Buku Jaŵili ja Ayimwene 20:1-21
20 M’masiku gelego, Hesekiya jwalwasile mnope mwamti jwasigele panandi kuwa. Sambano jwakulochesya Yesaya mwanache jwa Amosi ŵayiche kwa jwalakwe ni kumsalila kuti, “Yehofa aŵechete kuti, ‘Mwasalile ŵandu ŵa m’liŵasa lyenu yindu yakusosekwa kutenda, pakuŵa mmwejo chim’we ligongo ngamlama ulwele wenuwo.’”
2 Paŵapikene yeleyi Hesekiya ŵagalawuchile kwipupa ni kutanda kupopela kwa Yehofa kuti,
3 “Ngwaŵenda wawo Yehofa, chonde akumbuchile kuti une njesile pameso pawo mwakulupichika soni ni mtima wangu wosope. Sonitu une ndesile yindu yayili yambone pameso pawo.” Pelepo Hesekiya jwatandite kulila mnope.
4 Sambano Yesaya mkanamalisye kupita paluŵala lwapasikati lwa ku nyumba ja mwenye, Yehofa ŵamsalile jwalakwejo kuti,
5 “Mwujile ni mkamsalile Hesekiya jwali mlongola jwa ŵandu ŵangu kuti, ‘Yehofa Mlungu jwa Daudi nangolo jwenu aŵechete kuti, “Une mbikene lipopelo lyenu, soni najiweni misosi jenu. Sambano chinamposye mmwejo. Pachigamaleje masiku gatatu mmwejo chimchijawula ku nyumba ja Yehofa.
6 Chinamjonjechesye yaka yakwana 15 yakuti mtame ni umi. Une chinamkulupusye mmwejo soni chinawukulupusye msinda welewu mmyala mwa mwenye jwa ku Asiliya. Nambosoni une chinawuchenjele msinda welewu ligongo lya lina lyangu soni ligongo lya Daudi jwakutumichila jwangu.”’”
7 Kaneko Yesaya ni jwatite, “Ayiche najo keke jwa yisogosi ya nguju yejumu.” Myoyo ŵandu ŵayiche najo ni kujitaga pachakuyimbacho, mwamti jwalakwe jwatandite kulama mwapanandipanandi.
8 Sambano Hesekiya ŵamwusisye Yesayajo kuti, “Ana chimanyisyo chakulosya kuti Yehofa chambosye une, soni kuti palisiku lyatatu chinjijawula ku nyumba ja Yehofa, tichiŵe chichi?”
9 Pelepo Yesayajo ŵajanjile kuti, “Chimanyisyo chapeleche Yehofa chakulosya kuti Yehofajo chatende yaŵecheteyi chili chakuti: Ana mkusaka kuti m’bulili wawukusaŵa pa masitepe* ujawule msogolo masitepe gakwana 10, kapena uwujile munyuma masitepe gakwana 10?”
10 Pelepo Hesekiyajo ni ŵajanjile kuti, “Yili yangasawusya kuti m’bulili ujawule jika msogolo masitepe gakwana 10. Nambo kuti m’buliliwo uwujile munyuma masitepe gakwana 10 yeleyo yili yakusawusya.”
11 Myoyo jwakulochesya Yesaya jwaŵendile mwakugumila kwa Yehofa, mwamti jwalakwe jwatendekasisye kuti m’bulili wawukusaŵa pamasitepe ga nyumba ja Ahasi uwujile munyuma ni masitepe gakwana 10. Yeleyi yaliji myoyo atamose kuti m’buliliwu waliji uli utulwiche kala pamasitepego.
12 Pandaŵi jeleji mwenye jwa ku Babulo lina lyakwe Belodaki-baladani mwanache jwa Baladani ŵatumisye yikalata soni mtuka kwa Hesekiya. Jwalakwe jwatesile yeleyi ligongo ŵapikene kuti Hesekiya jwaliji mkulwala.
13 Hesekiya jwapochele chenene* ŵanduwo mwamti jwalosisye jemanjajo yindu yosope yayaliji m’nyumba jakusunjila chipanje. Jwalakwe ŵalosisye silifa, golide, mawuta gabasamu, soni mawuta gane gamtengo wapenani mnope yida yakwe yangondo soni chilichose chachaliji mwakusunjila yipanje yakwe. Pangali chindu chilichose atamose chimo cha m’nyumba jakwe* kapena cha mu ulamusi wakwe chele Hesekiya nganiŵalosya jemanjajo.
14 Panyuma pakwe jwakulochesya Yesaya ŵayiche kwa Mwenye Hesekiya ni kumwusya kuti, “Ana ŵandu ŵeleŵa atiteje uli, soni atyochela kwapi?” Myoyo Hesekiya ŵajanjile kuti, “Jemanjaji atyochele ku chilambo chakwakutalika mnope, ku Babulo.”
15 Kaneko Yesaya ni ŵamwusisye jwalakwejo kuti, “Ana jemanjajo ayiweni yindu yapi m’nyumba jenu?” Hesekiyajo ni ŵajanjile kuti, “Ayiweni yindu yosope yayili m’nyumba jangu.* Pangali chindu atamose chimpepe chachili mwakusunjila yipanje yangu chele nganinalosya jemanjajo.”
16 Pelepo Yesaya ŵamsalile Hesekiya kuti, “Sambano mpikane maloŵe gaŵechete Yehofa,
17 ‘Mpikane, Masiku gakwika gele yindu yosope yayili m’nyumba jenu soni yosope yele achinangolo ŵenu ŵayisunjile mpaka kwikaga palisiku lya lelo yichijigalidwa ni kwawula nayo ku Babulo. Pangali ata chimo chachichisigala.’ Yeleyi ni yaŵechete Yehofa.
18 ‘Nambosoni ŵane mwa ŵanache ŵenu ŵele mmwejo timchiŵeleka tachijigalidwa, mwamti jemanjajo chachiŵa nduna sya ku nyumba ja mwenye jwa ku Babulo.’”
19 Pelepo Hesekiya ŵamjanjile Yesayajo kuti, “Maloŵe ga Yehofa gaŵechete wawojogo gali chenene kwabasi. Ni jwaŵechetesoni kuti, “Chiyiŵe chenene kwabasi naga chipaŵe bata soni mtendele pandaŵi jandili umiji.”
20 Mbili jine ja Hesekiya, yindu yamachili yosope yajwatesile, soni yaŵatite pakupanganya litanda soni ngalande ni kwinjisya mesi mumsinda, ŵayilembile m’buku ja mbili ja mundaŵi ja achayimwene ŵa ku Yuda.
21 Kaneko Hesekiya ŵawile mpela mwayaŵelele ni achinangolo ŵakwe, mwamti mwanache jwakwe, lina lyakwe Manase, jwaŵele mwenye mmalo mwa jwalakwe.
Maloŵe Gamwiŵanda
^ Komboleka kuti masitepe gelega ŵagakamulichisyaga masengo pakusaka kumanyilila ndaŵi.
^ Kapena kuti “ŵapikanile jemanjajo.”
^ Kapena kuti “nyumba jaumwenye.”
^ Kapena kuti “nyumba jaumwenye.”
