Chiwunukuko Chakwawula kwa Yohane 5:1-14
5 Kumkono wamlyo wa Jwele juŵatemi pampando waumwenyejo, nawuweni mpukutu welembe kosekose.* Mpukutuwo waliji wemate mwakulimba ni yakumatila yakwana 7.
2 Kaneko naliweni lilayika lyamachili lili mkuŵecheta mwakwesya maloŵe kuti, “Ana ŵani ŵali ŵakuŵajilwa kumatukula yakumatila ya mpukutuwu ni kuwuwugula?”
3 Nambo paliji pangali atamose jumo, chinga kwinani kapena pachilambo chapasi kapenasoni pasi pa chilambo, juŵaliji jwakuŵajilwa kuwugula mpukutuwo ni kuŵalanga.
4 Pelepo une natandite kulila mnope ligongo paliji pangali atamose jumo juŵaliji jwakuŵajilwa kuwugula mpukutuwo ni kuŵalanga.
5 Nambo jumo mwa achakulungwa ŵala ŵasalile kuti, “Mleche kulila. Mlole, jwele jwali Lisimba lya mbumba ja Yuda, jwalisoni mchiga wa Daudi, jupundile kuti amatukule yakumatila 7 yila ni kuwugula mpukutuwo.”
6 Kaneko nam’weni mwanache jwangondolo jwakuwoneka mpela amwuleje ali ajimi pasogolo pa mpando waumwenyewo soni pasikati pa yaumi mcheche ni achakulungwa ŵala. Mwanache jwangondolojo jwakwete misengo 7 soni meso 7. Mesogo gakwimila misimu 7 ja Mlungu jajitumisye pachilambo chosope chapasi.
7 Ndaŵi jijojo mwanache jwangondolo jula jwayiche pasogolo pa Jwele juŵatemi pampando waumwenye jula ni kujigala mpukutu uwaliji kumkono wakwe wamlyo ula.
8 Paŵagambile kujigala mpukutuwo, yaumi mcheche ni achakulungwa 24 ŵala ŵatindiŵele pasogolo pa Mwanache Jwangondolojo. Jwamkulungwa jwalijose jwajigele chida chakwimbila cha ngonji soni mbale syagolide syegumbale ni yakununjila yakutinisya. (Yakununjila yakutinisya yeleyi yikwimila mapopelo ga ŵaswelawo.*)
9 Jemanjaji ŵaliji mkwimba nyimbo jasambano jakuti, “Wawo ni ŵali ŵakuŵajilwa kujigala mpukutuwu ni kumatukula yakumatila yakwe, ligongo lyakuti wawojo ŵawulajidwe soni ŵasumile ŵandu ni myasi jawo kuti aŵe ŵakutumichila ŵa Mlungu. Ŵanduwo ŵasumile kutyochela mu mbumba jilijose, chiŵecheto chilichose, mtundu uliwose, soni chilambo chilichose.
10 Soni wawojo ŵaŵisile ŵanduwo kuŵa mamwenye ni ŵakutaga mbopesi ŵa Mlungu jwetu, mwamti jemanjaji chachilamulilaga chilambo chapasi mpela mamwenye.”
11 Kaneko nagaweni malayika gejinji gali gasyungulile mpando waumwenye, yaumi mcheche soni achakulungwa ŵala. Napikenesoni maloŵe ga malayikago. Winji wa malayikago waliji masausande ga masausande soni mamiliyoni mamiliyoni.
12 Malayikago gaŵechetaga mwakwesya maloŵe kuti, “Mwanache Jwangondolo juŵamwuleje ali jwakuŵajilwa kupochela ulamusi, chipanje, lunda, machili, soni upile. Ali jwakuŵajilwasoni kuti jwalijose amchimbichisyeje soni kumkwesya.”
13 Kaneko napikene yosope yaŵayipanganyisye Mlungu kwinani, pachilambo, pasi pachilambo soni panyasa, nditu, yosope yene nayipikene yili mkuŵecheta kuti, “Jwele jwatemi pampando waumwenye soni Mwanache Jwangondolo akusosekwa kwayamichila, kwapa uchimbichimbi, kwakwesya soni kwa jemanjaji kuŵe machili mpaka kalakala.”
14 Pelepo yaumi mcheche yila yatite, “Ame” soni achakulungwa ŵala ŵatindiŵele ni kumchimbichisya Mlungu.
Maloŵe Gamwiŵanda
^ Maloŵe gakwe gandanda, “welembe mkati ni kusa kwakwe.”
^ Alole Kugopolela kwa Maloŵe Gane.
