Chikalata Chakwawula kwa Ahebeli 7:1-28
7 Melekisedeki jweleju ŵaliji mwenye jwa ku Salemu soni jwakutaga mbopesi jwa Mlungu Jwakwinani Mnope. Jwalakwe ŵamchingamile Abulahamu paŵaliji mkutyochela ku ngondo jakuwulaga mamwenye mwamti ŵampele upile.
2 Nombenajo Abulahamu ŵampele jwalakwejo chalikumi cha yindu yosope yaŵajigele. Lina lyakweli, chandanda likusagopolela kuti, “Mwenye Jwachilungamo,” nambosoni ali mwenye jwa Salemu, kugopolela kuti, “Mwenye Jwamtendele.”
3 Babagwe soni mamagwe ŵa mundu jweleju ŵangamanyika. Msele wa achinangolo ŵakwe soni lisiku lyakwe lyakupagwa kapena lisiku liŵawile ngayikumanyika. Nambo pakuŵa ŵamtesile kuŵa jwakulandana ni Mwanache jwa Mlungu, jwalakwe ali jwakutaga mbopesi mpaka kalakala.
4 Pelepatu mpaka ayiwone kuti mundu jweleju jwaliji jwakusosekwa mnope. Ni ligongo lyakwe Abulahamu jwali nangolo jwetu* ŵampele jwalakwe chalikumi cha yindu yambone mnope yiŵasumwile ku ngondo.
5 Mwakamulana ni lilamusi, ŵanache wosope ŵa m’liŵasa lya Lefi ŵele ŵakusatumichila mpela ŵakutaga mbopesi akwete lilamusi lyakuti alokoteleje chalikumi kutyochela kwa ŵandu. Yeleyi yikugopolela kuti jemanjaji akusapochela chalikumi kutyochela kwa achalongo achimjawo, atamose kuti jemanjajisoni ali ŵakutyochela kwa* Abulahamu.
6 Nambo mundu jweleju jwele nganatyochela mu msele wakupagwila wa Alefi, jwapochele chalikumi kutyochela kwa Abulahamu, soni jwampele upile mundu jwele Mlungu ŵamsalile kuti chachimpa yineyakwe.
7 Sambano pangali jwampaka asisye yakuti jwamnandi jwapochele upile kutyochela kwa jwamkulungwa.
8 Alefi ŵapochelaga chalikumi soni ŵaliji ŵandu ŵakuti akusawaga, nambo mundu jwine juŵapochele chalikumijo, Malemba gakusamtendela umboni kuti ali umi.
9 Myoyo mpaka tuŵechetesoni kuti, atamose Lefi, jwele jwakusapochelaga chalikumi, jwapelechesoni chalikumi kupitila mwa Abulahamu.
10 Yili myoyo ligongo lyakuti pandaŵi jele nangolo jwakwejo jwasimanaga ni Melekisedeki, jwalakwejo jwaliji jwakuti chachipagwa msogolo kutyochela kwa* nangolo jwakwe.
11 Yakuti paŵeje ŵakutaga mbopesi kutyochela mu msele wa Lefi yaliji mbali ja Chilamusi cha Mose chachapelechedwe kwa Ayisalayeli. Yikaŵe kuti ŵakutaga mbopesi ŵakutyochela mu msele wa Lefi ŵatendekasyaga ŵandu kuŵa ŵamlama, ana tukasosekwesoni jwakutaga mbopesi jwine mpela Melekisedeki? Ana ngamkaniyiŵa yakwanila kola ŵakutaga mbopesi mpela Aloni?
12 Pakuŵa sambano kuŵa jwakutaga mbopesi akukuchenga, nikuti Chilamusi chikusosekwasoni kuchichenga.
13 Mundu jwatukuŵecheta pakwamba ya yindu yeleyi ali jwa mu mbumba jakutyochela kwine, soni pangali mundu jwakutyochela ku mbumba jelejo jwele jwakamwile masengo pamalo gakupelechela mbopesi.
14 Tukumanyilila chenene kuti Ambuje ŵatyochele mu mbumba ja Yuda, nambotu Mose nganaŵecheta kuti ŵakutaga mbopesi chachityochela mu mbumba jeleji.
