Chikalata Chaŵili Chakwawula kwa Akolinto 5:1-21
5 Tukumanyilila kuti naga nyumba* jetu japachilamboji, jajili mpela chitentiji jikugwa,* tuchikola nyumba jine jakutyochela kwa Mlungu. Jichiŵa nyumba jangataŵa ni makono soni jichitama mpaka kalakala kwinani.
2 Pakuŵa patuli m’nyumba ajino tukuwuwula, soni tukusachilila kuwala nyumba jetu jakwinani,*
3 ni chakulinga chakuti patuchiwala nyumba jelejo, tukasimanikwa tuli makonope.
4 M’weji ŵatuli mu chitenti achino tukuwuwula ligongo lya kusitopelwa. Ngaŵa kuti tukusaka kuwula chitenti achino iyayi, nambo kusyesyene tukusaka kuwala chinecho, ni chakulinga chakuti umi ujinjile mmalo mwa chakuwachi.
5 Sambano jwele juŵatulinganyichisye yindu yeleyi ali Mlungu. Jwalakwe ŵatupele msimu kuti uŵe mpela chikole* chakutusimichisya kuti tuchipochela yindu yayikwika.
6 Myoyo, ndaŵi syosope tukusaŵa ŵakulimba mtima soni tukusamanyilila kuti patuli mu chilu chetuchi, tuli kwakutalikangana ni Ambuje.
7 Tukumanyilila yeleyi ligongo lyakuti tukwenda mwachikulupi, ngaŵaga mwa yindu yakuwoneka ni meso.
8 Nambo tuli ŵakulimba mtima soni tukanonyele kutyoka mu chilu achino kuti tukatame ni Ambuje.
9 Myoyo, chinga tukutama pampepe ni jwalakwejo kapena tuli kwakutalikangana ni jwalakwe, nambo chakulinga chetu chili chakuti tuŵe ŵakuŵajilwa pameso pakwe.
10 Pakuŵa wosopewe tuchisosekwa kuwonechela pasogolo pa mpando wakulamula wa Klistu, ni chakulinga chakuti jwalijose apochele malipilo gakwe mwakamulana ni yindu yiŵatesile ali mu chilu, chinga yambone kapena yakusakala.
11 Myoyo, pakuŵa tukusamanyilila kwajogopa Ambuje, tukupitilisya kwakopa ŵandu, soni Mlungu akutumanyilila chenene. Nambope tukukulupilila kuti jemanjasoni mkutumanyilila chenene m’mitima jenu.
12 M’weji ngatukulimanyikasya kanesoni kwa jemanja, nambo tukumpa jemanja magongo gakuti mlilapilileje ligongo lya m’weji. Tukutenda yeleyi kuti jemanja mkombole kwajanga ŵele ŵakusalilapilila ligongo lya kawoneche kakusape ngaŵaga ligongo lya yindu yayili mumtima.
13 Naga ŵandu ŵatuwonaga mpela ŵamasoka, yaliji myoyo ligongo lya Mlungu. Naga tuli ŵakuganisya chenene, yili myoyo ligongo lya jemanja.
14 Chinonyelo chakwete Klistu chikusatulimbikasya, pakuŵa tusimichisye kuti mundu jumo ŵawilile wosope ligongo wosopewo ŵaliji ali awile kala.
15 Jwalakwe ŵawilile wosope ni chakulinga chakuti ŵele ŵali ni umi akatamaga umi wakulisangalasya achimsyene, nambo atameje umi wakumsangalasya jwele juŵawilile ni kwimuka.
16 Myoyo kutandila apano ngatukumwonasoni mundu jwalijose pakujigalila mwakusawonechela kusa. Atamose kuti pandanda twamwonaga Klistu pakujigalila mwaŵawonechelaga kusa, nambo apano twalesile kumwona myoyo.
17 Myoyo, naga mundu ali jwakamulana ni Klistu, jwelejo ali chakupanganyidwa chasambano. Yindu yakalayo yipite, mwamti yindu yasambano yiyiche.
18 Nambo yindu yosope yili yakutyochela kwa Mlungu, juŵatukamulenye ni msyenejo kupitila mwa Klistu, soni ŵatupele utumiki wakwajilanya ŵandu ni jwalakwe.
19 Utumiki wakwe uli wakuti, kupitila mwa Klistu, Mlungu akwajilanya ŵandu* ni msyenejo soni ngakwajimba magambo ligongo lya yakulemwa yawo. Jwalakwe atupele masengo gakwasalila ŵandu kuti Mlungujo akusaka kwilana ni ŵandu.
20 Myoyo, m’weji tuli ŵakwimila Klistu.* Yili mpela kuti Mlungu akwachondelela ŵandu kupitila mwa m’weji. Mpela ŵakumjimila Klistu, tukumŵenda jemanja kuti, “Mjilanesoni ni Mlungu.”
21 Mundu jwele jwanganalemwajo, Mlungu ŵampeleche kuŵa mbopesi jakusiŵa ulemwa wetu. Ŵatesile yeleyi kuti m’weji tuŵe ŵakulungama pameso pa Mlungu kupitila mwa jwalakwejo.
Maloŵe Gamwiŵanda
^ Maloŵe gakuti “nyumba” gakwimila chilu.
^ Kapena kuti, “jikumala.”
^ Kapena kuti, “malo getu gakutama kwinani.”
^ Ŵane akusati “chipindisyo.”
^ Maloŵe gakwe gandanda, “akuchijilanya chilambo.”
^ Kapena kuti, “achikasembe ŵakumjimila Klistu.”
