Buku Jaŵili ja Samuyele 4:1-12
4 Isi-boseti mwanache jwa Sauli paŵapikene kuti Abineli awile ku Hebuloni, jwalakwe ŵatandite kutenda woga soni yasokonasisye Ayisalayeli wosope.
2 Papali achalume ŵaŵili ŵaŵalongolelaga magulu ga ŵachiswamba gagaliji ga mwanache jwa Sauli. Jwine lina lyakwe lyaliji Baana soni jwinejo lina lyakwe lyaliji Lekabu. Jemanjaji ŵaliji ŵanache ŵa Limoni jwa ku Beeloti jwa mu mbumba ja Benjamini. (Ŵandu ŵa ku Beeloti ŵawonagasoni kuti ali ŵa mu mbumba ja Benjamini.
3 Ŵandu ŵa ku Beelotiŵa ŵatilile ku Gitaimu, mwamti jemanjajo akutama kweleko mpela achalendo mpaka lelojino.)
4 Sambano Yonatani mwanache jwa Sauli ŵakwete mwanache juŵaliji jwamlemale sajo. Mwanacheju jwakwete yaka msano pawayikaga utenga kutyochela ku Yeseleeli wakuti Sauli ni Yonatani awile. Jwamkongwe juŵamsamalilaga mwanacheju paŵapikene yeleyo, ŵamnyakwile mwanachejo ni kutanda kutila. Nambo ligongo lyakuti jwamkongweju ŵakwete woga paŵatilaga, mwanachejo jwagwile ni jwalemele. Lina lya mwanacheju lyaliji Mefiboseti.
5 Lisiku line musi lyuŵa lili pamtwe, ŵanache ŵa Limoni jwa ku Beeloti ŵala, Lekabu ni Baana ŵapite ku nyumba ja Isi-boseti. Pandaŵiji Isi-bosetijo ŵaliji ali mkupumula.
6 Jemanjaji ŵajinjile m’nyumbamo mpela kuti akusaka kujigala Tiligu, ni ŵamchopile jwalakwejo pa lutumbo ni chipula. Kaneko Lekabu ni Baana mlongomjakwe jula ŵatisile.
7 Jemanjajo ali ajinjile m’nyumbamo ŵamsimene jwalakwe ali agonile pa bedi kuchipinda chakwe. Ali amsimene ŵamchopile jwalakwe ni chipula mpaka kumwulaga. Kaneko ŵamkatile mtwe wakwe. Jemanjajo ŵajigele mtwewo ni kwenda nawo chilo chosope mpaka kuja kwika ku Alaba.
8 Jemanjajo ŵajigele mtwe wa Isi-bosetiwo ni kwawula nawo kwa Daudi ku Hebuloni, soni ŵasalile mwenyewo kuti, “Ni awu mtwe wa Isi-boseti mwanache jwa Sauli mdani jwawo juŵasosagasosaga umi wawo jula. Lelo Yehofa amwuchisye Sauli soni yisukulu yakwe ligongo lya ambuje ŵangu mwenye.”
9 Nambo Daudi ŵamjanjile Lekabu ni Baana mlongomjakwe jula, ŵaŵaliji ŵanache ŵa Limoni jwa ku Beeloti kuti, “Nditu ngulumbila pameso pa Yehofa Mlungu jwaumi, jwele ŵangulupwisye une ku yakusawusya yangu yosope,
10 mundu jwine paŵayiche kwa une ni kusalila kuti, ‘Sauli awile,’ jwalakwejo ali mkuganisya kuti ayiche ni ngani jambone, une namkamwile ni kumwulaga jwalakwe ku Sikilagi. Gelego ni gagaliji malipilo ga mundu juŵayiche ni utengawo.
11 Nambi kuli uli ŵandu ŵakusakala ŵamwuleje mundu jwakulungama ali m’nyumba jakwe pa bedi. Ana ngangusosekwa kujisosa myasi ja mundu jwa mumwulejejo kutyochela mmyala mwenu soni ni kumtyosya jemanja pa chilambo chapasi?”
12 Pelepo Daudi ŵalamwile anyamata kuti ŵawulaje jemanjajo. Ŵakatile jemanjaji makono soni sajo. Kaneko ŵakoleche jemanjajo chiŵandika ni litanda lya Hebuloni. Nambo ŵajigele mtwe wa Isi-boseti ula ni kuja kuwusika m’malembe ga Abineli ku Hebuloni.
