Buku Jaŵili ja Mbili 9:1-31
9 Sambano mwenye jwamkongwe jwa ku Seba ŵapikene yakwamba mbili ja Solomo. Myoyo jwalakwe ŵayiche ku Yelusalemu kuti amlinje Solomo ni yiwusyo yakusawusya.* Jwalakwe ŵayiche pampepe ni gulu jekulungwa ja ŵamasengo ŵakwe ali ajigele ngamila syasyanyakwile mawuta ga basamu, golide jwamjinji mnope soni maganga gane ga mtengo wapenani gejinji. Jwalakwe ŵayiche kwa Solomo ni kuŵechetana najo yosope yayaliji mumtima mwakwe.
2 Solomo ŵamjanjile jwalakwejo yiwusyo yakwe yosope, mwamti pangali chaŵalepele* kumlondechesya jwalakwejo.
3 Mwenye jwamkongwe jwa ku Sebajo ŵayiweni yaŵatite Solomo pakulosya lunda soni mwajaŵelele nyumba jaŵataŵile jwalakwejo.
4 Ŵayiwenisoni mwayaŵelele yakulya ya patebulo jakwe, yaŵatiga pakutama ŵakutumichila ŵakwe pandaŵi jakulya, soni yaŵatendaga ŵakupelechela yakulya patebulo soni kawale kawo. Ŵayiwenisoni yaŵatendaga ŵakupelechela yakumwa soni kawale kawo, nambosoni mbopesi syakutinisya syaŵasipelekaga ndaŵi syosope panyumba ja Yehofa. Mwenye jwamkongwejo paŵayiweni yosopeyi nganakola chiyao chilichose.
5 Myoyo jwalakwe ŵasalile Mwenye Solomo kuti, “Yosope yanapikene ndili ku chilambo chakumangwetu yakwamba yindu yakombwele kutenda wawojo* soni pakwamba ya lunda lwawo yili yisyene.
6 Nambotu une nganingulupililaga yanapikeneyo mpaka pambiche akunopa ni kulilolela jika ni meso gangu. Apano nayiweni kuti yanapikeneyo yaliji yamnono mnope mwamti atamose hafu ja lunda lwawo nganiyikwana. Yindu yanayiweni yipundile yindu yosope yanapikene.
7 Ŵana upile ŵandu ŵawo soni ŵana upile ŵakutumichila ŵawo ŵakusajima pameso pawo ndaŵi syosope ni kupikanilaga lunda lwawo.
8 Achimbichikwe Yehofa Mlungu jwawo juŵanonyele wawojo ni kwaŵika pampando wakwe waumwenye kuti alamulileje mmalo mwa Yehofa Mlungu jwawojo. Jwalakwe ŵasagwile wawojo kuŵa mwenye ni chakulinga chakuti ŵalamulileje ŵanduŵa chenene ni kutendaga yindu yachilungamo. Mlungujo ŵatesile yeleyi ligongo lyakuti akusiŵanonyela Ayisalayeli soni akusasaka kuti jemanjajo atameje mpaka kalakala.”
9 Kaneko mwenye jwamkongwejo ŵampele Mwenye Solomo golide jwakusitopa matalente* gakwana 120, mawuta gejinji ga basamu soni maganga ga mtengo wapenani. Mwenye jwamkongwe jwa ku Sebajo ŵampele Mwenye Solomo mawuta ga basamu gejinji, mwamti pangalisoni ndaŵi jagayiche mawuta gejinji mpela gelega.
10 Konjechesya pelepa, ŵakutumichila ŵa Hilamu soni ŵakutumichila ŵa Solomo ŵaŵayikaga ni golide kutyochela ku Ofili, ŵayikagasoni ni matabwa ga yitela ya aligamu soni maganga ga mtengo wapenani mnope.
11 Pakamulichisya masengo matabwa ga aligamuga, mwenyewo ŵapanganyisye masitepe ga nyumba ja Yehofa soni masitepe ga nyumba ja mwenye. Ŵapanganyisyesoni yakwimbila ya ngonji yakulekanganalekangana kuti ayikamulichisyeje masengo ŵandu ŵakwimba. Yindu mpela yeleyi yaliji yakuti nganiyiwonecheje chitandilile m’chilambo cha Yuda.
12 Mwenye Solomo ŵampele mwenye jwamkongwe jwa ku Seba chindu chilichose chaŵachikumbisile soni chilichose chaŵaŵendile. Yindu yaŵampeleyo yaliji yejinji mnope kulekangana ni yaŵayiche nayo kwa mwenyejo. Panyuma pakwe mwenye jwamkongwejo jwawujile ku chilambo cha kumangwakwe pampepe ni ŵakutumichila ŵakwe.
13 Golide jujwayikaga kwa Solomo chaka chilichose jwaŵaga jwakusitopa matalente gakwana 666.
14 Golide jweleju ngakupwatika golide jujwayikaga ni ŵamalonda ŵakwendajenda, soni ŵamalonda ŵane. Ngakupwatikasoni golide ni silifa jujwayikaga ni mamwenye gosope ga ku Alebiya soni nduna sya m’chilambocho.
15 Mwenye Solomo ŵapanganyisye yakuchijila yekulungwakulungwa ya golide jwam’wanganye ni yisyano yine. Yakuchijilayi yapali 200. Chakuchijila chilichose ŵachipanganyisye ni golide jwakusitopa masekeli* gakwana 600.
