Buku Jaŵili ja Samuyele 3:1-39
3 Ngondo japasikati pa ŵandu ŵa m’nyumba ja Sauli ni ŵandu ŵa m’nyumba ja Daudi japitilisye. Daudi jwapitilisyepe kuŵa jwamachili nambo ŵandu ŵa m’nyumba ja Sauli machili gawo gagambaga kunandipilanandipilape.
2 Pandaŵiji, Daudi ŵaŵeleche ŵanache ŵachalume ali ku Hebuloni. Mwanache jwakwe jwandanda ŵaliji Aminoni jwele mamagwe ŵaliji Ahinowamu jwa ku Yeseleeli.
3 Mwanache jwakwe jwaŵili ŵaliji Kiliyabu jwele mamagwe ŵaliji Abigayeli ŵa ku Kalimeli ŵaŵaliji ŵamkwakwe Nabala mkanaŵe kuwa. Soni mwanache jwatatu ŵaliji Abisalomu jwele mamagwe ŵaliji Maaka mwanache jwa Talimai mwenye jwa ku Gesuli.
4 Mwanache jwamcheche ŵaliji Adoniya jwele mamagwe ŵaliji Hagiti, soni jwamsano ŵaliji Sefatiya jwele mamagwe ŵaliji Abitali.
5 Mwanache jwa 6 jwaliji Itileyamu jwele mamagwe ŵaliji Egila ŵamkwakwe ŵa Daudi. Ŵeleŵa ni ŵanache ŵele Daudi ŵaŵeleche paŵaliji ku Hebuloni.
6 Ngondo ja pasikati pa ŵandu ŵa m’nyumba ja Sauli ni ŵandu ŵa m’nyumba ja Daudi pajapitilisyaga, Abineli jwapitilisye kukola machili m’nyumba ja Sauli.
7 Sauli mkanawe ŵakwete jwamkongwe jwapambali lina lyakwe Lisipa. Jwalakwe ŵaliji mwanache jwa Ayiya. Kaneko Isi-boseti ŵamwusisye Abineli kuti, “Ligongo chichi mgonile ni ŵakongwe ŵapambali ŵa baba ŵangu?”
8 Abineli ŵatumbile mnope ligongo lya maloŵe gaŵawusisye Isi-boseti mwamti jwalakwe ŵatite, “Ana une ndili mbwa jangali mate ja ku Yuda? Kwikana mpaka lelojino mbele ndili mkulosya chinonyelo changamala kwa ŵandu ŵa m’nyumba ja baba ŵenu, kwa ŵachibale ŵawo soni kwa achimjawo. Nambosoni une nganinampeleka mmwejo mmyala mwa Daudi, nambo lelo yikusimanikwa kuti mmwejo mkunjimba une magambo kuti ndesile yakulemwecheka ni jwamkongwe.
9 Mlungu ampe chilango* chekulungwa Abineli naga unejo ngangumtendela Daudi yindu yele Yehofa ŵamlumbilile jwalakwe.
10 Paja ŵamlumbilile kuti chachityosya umwenye m’nyumba ja Sauli, ni kutamilikasya mpando waumwenye wa Daudi kuti jwalakwejo ŵalamulileje Ayisalayeli soni Ayuda kutyochela ku Dani mpaka ku Beele-seba.”
11 Pelepo Isi-boseti nganamjanga chilichose Abineli ligongo lyakuti ŵamjogopaga.
12 Ndaŵi jijojo Abineli ŵatumisye ŵamitenga kwa Daudi kukumsalila kuti, “Ana msyene chilambochi ali ŵani?” Jwalakwe ŵajonjechesyesoni kuti, “Mtende chilanga ni une mwamti chinjitenda yiliyose yakomboleka kuti Ayisalayeli wosope aŵe kumbali jenu.”
13 Daudi ni jwajanjile kuti, “Yili chenene, chindende chilanga ni mmwejo. Nambo chindu chimo changumŵenda chili chakuti mkalinga kwika kukuwonegana ni une mli nganimumjigala Mikala mwanache jwamkongwe jwa Sauli.”