15 Pelepatu ni payikuwonechela chenene ligongo lyakwe tukwetesoni jwakutaga mbopesi jwine mpela Melekisedeki.
16 Jwakutaga mbopesi jweleju jwapochele masengo gakwe, ngaŵaga ligongo lya mbumba jiŵatyochele mwakamulana ni yagakusasaka malamusi, nambo ligongo lya machili gakumtendekasya jwalakwejo kuti akole umi wangajonasika.
17 Malemba gakusatendela umboni ya jwalakwejo kuti, “Mmwejo mli jwakutaga mbopesi mpaka kalakala, mwakulandana ni Melekisedeki.”
18 Myoyo malamusi gakalago ŵagatyosisye ligongo galiji gangali machili soni gakupelembela.
19 Pakuŵa Chilamusi nganichitendekasya chindu chilichose kuŵa chamlama, nambo chembecheyo chambone chaŵatupele Mlungu chatesile yeleyo. Chembecheyo chelechi ni chachikututendekasya m’weji kuti tumŵandichile Mlungu.
20 Nambotu yeleyi nganiyitendekwa pali pangali kulumbila.
21 (Pakuŵa pana achalume ŵane ŵaŵaŵele ŵakutaga mbopesi pali pangali kulumbila. Nambo pana jwine juŵaŵele jwakutaga mbopesi ligongo lya kulumbila. Kulumbila kweleku kuli kwa Jwele juŵaŵechete kuti, “Yehofa alumbile, soni ngasachenga nganisyo syakwe,* ‘Mmwejo mli jwakutaga mbopesi mpaka kalakala.’”)
22 Ni ligongo lyakwe Yesu aŵele jwakutusimichisya kuti chilangano chambone chichikwanilichikwa.
23 Nambosoni, pasosekwaga ŵakutaga mbopesi ŵane kuti ajinjileje mmalo mwa achimjawo, ligongo chiwa chalepelekasyaga kupitilisya kutumichila mpela ŵakutaga mbopesi.
24 Nambo pakuŵa jwalakwejo chachitama ni umi mpaka kalakala, ngapakusosekwasoni ŵakutaga mbopesi ŵane ŵakuti ajinjile mmalomwakwe.
25 Jwalakwe alisoni jwakombola kwakulupusya yisyesyene wosope ŵakwika kwa Mlungu kupitila mwa jwalakwejo, ligongo jwalakwejo chachiŵape ni umi kuti ŵachondeleleje jemanjaji kwa Mlungu.
26 Pakuŵa yili yakuŵajilwa kuti m’weji tukole jwamkulungwa jwa ŵakutaga mbopesi jwamti mpela jweleju, jwali jwakulupichika, jwangalemwa, jwangali chakumsakasya, jwakulekangana ni ŵakulemwa, soni ŵamkwesisye ni kuŵa penani mnope kupunda kwinani.
27 Mwakulekangana ni achakulungwa ŵa ŵakutaga mbopesi ŵanewo, jwalakwejo ngakusosekwa kupeleka mbopesi lisiku lililyose. Ngakusosekwa kuti chandanda apelecheje mbopesi ja ulemwa wakwe kaneko ja ulemwa wa ŵandu wosope, ligongo jwalakwe ŵalipeleche jika mpela mbopesi soni ŵatesile yeleyi kampepe basi.
28 Pakuŵa mwakamulana ni Chilamusi achalume ŵakwete yakulepela akusiŵasagula kuti aŵe achakulungwa ŵa ŵakutaga mbopesi, nambo mwakamulana ni maloŵe gakulumbila gaŵagaŵechete panyuma pa Chilamusi, pasagulidwe Mwanache jwele ŵamtesile kuŵa jwamlama mpaka kalakala.
Maloŵe Gamwiŵanda
^ Kapena kuti, “jwali mtwe wa liŵasa lyetu.”
^ Maloŵe gakwe gandanda, “ali ŵakutyochela m’chiwunu mwa.”
^ Maloŵe gakwe gandanda, “kutyochela m’chiwunu mwa.”
^ Kapena kuti, “soni ngasalijimba magambo.”
