobowamu.
8 Kaneko Abiyamu jwawile mpela mwayaŵelele ni achinangolo ŵakwe soni ŵamŵisile m’malembe mu Msinda wa Daudi. Kaneko mwanache jwakwe Asa jwaŵele mwenye mmalo mwakwe.
9 Mu chaka cha 20 cha ulamusi wa Yelobowamu mwenye jwa Ayisalayeli, Asa jwatandite kwalamulila Ayuda.
10 Jwalakwe jwalamulile ku Yelusalemu kwa yaka 41. Lina lya angangagwe lyaliji Maaka chisukulu cha Abisalomu.
11 Asa jwatesile yindu yambone pameso pa Yehofa mpela muŵatendele Daudi, nangolo jwakwe.
12 Jwalakwe ŵatyosisye m’chilambomo achalume ŵaŵatendaga uhule m’malo gawo gakutindiŵalila milungu jaunami. Ŵatyosisyesoni milungu jakunyalaya* josope jele achinangolo ŵakwe ŵapanganyisye.
13 Jwalakwe ŵayikene pakwatyosya angangagwe ŵakongwe lina lyawo Maaka paudindo wawo wakuŵa mama ŵa mwenye ligongo lyakuti anganga ŵakweŵa ŵasepile mlungu jwakunyalaya juŵamkamulichisyaga masengo pakutindiŵalila njalamila japadela.* Asa ŵamgwisisye mlungu jwakunyalayajo ni ŵajile kuja kumjocha ku Chitiŵi cha Kidiloni.
14 Nambo malo gakwela gasigele. Atamose kuti yaliji myoyo Asa ŵamtumichile* Yehofa ni mtima wakwe wosope soni kwa umi wakwe wosope.
15 Nambosoni jwalakwe ŵayiche nayo ku nyumba ja Yehofa yindu yele jwalakwejo soni babagwe ŵayiswejesye. Yinduyi yaliji silifa, golide, soni yiwiya yine yakulekanganalekangana.
16 Asa ni Basa mwenye jwa Ayisalayeli ŵatamilaga kumenyana ngondo.
17 Myoyo Mwenye Basa jwa Ayisalayeli jwapite kukwajimuchila Ayuda, mwamti jwalakwe ŵatandite kutaŵa* msinda wa Lama ni chakulinga chakuti pakapagwa jwalijose jwakukopoka kapena kwinjila mu dela ja Asa mwenye jwa Ayuda.
18 Pelepo Asa ŵajigele silifa josope soni golide juŵasigele m’yipinda yakusunjila chipanje cha m’nyumba ja Yehofa soni m’yipinda yakusunjila chipanje cha ku nyumba ja mwenye ni kuyipeleka kwa ŵakutumichila ŵakwe. Kaneko Mwenye Asa ŵatumile jemanjaji kwa Beni-hadadi mwenye jwa Asiliya juŵatamaga ku Damasiko. Beni-hadadi ŵaliji mwanache jwa Tabilimoni, soni Tabilimoni ŵaliji mwanache jwa Hesiyoni. Asa ŵatumile ŵakutumichila ŵakweŵa kuti akamsalile Beni-hadadi kuti,
19 “Pana mkamulano pasikati pa unejo ni mmwejo soni pasikati pa baba ŵangu ni baba ŵenu. Une namtumichisye mmwejo silifa ni golide kuti yiŵe mtuka. Sambano mleche kukamulana ni Basa mwenye jwa Ayisalayeli ni chakulinga chakuti jwalakwejo andeche.”
20 Myoyo Beni-hadadi ŵapikanile yaŵaŵechete Mwenye Asa, mwamti ŵatumisye achimlongola ŵa magulu ga asilikali kuti akajimuchile misinda ja Ayisalayeli. Asilikaliwo ŵagomeche msinda wa Iyoni, Dani, Abele-beti-maaka, dela josope ja Kineleti, soni madela gosope ga ku Nafitali.
21 Basa paŵapikene yeleyi ndaŵi jijojo ŵalesile kutaŵa* msinda wa Lama wula, mwamti ŵapitilisye kutama ku Tilisa.
22 Kaneko Mwenye Asa ŵasongangenye Ayuda wosope, mwamti pangali juŵasigele. Jemanjaji ŵajigele maganga gosope soni matabwa gele Basa ŵagakamulichisyaga masengo pakutaŵa msinda wa Lama. Mwenye Asa ŵakamulichisye masengo yinduyi pakutaŵa* msinda wa Geba ku Benjamini soni msinda wa Misipa.