14 Kaneko Daudi ŵatumile ŵamitenga kuti akamsalile Isi-boseti mwanache jwa Sauli kuti, “Mumbe ŵamkwangu Mikala ŵele nalombile mwakutenda kupeleka mapende gakusonga gakwana 100 ganakatile kuyalo kwa Afilisiti.”
15 Myoyo Isi-boseti ŵamtumile mundu kuti akamjigale Mikala kwa ŵamkwakwe ŵaŵaliji Palitiyele mwanache jwa Layisi.
16 Nambo ŵamkwakwewo ŵamkuyaga Mikalajo kwineku ali mkulila mpaka kuja kwika ku Bahulimu. Kaneko Abineli ŵamsalile jwalakwe kuti, “Mwuje!” Pelepo jwalakwe ŵawujilile.
17 Pandaŵiji Abineli ŵatumisye ŵamitenga kuti akasalile achakulungwakulungwa ŵa ku Isalayeli kuti, “Kwandaŵi jelewu jemanja aŵele ali mkusaka kuti Daudi aŵe mwenye jwawo jwakwalamulila.
18 Sambano ajino jili ndaŵi jambone jakuti atende yakuti jwalakwe aŵe mwenye jwawo. Pakuŵa Yehofa ŵamsalile Daudijo kuti, ‘Une chinjakulupusya ŵandu ŵangu Ayisalayeli mmyala mwa Afilisiti soni mmyala mwa adani ŵawo wosope kupitila mwa jwakutumichila jwangu Daudi.’”
19 Kaneko Abineli ŵapite kuja kuŵechetana ni ŵandu ŵa ku Benjamini. Jwalakwe ŵapitesoni kuja kuŵechetana ni Daudi pambali ku Hebuloni. Ŵamsalile yindu yaŵakamulene Ayisalayeli soni ŵandu ŵa m’nyumba josope ja Benjamini.
20 Abineli paŵayiche kwa Daudi ku Hebuloni pampepe ni achalume 20, Daudijo ŵamtendele pwando Abineli pampepe ni achalume ŵaŵaliji najo.
21 Kaneko Abineli ŵamsalile Daudi kuti, “Angunde njawuleje kuti ngasonganganye Ayisalayeli wosope kwa wawojo ambuje ŵangu mwenye. Ni chakulinga chakuti jemanjajo atende chilanga ni wawojo soni kuti wawojo aŵe mwenye jwa chilambo chosope cha Isalayeli mpela mwakusachila.” Myoyo Daudi ŵamkundile Abinelijo kuti ajawuleje mwamti jwalakwe ŵatyosile ni kwawulaga mwamtendele.
22 Kaneko ŵakutumichila ŵa Daudi pampepe ni Yowabu ŵawusile kutyochela kukwajimuchila adani ŵawo. Jemanjaji ŵajigele yindu yejinji yaŵasumwile kweleko. Pandaŵiji Abineli nganaŵa yimpepe ni Daudi ku Hebuloni, pakuŵa ŵaliji ali amkundile jwalakwe kuti ajawuleje mwamtendele.
23 Yowabu yimpepe ni gulu josope ja asilikali ŵaŵaliji ni jwalakwe paŵayiche, ŵandu ŵamsalile Yowabujo kuti, “Abineli mwanache jwa Neli ŵayiche kwa mwenye. Soni mwenyewo amkundile jwalakwe kuti ajawuleje mwamtendele.”
24 Myoyo Yowabu ŵapite kwa mwenyewo ni ŵawusisye kuti, “Pelepa ni atesile chichi? Abineli jwayiche kwa wawo. Sano ligongo chichi amkundile kuti ajawuleje? Apatu basi jutisile.
25 Wawo akummanyilila chenene Abineli mwanache jwa Neli. Jwalakwetu ŵayiche kukwaloŵesya wawojo soni jwalakwe akusaka kumanyilila mapulani gawo gosope ni yosope yakutenda.”
26 Myoyo Yowabu ŵatyosile paŵaliji Daudi. Kaneko jwalakwe ŵatumisye ŵamitenga kuti amkuye Abineli. Jemanjajo ŵamsimene Abinelijo ali pa chisima cha Sila, ni ŵamsalile kuti awujile. Nambo Daudi nganamanyilila chilichose pa yeleyi.