16 Ŵapanganyisyesoni yakuchijila 300 yamwanamwana ya golide jwam’wanganye ni yisyano yine. Chakuchijila chamwana chilichose ŵachipanganyisye ni golide jwakusitopa mamina* gatatu. Kaneko mwenyewo ŵayiŵisile yakuchijilayi mu Nyumba ja Ngalango ja Lebanoni.
17 Mwenyewo ŵapanganyisyesoni mpando wekulungwa waumwenye wa misengo ja ndembo ni kuwupakasya golide jwambone mnope.
18 Papali masitepe 6 gakwelela ku mpandowo, soni papali chakupondapo sajo cha golide chaŵachilumbikenye ku mpandowo. Mbali syosope sya mpandowo syakwete mwakusajika makono. Nambosoni mumbali mwa yakusajichila makonoyo ŵajimiche yiwanichisyo ya masimba yiŵili, chine mbali jimo soni chine mbali jineji.
19 Papalisoni yiwanichisyo ya masimba yakwana 12 yaŵayijimiche pa masitepe 6 gala. Pasitepe jilijose paŵaga masimba gaŵili, line mbali aji line mbali jineji. Pangali umwenye wine uliwose wawakwete mpando mpela welewu.
20 Makapu gosope gaŵamwelaga Mwenye Solomo galiji ga golide soni yiwiya* yosope ya ku Nyumba ja Ngalango ja Lebanoni yaliji ya golide jwambone mnope. Pangali chiwiya chakwe chilichose chaŵapanganyisye ni silifa, pakuŵa m’masiku ga Solomo silifa jwawonekaga kuŵa jwangasosekwa.
21 Yaliji myoyo ligongo lyakuti masitima ga mwenyewo gajawulaga ku Talisi. Ŵaŵajendesyaga masitimaga ŵaliji ŵakutumichila ŵa Hilamu. Kamo pa yaka yitatu yiliyose, masitima ga ku Talisiga gayikaga gali ganyakwile golide, silifa, misengo ja ndembo, majani soni yijuni yakolanjidwa kuti pikoko.
22 Mwenye Solomo ŵakwete chipanje chejinji soni lunda kupunda mamwenye gane gosope ga pachilambo chapasi.
23 Myoyo, mamwenye gosope ga pachilambo chapasi gasosagasosaga upile wakusimana ni* Solomo kuti apikane lunda lwakwe lwaŵaŵisile Mlungu mumtima mwakwe.
24 Mamwenyega pagayikaga, gajigalaga mituka mpela yindu ya silifa, yindu ya golide, yakuwala, yida ya ngondo, mawuta ga basamu, mahachi soni abulu. Jemanjajo ŵatendaga yeleyi chaka chilichose.
25 Solomo ŵakwete malo 4,000 gakusunjila mahachi ni magaleta* gakwe, soni ŵakwete mahachi gakwana 12,000.* Solomo ŵayisunjile yindu yeleyi chiŵandika ni jwalakwe ku Yelusalemu m’misinda jakusunjila magaleta.
26 Solomo ŵagalamulilaga mamwenye gosope kutyochela ku Lusulo* mpaka ku chilambo cha Afilisiti, soni mpaka kuja kwika kuŵatesile malile ni chilambo cha Iguputo.
27 Mwenyewo ŵatendekasisye kuti ku Yelusalemu kusimanikweje silifa jwamjinji mpela maganga wamba. Ŵatendekasisyesoni kuti matabwa ga mkungusa gaŵeje gejinji mpela yitela yamkuju ya ku Sefela.
28 Ŵandu ŵayikaga ni mahachi kwa Solomo kutyochela ku Iguputo soni ku yilambo yine yosope.
29 Pakwamba ya mbili jine ja Solomo, yaŵatesile kundanda mpaka pambesi, yalembedwe m’buku jaŵalembile jwakulochesya Natani soni mu yakulochesya ya Ahiya jwa ku Silo. Yalembedwesoni m’buku jaŵalembile Ido jwakulola yamsogolo juŵapochele utenga kwa Mlungu wakwamba Yelobowamu mwanache jwa Nebati.
30 Solomo ŵalamulile Ayisalayeli wosope ku Yelusalemu kwa yaka 40.
31 Pambesi pakwe Solomo ŵawile mpela muyaŵelele ni achinangolo ŵakwe. Kaneko ŵamsichile m’malembe mu Msinda wa Daudi babagwe. Panyuma pakwe Lehobowamu juŵaliji mwanache jwakwe ŵaŵele mwenye mmalo mwa jwalakwejo.
Maloŵe Gamwiŵanda
^ Kapena kuti, “ni ndagi.”
^ Mu Chihebeli ŵatiga, “pangali chachaliji chakusisika.”
^ Kapena kuti, “yakwamba maloŵe gawo.”
^ Talente jimo jaŵaga jakusitopa makilogalamu 34.2. Alole Yakumbesi B14.
^ Sekeli jimo jaŵaga jakusitopa magalamu 11.4. Alole Yakumbesi B14.
^ Mina jakujikolanga mu Malemba ga Chihebeli jaŵaga jakusitopa magalamu 570. Alole Yakumbesi B14.
^ Ŵane akusati “yisuso.”
^ Mu Chihebeli ŵatiga, “ŵasosagasosaga ngope ja.”
^ Magaleta gali ngolo syakuwutidwa ni mahachi.
^ Kapena kuti, “achalume 12,000 ŵakwela pamahachi.”
^ Lwelelu luli Lusulo lwa Filate.