23 Mbili josope ja umi wa Asa, machili gakwe gosope soni yosope yaŵatesile nambosoni misinda josope jaŵataŵile* yalembedwe mu buku ja mbili ja mundaŵi ja achayimwene ŵa ku Yuda. Nambo jwalakwe ali akalambele jwalwasile ulwele ku sajo syakwe.
24 Pambesi pakwe Asa ŵawile mpela mwayaŵelele ni achinangolo ŵakwe, soni ŵamsichile m’malembe ga jemanjaji mu Msinda wa Daudi, nangolo jwakwe. Kaneko mwanache jwakwe lina lyakwe Yehosafati jwaŵele mwenye mmalo mwa jwalakwejo.
25 Nadabu mwanache jwa Yelobowamu jwaŵele mwenye jwa Ayisalayeli mu chaka chaŵili cha ulamusi wa Mwenye Asa jwa Ayuda, soni jwalakwe jwalamulile Ayisalayeli kwa yaka yiŵili.
26 Jwalakwe jwapitilisye kutenda yindu yakusakala pameso pa Yehofa, soni jwakuyiye yaŵatendaga babagwe. Nambosoni jwatesile yakulemwa yakulandana ni yaŵatesile babagwe ŵaŵatendekasisye Ayisalayeli kulemwa.
27 Basa mwanache jwa Ahiya jwa m’nyumba ja Isakala ŵamlinganyile chiwembu Nadabu, soni Basajo ŵamwuleje jwalakwe ku Gibitoni uwaliji msinda wa Afilisiti. Pandaŵiji Nadabujo yimpepe ni Ayisalayeli wosope ŵaliji ali asyungulile msinda wa Gibitoni.
28 Myoyo Basa ŵamwuleje Nadabu m’chaka chatatu cha ulamusi wa Mwenye Asa jwa ku Yuda, mwamti jwalakwe ŵaŵele mwenye mmalo mwa Nadabujo.
29 Jwalakwe paŵagambile kuŵa mwenye jwawuleje ŵandu wosope ŵa m’liŵasa lya Yelobowamu. Pangali atamose mundu jumo jwa m’liŵasa lya Yelobowamu juŵamlesile ni umi. Jwalakwe ŵajonasile jemanjaji mwakamulana ni maloŵe ga Yehofa gaŵawechete kupitila mwa jwakutumichila jwakwe Ahiya jwa ku Silo.
30 Yeleyi yaliji myoyo ligongo lya yakulemwa yaŵatesile Yelobowamu juŵatendekasisyesoni Ayisalayeli kulemwa, soni ligongo lyakuti jwalakwe ŵamtumbilikasisye mnope Yehofa Mlungu jwa Ayisalayeli.
31 Mbili josope ja umi wa Nadabu soni yosope yaŵatesile yalembedwe m’buku ja mbili ja mundaŵi ja achayimwene ŵa ku Isalayeli.
32 Asa ni Basa mwenye jwa Ayisalayeli ŵatamilaga kumenyana ngondo.
33 Mu chaka chatatu cha ulamusi wa Mwenye Asa jwa ku Yuda, Basa mwanache jwa Ahiya jwaŵele mwenye ku Tilisa ni kwalamulilaga Ayisalayeli wosope. Jwalakwe jwalamulile kwa yaka yakwana 24.
34 Nambo jwalakwe jwapitilisye kutenda yindu yakusakala pameso pa Yehofa, soni jwakuyiye yaŵatendaga Yelobowamu nambosoni jwatesile yakulemwa yaŵatendekasisye Ayisalayeli kulemwa.
Maloŵe Gamwiŵanda
^ Maloŵe ga Chihebeli gaŵagagopolele pelepa kuti kunyalaya mpaka galandane ni ndoŵe. Ŵagakamulichisye masengo pakusaka kulosya kuti yinduyo yili yangali mate.
^ Alole Maloŵe Gakumbesi.
^ Kapena kuti “ŵalipeleche kwa Yehofa.”
^ Kapena kuti “kuwulimbisya; kutaŵasoni.”
^ Kapena kuti “kuwulimbisya; kutaŵasoni.”
^ Kapena kuti “pakuwulimbisya; pakutaŵasoni.”
^ Kapena kuti “jaŵajilimbisye; jaŵajitaŵilesoni.”
