Buku Jandanda ja Mbili 26:1-32
26 Alonda ŵa pageti ŵagaŵile m’magulu. Ŵandu ŵakwe ŵaliji aŵa: Pa ŵanache ŵa Kola papali Meselemiya mwanache jwa Kole. Kole ŵaliji jumo mwa ŵanache ŵa Asafu.
2 Papalisoni ŵanache ŵa Meselemiya. Jwandanda kupagwa ŵaliji Sekaliya, jwaŵili ŵaliji Yediyele, jwatatu ŵaliji Sebadiya, jwamcheche ŵaliji Yatiniyele,
3 jwamsano ŵaliji Elamu, jwa 6 ŵaliji Yehohanani, soni jwa 7 ŵaliji Eliyeho-enayi.
4 Papalisoni Obedi-edomu ni ŵanache ŵakwe. Jwandanda kupagwa ŵaliji Semaya, jwaŵili ŵaliji Yehosabadu, jwatatu ŵaliji Yowa, jwamcheche ŵaliji Sakala, jwamsano ŵaliji Netanele,
5 jwa 6 ŵaliji Amiyele, jwa 7 ŵaliji Isakala, soni jwa 8 ŵaliji Puletayi. Obedi-edomu ŵakwete ŵanache ŵeleŵa, pakuŵa Mlungu ŵampele upile.
6 Papalisoni ŵanache ŵachalume ŵa Semaya mwanache jwa Obedi-edomu. Ŵanache ŵakweŵa ŵaliji ŵakulongolela mu liŵasa lyakumanyika ni lina lya nangolo jwawo. Yaliji myoyo ligongo lyakuti achalume ŵeleŵa ŵaliji ŵamachili soni ŵakudalilichika.
7 Ŵanache ŵa Semayawo ŵaliji aŵa: Otini, Lafayele, Obedi, soni Elisabadi. Achalongo achimjakwe ŵa Elisabadi, ŵali Elihu soni Samakiya, nombenawo ŵaliji achalume ŵakudalilichika.
8 Ŵeleŵa ndi ŵandu wosope ŵakutyochela mwa Obedi-edomu. Jemanjaji pampepe ni ŵanache ŵawo soni achalongo achimjawo ŵaliji achalume ŵakudalilichika soni ŵakuŵajilwa pa utumikiwo. Ŵandu ŵakutyochela mwa Obedi-edomu wosope pampepe ŵaliji 62.
9 Meselemiya ŵakwete ŵanache soni achalongo achimjakwe, wosope pampepe ŵaliji achalume ŵakudalilichika ŵakwana 18.
10 Hosa jwakutyochela mwa Melali ŵakwete ŵanache ŵachalume. Pa ŵanache ŵa Hosa, Simuli ni juŵaliji jwakulongolela. Atamose kuti jwalakwejo nganaŵa mwanache jwandanda kupagwa, nambope babagwe ŵamsagwile kuti aŵe jwakulongolela mu liŵasalyo.
11 Jwaŵili ŵaliji Hilikiya, jwatatu ŵaliji Tebaliya, soni jwamcheche ŵaliji Sekaliya. Ŵanache wosope ŵachalume ŵa Hosa pampepe ni achalongo achimjakwe ŵaliji 13.
12 Achalume ŵakulongolela m’magulu gosope ga alonda ŵa pageti nombenawo ŵakamulaga masengo gaulonda mpela achalongo achimjawowo. Masengo gawo galiji kutumichila ku nyumba ja Yehofa.
13 Myoyo ŵatesile kalotalota* pakugaŵanya masengo ga alonda ŵakwima m’mageti gakulekanganalekangana. Pakutenda yeleyi, nganajigalilaga kuti aju ali jwamwana kapena jwamkulungwa m’maŵasa gakumanyika ni mena ga achinangolo ŵawo.
14 Kaneko kalotalota jwa geti ja mbali jakungopokolyuŵa jwamgwilile Selemiya. Paŵatesilesoni kalotalota jwa geti ja mbali jakumpoto, jwamgwilile mwanache jwamlume jwa Sekaliya juŵapelekaga malangiso ga lunda.
15 Paŵatesilesoni kalotalota jwa geti ja mbali jakummwela, jwamgwilile Obedi-edomu. Ŵanache ŵakwe ŵaŵisile kuti akamuleje masengo gakulolela majumba gakusunjila yindu.
16 Kalotalota jwa geti ja mbali jakungapililolyuŵa jwamgwilile Supimu ni Hosa. Geti jeleji jaliji mwakuŵandikana ni geti ja Saleketi, jajaliji mwakuŵandikana ni msewu wakwawula kwitumbi. Alonda ŵa mu gulu jeleji, ŵane ŵajimaga mbali jine, soni ŵane mbali jine.
17 Ku geti ja mbali jakungopokolyuŵa kwajimaga Alefi 6 lisiku lililyose. Ku geti ja mbali jakumpoto kwajimaga Alefi mcheche lisiku lililyose, soni ku geti jakummwela kwajimaga Alefi mcheche lisiku lililyose. Nambosoni m’majumba gakusunjila yindu mwajimaga Alefi, ŵaŵili mbali jimo soni ŵaŵili mbali jineji.
