Buku Jaŵili ja Samuyele 15:1-37
15 Panyuma pakuti yosopeyi yitendekwe, Abisalomu ŵalipanganyichisye ligaleta* soni jwapatile mahachi nambosoni achalume 50 ŵaŵawutukaga pasogolo pakwe.
2 Sambano Abisalomu ŵajimukaga kundaŵindaŵipe ni kuja kwima mumbali mwa msewu wawaliji ku geti ja msinda. Naga mundu akwete magambo galigose gakusosekwa kwawula nago kwa mwenye kuti akalamule, Abisalomujo ŵamŵilangaga mundujo ni kumwusya kuti, “Ana mmweji mkutyochela mu msinda wapi?” Ni mundujo ŵajangaga kuti, “Une jwakutumichila jwawo ngutyochela mu jimo mwa mbumba sya Isalayeli.”
3 Pelepo Abisalomujo ŵamsalilaga mundujo kuti, “Mpikane, magambo genugatu gali gakupikanika kwabasi, nambo yigambile kusawusya kuti mwenye nganakola mundu jwampaka apikanile magambo genuga.”
4 Kaneko Abisalomu ŵaŵechetaga kuti, “Yikaŵe kuti une asagwile kuŵa jwakulamula jwa chilambochi, ngalolechesyaga kuti mundu jwalijose jwakwete magambo kapena jwalijose jwakusosekwa kumlamula magambo gakwe ayicheje kwa une, mwamti une ngalolechesyaga kuti mundu jwelejo namtendele yindu mwachilungamo.”
5 Nambosoni yayatendekwaga yili yakuti mundu payiche chiŵandika jwalakwe kuti amtindiŵalile, Abisalomujo ŵamkamulaga mundujo mwachitemachitema kuti akatindiŵala pasi, kaneko ni ŵamkomasyaga mwachinonyelo.*
6 Abisalomu ŵatendaga yeleyi kwa Ayisalayeli wosope ŵaŵayikaga kwa mwenye kuti alamule magambo gawo. Myoyo Abisalomu ŵapitilisye kukopa* mitima ja ŵandu mu Isalayeli.
7 Payamalaga yaka mcheche* Abisalomu ŵasalile mwenyewo kuti, “Chonde angunde kuti njawule ku Hebuloni kuti ngatende yanalumbile kwa Yehofa.
8 Pakuŵa une jwakutumichila jwawo panatamaga ku Gesuli m’chilambo cha Siliya nalumbile kuti, ‘Naga Yehofa akungamuchisya une kuwujila ku Yelusalemu, chinjipeleka mbopesi kwa Yehofajo.’”
9 Pelepo mwenyewo ŵamsalile jwalakwejo kuti, “Jawulani mumtendele.” Ni maloŵe gelego jwalakwe ŵanyakwiche ni kwawulaga ku Hebuloni.
10 Sambano Abisalomu ŵatumisye ŵakusonda ku mbumba* syosope sya Isalayeli, soni ŵasalile kuti, “Pachimkagambe kupikana kulila kwa lipenga mkagumile kuti, ‘Sambano Abisalomu ali mwenye ku Hebuloni!’”
11 Sambano achalume ŵakwana 200 ŵakutyochela ku Yelusalemu ŵapite ku Hebuloniko yimpepe ni Abisalomu. Jemanjaji ŵaŵilanjidwe mwamti ŵapite kweleko ali ngakumanyilila chilichose chachikutendekwa.
12 Kaneko Abisalomu paŵapeleche mbopesi ŵatumile ŵandu kuti akamŵilanje Ahitofeli kutyochela ku msinda wa kumangwakwe ku Gilo. Ahitofelijo ni juŵaliji jwakumkamuchisya lunda Daudi. Gulu ja ŵandu ŵakumjimuchila mwenye jaŵele jamachili mnope soni ŵandu ŵaŵaliji kumbali ja Abisalomu ŵagambaga kutupilatupilape.
