Chikalata Chaŵili Chakwawula kwa Atesalonika 1:1-12
1 Une Paulo pampepe ni Silifano* soni Timoteyo, nguwulembela mpingo wa ku Tesalonika wawuli wakamulana ni Mlungu Atati ŵetu pampepe ni Ambuje Yesu Klistu.
2 Umbone mtima wekulungwa soni mtendele wakutyochela kwa Mlungu Atati ŵetu pampepe ni Ambuje Yesu Klistu yiŵe ni jemanja.
3 M’weji tukwenela kumyamichila Mlungu ndaŵi syosope ligongo lya jemanja achalongo achimjetu. Sonitu yeleyi yili yakuŵajilwa ligongo chikulupi chenu chikukula mnope nambosoni jwalijose jwa jemanja akumnonyela mnope mjakwe.
4 Ni ligongo lyakwe m’weji tukusamnyadila jemanja pasikati pa mipingo ja Mlungu. Tukusajisalila mipingojo kuti atamose kuti ŵandu akumlagasya jemanja soni mkusimana ni yakusawusya,* nambo mkupilila soni mkupitilisya kuŵa ŵakulupichika kwa Mlungu.
5 Yosopeyitu yili umboni wakuti Mlungu akusawelusya mwachilungamo. Yeleyi yikutendekasya kuti jemanja mŵe ŵakuŵajilwa kupochela Uchimwene wa Mlungu wele wamkuwulajilila.
6 Kuwelusya kwa Mlunguku kuli kwakuŵajilwa ligongo jwalakwe chachapa chilango* ŵandu ŵakumlagasya jemanja.
7 Nambo kwa jemanja ŵele ŵandu akumlagasya, Mlungu chachimpumusya pampepe ni m’weji pandaŵi jele Ambuje Yesu chachiwonechela kutyochela kwinani pampepe ni malayika gakwe gamachili.
8 Jwalakwe chachiwonechela m’moto wakolela kuti ŵape chilango ŵandu ŵangammanyilila Mlungu soni ŵaŵakanile kupikanila ngani syambone syakwamba Ambuje ŵetu Yesu.
9 Ŵandu ŵeleŵa chachawelusya ni kwajonanga mwamti ngasawonekasoni pameso pa Ambuje mpaka kalakala soni ngasawuwona uchimbichimbi wa machili ga Ambujewo.
10 Yeleyi yichitendekwa pandaŵi jachachiyika Ambuje kuti achimbichikwe pampepe ni ŵaswela* ŵawo wosope. Palisikulyo wosope ŵaŵamkulupililaga chachimlolechesya ni kumwona kuti ali jwakusimonjesya soni jemanja chimchiŵa nawo yimpepe ligongo lyakuti mwakulupilile yitwamsalile.
11 Paligongo lyeleli, m’weji tukusampopelela ndaŵi syosope kuti Mlungu jwetu amwone jemanja kuŵa ŵakuŵajilwa kumpa umi wele ŵamŵilanjile. Tukuŵendasoni kuti jwalakwejo amalisye kutenda yambone yosope yakusaka kuyitenda ni machili gakwe nambosoni kuti atendekasye yosope yamkutenda ligongo lya chikulupi chenu kuŵa yakamuchisya.
12 Tukutenda yeleyi ni chakulinga chakuti lina lya Ambuje ŵetu Yesu lichimbichikwe kupitila mwa jemanja soni kuti jemanja mchimbichikwe ligongo mli ŵakamulana ni jwalakwejo. Uchimbichimbi welewu ukwika ligongo lya umbone mtima wekulungwa wa Mlungu jwetu soni wa Ambuje Yesu Klistu.
Maloŵe Gamwiŵanda
^ Jwakolanjidwasoni kuti Sila.
^ Kapena kuti, “yipwetesi.”
^ Ŵane akusati “chamuko.”
^ Alole Kugopolela kwa Maloŵe Gane.