18 Pakwamba ya lipenu lya kungapililolyuŵa, mwakupita ŵandu mwajimaga Alefi mcheche soni mwipenu mwajimaga Alefi ŵaŵili.
19 Gelega ni magulu ga alonda ŵa pageti ŵakutyochela mwa ŵanache ŵa Kola soni mwa ŵanache ŵa Melali.
20 Kutyochela pasikati pa Alefi, Ahiya ŵalolelaga yipinda yakusunjila yipanje ya panyumba ja Mlungu jwakuwona soni yipinda yakusunjila yindu yayiswejesye kuŵa yeswela.*
21 Papali ŵanache ŵachalume ŵa Ladani, yayaliji yisukulu ya Gelisoni kupitila mwa Ladani. Jemanjaji ŵaliji ŵakulongolela m’maŵasa gakumanyika ni mena ga achinangolo ŵawo gakutyochela mwa Ladani, jwakutyochela mwa Gelisoni. Ŵanache ŵeleŵa ŵaliji Yehiyeli,
22 soni ŵanache ŵa Yehiyelijo, ŵaliji Setamu ni Yoweli mchimwenegwe. Jemanjaji ŵalolelaga yipinda yakusunjila yipanje ya pa nyumba ja Yehofa.
23 Kutyochela pasikati pa ŵanache ŵa Amulamu, ŵanache ŵa Isala, ŵanache ŵa Hebuloni, soni ŵanache ŵa Usiyele,
24 Sebuyele mwanache jwa Gelisomu ni juŵalolelaga nyumba syakusunjila yindu. Sebuyeleju ŵaliji chisukulu cha Mose.
25 Kutyochela pasikati pa achalongo achimjakwe ŵa Sebuyele, ŵali ŵakutyochela mwa Eliyesa ŵaliji aŵa: Eliyesa ŵaŵeleche Lehabiya, Lehabiya ŵaŵeleche Yesayiya, Yesayiya ŵaŵeleche Yolamu, Yolamu ŵaŵeleche Sikili, soni Sikili ŵaŵeleche Selomoti.
26 Selomoti jweleju pampepe ni achalongo achimjakwe ŵalolelaga yipinda yosope yakusunjila yindu yayiswejesye kuŵa yeswela. Ŵaŵayiswejesye yindu yeleyi kuti yiŵe yeswela ŵaliji Mwenye Daudi pampepe ni ŵakulongolela m’maŵasa gakumanyika ni mena ga achinangolo ŵawo. Nombenawo achakulungwa ŵakulongolela ŵandu masausande soni ŵakulongolela ŵandu mahandede, nambosoni achakulungwakulungwa ŵa asilikali ŵayiswejesye nawo.
27 Yindu yaŵayipatile kungondo, ŵayiswejesye jemanjaji kuti ayikamulichisye masengo panyumba ja Yehofa.
28 Nambosoni yindu yosope yaŵayiswejesye kala Samuyele jwakumanyilila yamsogolo, Sauli mwanache jwa Kisi, Abineli mwanache jwa Neli, soni Yowabu mwanache jwa Seluya ŵayilolelaga Selomiti pampepe ni achalongo achimjakwe. Chindu chilichose chachiswejesye mundu kuti chiŵe cheswela ŵachilolelaga jemanjaji.
29 Kutyochela mwa Isala, papali Kenaniya soni ŵanache ŵakwe ŵachalume. Ŵanacheŵa ŵaŵisile kuti aŵe ŵakulolela soni ŵakwelusya pasikati pa Ayisalayeli. Jemanjaji ŵakamulaga masengo gawo kusa kwa nyumba ja Mlungu.
30 Kutyochela mwa Hebuloni, papali Hasabiya pampepe ni achalongo achimjakwe ŵakwana 1,700 ŵaŵaliji achalume ŵakudalilichika. Jemanjaji ŵalolelaga kajende ka yindu yakwayana ni masengo gosope gakumtumichila Yehofa soni mwenye mu Isalayeli. Ŵatendaga yeleyi mu dela jakungapililolyuŵa kwa Yolodani.
31 Pasikati pa ŵanache ŵa Hebuloni, Yeliya ni juŵaliji jwakulongolela pakujigalila msela wakupagwila wa liŵasa lyakumanyika ni lina lya nangolo jwawo. M’chaka cha 40 Daudi ali mkulamulila mpela mwenye, ŵawungunyisye achalume ŵamachili soni ŵakudalilichika pasikati pa ŵanache ŵa Hebuloni mwamti ŵapatile achalume ŵeleŵa ku Yaseli m’chilambo cha Giliyadi.
32 Pasikati pa achalongo achimjakwe ŵa Yeliya papali achalume ŵakudalilichika ŵakwana 2,700. Jemanjaji ŵaliji ŵakulongolela m’maŵasa gakumanyika ni mena ga achinangolo ŵawo. Myoyo Mwenye Daudi ŵaŵisile jemanjaji kuti aŵe ŵakulolela pa masengo galigose gakwayana ni Mlungu jwakuwona soni mwenye pasikati pa mbumba* ja Lubeni, mbumba ja Gadi, soni hafu ja mbumba ja Manase.
Maloŵe Gamwiŵanda
^ Ŵane akusati “mayele.”
^ Kapena kuti, “yindu yayipelechedwe kwa Mlungu.”
^ Alole Kugopolela kwa Maloŵe Gane.
