Buku Jandanda ja Samuyele 29:1-11
-
Afilisiti ngakumkulupilila Daudi (1-11)
29 Afilisiti ŵagasongangenye magulu gawo ga ngondo ku Afeki, pele Ayisalayeli ŵakunjile matenti gawo chiŵandika lusulo ku Yeseleeli.
2 Ŵakulamulila ŵa Afilisiti ŵaliji ali mkupita yimpepe ni magulu gawo ga asilikali 100 soni magulu ga asilikali 1,000. Nombenajo Daudi ni achalume ŵakwe ŵaliji ali mkwika kunyuma kwa magulu ga asilikaliŵa yimpepe ni Akisi.
3 Nambo achimlongola ŵa Afilisiti ŵamwusisye Akisi kuti, “Ana Ahebeliŵa akusaka chichi akuno?” Pelepo Akisi ŵajanjile achimlongola ŵa Afilisitiwo kuti, “Jwelejutu ali Daudi jwakutumichila jwa Mwenye Sauli jwa ku Isalayeli, jwaŵele ali mkutama ni une kwakupunda chaka chimo. Une nganinachiwona chakulemwa chilichose mwa jwalakwe kutandila palisiku lyaŵatisile ni kwika kwa une mpaka lelo.”
4 Nambo achimlongola ŵa Afilisiti ŵamtumbilile jwalakwe soni ŵamsalile kuti, “Mumsalile mundu jweleju kuti awujile. Jwalakwe akusosekwa awujileje kumalo gamwampele kuti atameje. Mkamkunda kuti jwalakwe ajawule ni m’weji kungondo, kogopela kuti mpaka atugalawuchile ni kutujimuchila ngondojo jili mkati. Pangali chindu chambone mnope chele jwalakwe mpaka atende ni chakulinga chakuti ŵasangalasye ambuje ŵakwe chakupunda kupeleka kwa ambuje ŵakwewo mitwe ja achalume ŵetu.
5 Ana jweleju ngaŵa ali Daudi jwele ŵandu ŵamjimbilaga jula kwineku ali mkuŵina ni kuŵechetaga kuti,
‘Sauli awuleje masausande gakwe ga adani,Soni Daudi awuleje masausande gakwe gangaŵalanjika’?”
6 Pelepo Akisi ŵamŵilasile Daudi ni ŵamsalile jwalakwejo kuti, “Nditu ngulumbila pameso pa Yehofa Mlungu jwaumi, mmwejo mli ŵagoloka soni ngasangalele kuti mmwejo mjawule kungondo yimpepe ni asilikali ŵanguŵa, pakuŵa une nganisimana chakulemwa chilichose mwa mmwejo kutandila palisiku lya mwayiche kwa une mpaka lelo. Nambo ŵakulamulila achimjangu ngakumkulupilila mmwejo.
7 Myoyo wujilani mwamtendele soni mkatenda chilichose chakwatumbilikasya ŵakulamulila ŵa Afilisitiwo.
8 Nambo Daudi ŵamwusisye Akisijo kuti, “Ligongo chichi, ana une ndemwisye chichi? Ana wawojo asimene chakusawusya chamtuli mwa jwakutumichila jwawo kutyochela palisiku lyanayiche kwa wawojo mpaka lelo? Ligongo chichi ngangusosekwa kwawula ni jemanja kukumenyana ni adani ŵa ambuje ŵangu mwenye?”
9 Pelepo Akisi ŵamjanjile Daudijo kuti, “Une kumbali jangu nayiweni kuti mmwejo mli mundu jwambone mpela lilayika lya Mlungu. Nambo achimlongola ŵa Afilisiti aŵechete kuti, ‘Mkamkunda kuti jwalakwe ajawule ni m’weji kungondo.’
10 Sambano mmwejo mjimuche kundaŵindaŵipe pampepe ni ŵakutumichila ŵa ambuje ŵenu ŵamwayiche nawo, mjimuche ni kunyakuka kundaŵindaŵipeko kusa pachikugambe kulangukapo.”
11 Myoyo Daudi pampepe ni achalume ŵakwe ŵajimwiche kundaŵindaŵipe ni kuwujila kuchilambo cha Afilisiti. Nambo Afilisitiwo ŵapite ku Yeseleeli.