13 Kaneko mundu jwine ŵayiche kwa Daudi ni mkusalila kuti, “Ŵandu ŵa mu Isalayeli ali kumbali ja Abisalomu.”
14 Ndaŵi jijojo Daudi ŵasalile ŵakutumichila ŵakwe wosope ŵaŵaliji ni jwalakwejo ku Yelusalemu kuti, “Anyakuche, kwende tutile, ligongo m’weji nganituŵa tukombwele kukulupuka mmyala mwa Abisalomu. Atende chitema kogopela kuti jwalakwe mpaka ayiche mwachitema ni kutugomeka m’weji soni kuwujonanga msindawu ni upanga.”*
15 Ŵakutumichila ŵa mwenyewo ni ŵajanjile mwenyewo kuti, “Yiliyose yakusaka ambuje ŵetu mwenye, m’weji ŵakutumichila ŵawo tuli ŵakoseka kuyitenda.”
16 Myoyo mwenyewo ŵanyakwiche pampepe ni ŵandu wosope ŵa m’nyumba jawo. Nambo ŵalesile achiŵamkwakwe ŵapambali ŵakwana 10 kuti asamalileje nyumba.*
17 Mwenyewo ŵapitilisye ulendowo yimpepe ni ŵandu wosope ŵaŵakuyaga. Kaneko jemanjaji ŵajimi ku Beti-melehaki.
18 Ŵakutumichila wosope ŵa mwenye ŵaŵaliji nawo yimpepe soni Akeleti wosope, Apeleti, soni ŵandu ŵa ku Gati, pampepe ni achalume 600 ŵaŵamkuyaga jwalakwe* kutyochela ku Gati, ŵapitaga pameso pa mwenyewo soni mwenyewo ŵaliji mkwalola jemanjajo paŵapitaga.
19 Kaneko mwenyewo ŵamsalile Itayi jwa ku Gati kuti, “Ligongo chichi mmwejo mkwawula yimpepe ni m’weji? Mwujile mkatameje ni mwenye jwasambanojo, pakuŵa mmwejo mli mlendo soni mgambile kutila kwene kutyochela kumangwenu.
20 Mmwejo mgambile kwika kwene, ni une lelo namtendekasye mmwejo kwendajenda ni m’weji kuti mnyakucheje une pangunyakuka soni kwawula kulikose kwangwawula? Wujilani soni mwajigale achalongo achimjenu ŵamli nawoŵa. Nambosoni Yehofa amlosye mmwejo chinonyelo changamala soni kukulupichika kwakwe.”
21 Nambo Itayi ŵajanjile mwenyewo kuti, “Nditu ngulumbila pameso pa Yehofa Mlungu jwaumi soni pameso pa wawo ambuje ŵangu mwenye, kulikose kwachachijawula wawojo mwenye une chinjiŵa kukoko, chinga akuŵa umi atamose pachiwa, une jwakutumichila jwawo chinjiŵa ni wawojo.”
22 Pelepo Daudi ŵamsalile Itayijo kuti, “Chambone, jombokani.” Myoyo Itayi jwa ku Gatijo ŵajombweche pampepe ni achalume ŵakwe wosope soni maŵasa gawo.
23 Jwalijose m’chilambomo ŵalilaga mwakwesya maloŵe ŵandu wosope ŵaŵaliji ni Daudi paŵajombokaga, soni Mwenye Daudiwo ŵajimi chiŵandika Chitiŵi cha Kidiloni ŵandu wosopewo paŵajombokaga ni kwinjililaga ku msewu wakwawula ku chipululu.
24 Nombenajo Sadoki ŵaliji kukoko yimpepe ni Alefi wosope ali anyakwile libokosi lya chilanga lya Mlungu jwakuwona, soni jemanjajo ŵaliŵisile libokosi lya Mlungu jwakuwonalyo pasi. Abiyatala ŵalijisoni papopo ŵandu wosope paŵamalisyaga komboka kutyochela mumsindamo.
25 Nambo mwenyewo ŵamsalile Sadoki kuti, “Mjigale libokosi lya Mlungu jwakuwonalyo ni mwujile nalyo ku msinda. Naga Yehofa akusalalila mtima chachitenda yakuti une mbujile ni kungunda kuti ngalole libokosilyo soni malo galikutama.