27 Abineli paŵawujile ku Hebuloni, Yowabu ŵamjigele jwalakwe kuti akaŵechetane najo pambali ku geti ja msinda. Nambo ali kweleko Yowabu ŵamsomile mmatumbo Abineli mwamti jwalakwe ŵawile. Jwalakwe ŵatesile yeleyi ligongo lyakuti Abineli ŵamwuleje Asaheli juŵaliji mlongo mjakwe Yowabujo.
28 Daudi paŵapikene yeleyi ŵatite, “Une soni uchimwene wangu tuli ŵangalemwa pameso pa Yehofa mpaka kalakala pamagambo ga myasi ja Abineli mwanache jwa Neli.
29 Magambo ga myasiga gaŵe pamtwe pa Yowabu soni pa ŵandu wosope ŵa m’nyumba ja baba ŵakwe. M’nyumba mwa Yowabu mukalepelaga kusimanikwa mundu jwakulwala ulwele wakusulula yindu kuyalo kapena wamatana kapena mundu jwakukamula masengo pachitela chakuluchila nguwo* kapena jwakuwulajidwa ni upanga* kapenasoni jwakusoŵa yakulya.
30 Yowabu ni Abisayi ŵaŵaliji ŵapaulongo, ŵamwuleje Abineli ligongo lyakuti Abinelijo ŵamwuleje Asaheli juŵaliji mlongo mjawo jwa jemanjaji paŵamenyanaga ku Gibiyoni.
31 Kaneko Daudi ŵamsalile Yowabu pampepe ni ŵandu wosope ŵaŵaliji najo kuti, “Mpapule yakuwala yenu ni m’wale yiguduli soni mumlilile Abineli. Mwenye Daudijo ŵajendaga panyuma pa chindanda chaŵanyakulile mtembo wa Abineliwo.
32 Jemanjaji ŵamsichile Abineli ku Hebuloni, soni mwenye Daudi ŵalisile mnope ali pa lilembe lya Abineli. Nambosoni ŵandu wosope ŵalisile.
33 Mwenyewo ŵajimbile nyimbo jakumlilila Abineli jakuti,
“Ana yisyene Abineli awile mpela mundu jwangali mate?
34 Makono genu galiji gangataŵika,Soni ngongolo syenu nganisiŵa syakutaŵika.*
Mgwile mpela mwakusagwila mundu pameso pa ŵachiswamba.”
Pelepo ŵandu wosope ŵalisilesoni.
35 Panyuma pakwe mkanikuswe ŵandu wosope ŵala ŵapite kukumtamika mtima pasi Daudi ali ajigele mkate. Nambo Daudi ŵalumbile kuti, “Mlungu ambe chilango chekulungwa naga ngulya mkate kapena chakulya chilichose lyuŵa mkanilikapile.”
36 Ŵandu wosope ŵayiweni yaŵatesile Daudiyi soni yasangalesye. Mwakamulana ni yindu yosope yaŵatendaga mwenye, ayisoni yasangalesye ŵandu wosope.
37 Myoyo palisikuli ŵandu wosope soni Ayisalayeli wosope ŵamanyilile kuti mwenyewo nganatendekasya kuti Abineli juŵaliji mwanache jwa Neli awulajidwe.
38 Kaneko mwenyewo ŵawusisye ŵakutumichila ŵakwe kuti, “Ana jemanja ngamkumanyilila kuti mlongola soni mundu jwakusosekwa mnope awile lelo mu Isalayeli muno?
39 Lelo nganingola machili atamose kuti ndili mwenye jwamsagulwe. Sonitu achalume ŵeleŵa ŵali ŵanache ŵa Seluyaŵa andendele une yangasa kwabasi. Yehofa amwuchisye mundu jwakusakala mwakamulana ni yakusakala yakusatenda mundujo.”
Maloŵe Gamwiŵanda
^ Ŵane akusati “chamuko.”
^ Komboleka kuti pelepa akwamba ya mundu jwamlemale juŵasosekwaga kukamula masengo ga achakongwe.
^ Upanga ukusawoneka mpela chipula chekulungwa chakutema kosekose.
^ Mu Chihebeli ŵatiga, “nganasitaŵilila ni ngonji syakopa.”
