Buku Jandanda ja Mbili 22:1-19
22 Kaneko Daudi ŵaŵechete kuti, “Apano ni pajichiŵa nyumba ja Yehofa Mlungu jwakuwona soni malo gakupelechela mbopesi syakutinisya ga Ayisalayeli.”
2 Panyuma pakwe, Daudi ŵalamwile kuti ŵasonganganye pampepe ŵandu ŵamitundu jine ŵaŵatamaga m’chilambo cha Isalayeli. Kaneko jwalakwe ŵapele jemanjajo masengo gakuti akaseje ni kusepa maganga gakutaŵila nyumba ja Mlungu jwakuwona.
3 Daudi ŵasongangenyesoni yisyano yejinji yakuti akamulichisye masengo pakupanganya misomali jakomela matanga ga pageti soni yakuŵanila yindu. Nambosoni ŵasongangenye kopa jwamjinji mnope jwangakomboleka kulinga usito wakwe.
4 Jwalakwe ŵasongangenyesoni matabwa ga mkungusa gangaŵalanjika. Yaliji myoyo ligongo lyakuti ŵandu ŵa ku Sidoni soni ŵa ku Tulo ŵayiche kwa Daudi ni matabwa ga mkungusa gejinji.
5 Kaneko Daudi ŵaŵechete kuti, “Mwanangu Solomo ali jwachinandipile soni jwangamanyilila yejinji. Nambo nyumba jakusaka kumtaŵila Yehofa jichiŵa jekulungwa mnope, mwamti uchimbichimbi ni kusalala kwakwe yichimanyika ku yilambo yosope. Une chisonganganye yindu kuti chayikamulichisye masengo jwalakwe.” Myoyo Daudi mkanawe ŵasongangenye yindu yejinji mnope yakuti chayikamulichisye masengo mwanache jwakwe.
6 Konjechesya pelepa, jwalakwe ŵamŵilasilesoni mwanache jwakwe Solomo ni kumsalila malangiso gakwayana ni kataŵe ka nyumba ja Yehofa Mlungu jwa Ayisalayeli.
7 Daudi ŵamsalile mwanache jwakwe Solomo kuti, “Une, nasachililaga mumtima mwangu kutaŵa nyumba jakumanyika ni lina lya Yehofa Mlungu jwangu.
8 Nambo Yehofa ŵasalile une kuti, ‘Mmwejo mwuleje ŵandu ŵajinji* soni mputile ngondo syejinji. Mmwejo ngamundaŵila nyumba jakumanyika ni lina lyangu ligongo mwuleje ŵandu ŵajinji pachilambo chapasi pameso pangu.
9 Mpikane! Chimchikola mwanache jwamlume juchachiŵa mundu jwamtendele.* Chinjimpumusya jwalakwejo, mwamti adani ŵakwe wosope ŵakumsyungulila ngasamlagasya. Jwalakwe chachimanyika ni lina lyakuti Solomo* mwamti chinjitendekasya kuti Ayisalayeli atameje mwabata soni mwamtendele m’masiku gakwe.
10 Jwalakwejo ni juchachindaŵila une nyumba jakumanyika ni lina lyangu. Jwalakwejo chachiŵa mwanangu soni une chinjiŵa babagwe. Une chinjitamilikasya mwakulimbangana mpando wakwe waumwenye pasikati pa Ayisalayeli mpaka kalakala.’
11 “Sambano mwanangu, Yehofa aŵe ni mmwejo soni yindu yimjendeleje chenene kuti mumtaŵile nyumba Yehofa Mlungu jwenu mpela mwaŵechetele jwalakwe yakwamba mmwejo.
12 Soni nguŵenda kuti Yehofa champe mmwejo lunda soni kupikanichisya yindu pachachimpa ulamusi pasikati pa Ayisalayeli. Champe yeleyi ni chakulinga chakuti chimsunjeje malamusi ga Yehofa Mlungu jwenu.
13 Pelepo yindu yichimjendela chenene naga chimchikuyaga mwakusamala malamusi soni yakulamula ya Mlungu yele Yehofa ŵamsalile Mose kuti ŵape Ayisalayeli. Mŵe ŵakulimba mtima soni mtende yindu mwamachili. Mkatenda woga kapena kutetemela.
14 Mlole, une limbichile mnope kusonganganya yindu yakuti chimkamulichisye masengo pakutaŵa nyumba ja Yehofa. Yindu yakwe yili golide jwakusitopa matalente 100,000, silifa jwakusitopa matalente 1,000,000, soni kopa ni yisyano yejinji yangakomboleka kulinga usito wakwe. Nambosoni songangenye matabwa ni maganga. Nambo mmwejo chimchijonjechesya yindu yeleyi.
15 Mkwetesoni ŵamasengo ŵajinji mnope mpela ŵakukasa maganga, ŵakusepa maganga, ŵakamula masengo ga yindu yamatabwa soni ŵakwete lunda pamasengo gakulekanganalekangana.
16 Golide, silifa, kopa soni yisyano yipali yejinji mnope yangakomboleka kulinga usito wakwe. Sambano mmwejo mkoseche, mtande kukamula masengoga soni Yehofa aŵe ni mmwejo.”
17 Kaneko Daudi ŵalamwile achakulungwakulungwa wosope ŵa Ayisalayeli kuti amkamuchisye mwanache jwakwe Solomo. Ŵasalile kuti,
18 “Ana Yehofa Mlungu jwawo ngati ali ni jemanja, soni jwalakwejo ngati ni juŵapumwisye jemanja kumbali syosope sya chilambochi? Jwalakwetu ŵapeleche kwa une ŵandu wosope ŵa m’chilambochi, soni chilambochi chigomechedwe pameso pa Yehofa soni pameso pa ŵandu ŵakwe.
19 Sambano jemanja mŵe ŵakusimichisya kumsosasosa Yehofa Mlungu jwenu ni mtima wenu wosope soni ni umi wenu wosope, nikutanda kutaŵa malo geswela ga Yehofa Mlungu jwakuwona. Mtende yeleyi ni chakulinga chakuti chimjigale Libokosi lya Chilanga lya Yehofa soni yiwiya* yeswela ya Mlungu jwakuwona ni kwika nayo ku nyumba jajichitaŵidwa pakuchimbichisya lina lya Yehofa.”
Maloŵe Gamwiŵanda
^ Mu Chihebeli ŵatiga, “msulwisye myasi jejinji.”
^ Mu Chihebeli ŵatiga, “mundu jwakupumula.”
^ Linali likusatyochela ku maloŵe ga Chihebeli gagakusagopolela kuti “Mtendele.”
^ Ŵane akusati “yisuso.”
