Chikalata Chakwawula kwa Aloma 10:1-21
10 Achalongo achimjangu, ndili jwakusachilila mnope mumtimamu soni ngusapopela kwa Mlungu mwakuchondelela kuti Ayisalayeli akulupuche.
2 Pakuŵa ngwaŵichila umboni jemanjaji kuti ali ŵakulipeleka kwa Mlungu, nambo ngakusamanyilila chenene chakulinga cha Mlungujo.
3 Soni ligongo lyangamanyilila chilungamo cha Mlungu, jemanjaji ŵatamilikasisye chilungamo chawo, mwamti nganapikanila chilungamo cha Mlungu.
4 Pakuŵa Klistu ŵamasisye Chilamusi kuti jwalijose jwakumkulupilila jwalakwe aŵe jwakulungama.
5 Mose jwalembile pakwamba ya mundu jwakusatenda yachilungamo ligongo lya Chilamusi. Jwatite, “mundu jwakukuya chilamusi chachiŵa ni umi ligongo lya chilamusicho.”
6 Nambo pakwamba ya chilungamo chachikusayika ligongo lya chikulupi, Maloŵe ga Mlungu gakusati, “Mkaŵecheta mumtima mwenu kuti, ‘Ana ŵani ŵachakwele kwinani?’ kugopolela kuti, ana ŵani ŵachajawule kwinani kuti akamjigale Klistu?
7 Soni mkaŵecheta kuti, ‘Ana ŵani ŵachachijinjila mwisimbo?’ kugopolela kuti, ana ŵani ŵachachimjimusya Klistu?”
8 Nambo ana Malemba gakusati uli? Gakusati, “Maloŵego nganigatalikangana ni jemanja, ligongo mkusagaŵechetaga soni gali m’mitima mwenu.” Kuti mundu agapochele maloŵe gelega akusosekwa kola chikulupi. Maloŵe gakwe ni gatukulalichilaga.
9 Naga mkusalalichila kwa ŵandu kuti Yesu ali Ambuje soni mkusakulupilila kuti Mlungu ŵamjimwisye jwalakwejo, chimchikulupuka.
10 Pakuŵa mundu jwakwete chikulupi mumtima mwakwe Mlungu akusamwona kuŵa jwambone, nambo kuti akulupuche akusasosekwa kuŵecheta ni pakamwa pakwe ya chikulupi chakwecho kwa ŵane.
11 Pakwamba ya Yesu, lilemba line likusati, “Jwalijose jwakusamkulupilila jwalakwejo ngasatenguka.”
12 Pakuŵa pangali kulekangana pasikati pa Myuda ni Mgiliki. Wosopewo Ambuje ŵawo ali ŵampepe, soni Ambujewo akusaŵa ŵakoloŵa makono kwa jwalijose jwakusaŵilanga pa ŵalakwewo.
13 Pakuŵa “jwalijose jwakuŵilanga pa lina lya Yehofa chachikulupuka.”
14 Sambano, ana chachiŵilanga uli pa jwalakwejo naga nganamkulupilila? Nambi chachimkulupilila uli naga nganapikaneje yakwamba jwalakwejo? Soni chachipikana uli yakwamba jwalakwejo pali pangali jwakulalichila?
15 Nambo ana chachilalichila uli naga nganatumidwa? Pakuŵa Malemba gakusati, “Sajo sya ŵandu ŵakusalalichila ngani syambone sya yindu yambone sili syakusalala.”
16 Nambope, Ayuda wosope nganapikanila ngani syambone. Yeleyi yikukamulana ni yaŵaŵechete Yesaya kuti, “Yehofa, ana ŵani ŵakulupilile yindu yatwaŵechete m’weji?”
17 Myoyo mundu akusakola chikulupi kutyochela pa yindu yapikene, soni yindu yapikeneyo yikusatyochela m’maloŵe gakwamba Klistu.
18 Nambo mbusye kaje, Ana jemanjajo yisyene nganapikana? Ŵapikene. Pajatu Malemba gakusati, “Maloŵego gapikaniche pachilambo chosope, soni utenga wayiche mpaka kumbesi kwa chilambo.”
19 Nambo mbusyesoni pelepa. Ana Ayisalayeliwo ŵalepele kupikanichisya? Ŵapikanichisye. Paja Mose ŵalembile kuti, “Chinjimtendekasya jemanja Ayisalayeli kuti mwatendele jelasi* ŵandu ŵamitundu jine, soni chinjimtendekasya jemanja kuwutumbilila mtundu wangapikanichisya yindu.”
20 Nambo Yesaya mwakulimba mtima ŵatite, “Ŵandu ŵele ŵanganasosasosa une ŵambatile, soni ŵele ŵanganawusyaga ya une ŵamanyilile.”
21 Nambo pakwamba ya Ayisalayeli jwalakwe ŵatite, “Lisiku lyosope naliji mkwaŵilanga ŵandu ŵangapikana soni ŵakwimuchila kuti awujile kwa une.”
Maloŵe Gamwiŵanda
^ Ŵane akusati “dumbo.”