26 Nambo naga jwalakwe akuŵecheta kuti, ‘Une ngangusangalala ni mmwejo,’ pelepo jwalakwe chachitenda kwa une yiliyose yakuyiwona kuti yili yambone.”
27 Kaneko mwenyewo ŵamsalile Sadoki juŵaliji jwakutaga mbopesi kuti, “Ana mmwejo ngati mli jwakulola yamsogolo? Mmwejo pampepe ni Abiyatala mwujile ku msinda mwamtendele, soni mumjigale mwanache jwenu Ahimasi ni Yonatani mwanache jwa Abiyatala.
28 Mpikane une chinjiŵa mkutama pamalo gakombochela gagali m’chipululu mpaka mmwejo pachimchindumichisya utenga wakusalila mwayiŵelele yindu.”
29 Myoyo Sadoki ni Abiyatala ŵajigele libokosi lya Mlungu jwakuwona lila ni kuwujila nalyo ku Yelusalemu, soni jemanjajo ŵatemi kukoko.
30 Daudi paŵakwelaga mu Litumbi lya Maolifi jwaliji ali mkulila soni ali aliwunichile mumtwe mwakwe. Nambosoni ŵajendaga ali nganawala sapato. Nombenawo ŵandu wosope ŵaŵaliji yimpepe ni jwalakwe ŵaliwunichile mumtwe soni jemanjaji ŵajendaga kwineku ali mkulila.
31 Kaneko ŵandu ŵamsalile Daudi kuti, “Ahitofeli ali yimpepe ni Abisalomu m’gulu ja ŵandu ŵakwimuchila.” Pelepo Daudi ŵatite, “Wawo Yehofa, atendekasye yakuŵecheta ya Ahitofeli kuti yiŵe yangali lunda.”
32 Daudi paŵayiche penani pa litumbi pele ŵandu ŵamtindiŵalilaga Mlungu, Husayi jwa mu mbumba ja Aliki ŵayiche kukusimana ni jwalakwe ali apapwile chakuwala chakwe soni mu mtwe mwakwe muli mwana mataka.
33 Nambo Daudi ŵamsalile jwalakwe kuti, “Naga mkwawula yimpepe ni une chimkaŵe katundu jwawusito kwa une.
34 Nambo naga mmwejo mkuwujila ku msinda ni kuja kumsalila Abisalomu kuti, ‘Wawo mwenye une ndili jwakutumichila jwawo. Naliji jwakutumichila jwa baba ŵawo nambo sambano ndili jwakutumichila jwawo.’ Pelepo ni kuti chimkangamuchisye kusokonasya mapulani ga Ahitofeli.
35 Ana Sadoki soni Abiyatala ŵakutaga mbopesi ngaŵa chakaŵe kweleko ni mmwejo? Mkasalileje jemanjaji chilichose chachimkapikaneje kutyochela ku nyumba ja mwenyewo.
36 Nambosonitu jemanjajo kweleko ali yimpepe ni ŵanache ŵawo ŵaŵili Ahimasi mwanache jwa Sadoki soni Yonatani mwanache jwa Abiyatala. Mkatumeje jemanjaji kuti asalileje une yiliyose yampikene.
37 Myoyo Husayi mjakwe jwa Daudijo ŵajinjile mu Yelusalemu Abisalomu paŵajinjilaga mu msindamo.
Maloŵe Gamwiŵanda
^ Ligaleta lili ngolo jakuwutidwa ni mahachi.
^ Kapena kuti “ŵampaga kisi.”
^ Mu Chihebeli ŵatiga, “kwiŵa.”
^ Kagopolele kanesoni, “yaka 40.”
^ Mundamo ja Ayuda msyenembumba ŵaŵaga mtati, mwakulekangana ni ndamo ja Ayawo jele msyenembumba akusaŵaga mjomba.
^ Upanga ukusawoneka mpela chipula chekulungwa chakutema kosekose.
^ Kapena kuti ”nyumba jaumwenye.”
^ Pelepa akwamba “Itayi” jwakumkolanga mu ndime 19.
