Detulonomo 7:1-26
7 “Yehofa Mlungu jwenu pachakamjinjisye m’chilambo chamsigele panandi kwinjila ni kuchijigala kuti chiŵe chenu, jwalakwe chakajitopolesoni pameso penu mitundu jekulungwakulungwa. Mitundu jakwe jili Ahiti, Agiligasi, Aamoli, Akanani, Apelesi, Ahifi ni Ayebusi. Mitundu 7 jeleji jili jekulungwakulungwa soni jamachili kumpunda jemanja.
2 Yehofa Mlungu jwenu chakapeleche jemanjajo mmyala mwenu mwamti chimchagomeka. Mkusosekwa nditu kuja kwajonanga jemanjajo. Nambosoni mkaja kutenda chilanga chilichose ni jemanjajo kapena kwatendela chanasa.
3 Mkaja kutenda mkamulano uliwose waulombela* ni jemanjajo. Mkaja kujigala ŵanache ŵenu ŵachakongwe ni kwapeleka kwa ŵanache ŵawo ŵachalume kapena kujigala ŵanache ŵawo ŵachakongwe ni kwapeleka kwa ŵanache ŵenu ŵachalume.
4 Pakuŵa jemanjajo chachatendekasya ŵanache ŵenu kuleka kunguya une ni kutanda kutumichila milungu jine. Pelepo Yehofa chachimtumbilila jemanja, soni jwalakwe chachimjonanga mwachitema.
5 “Mmalomwakwe mkatende kwa jemanjajo yindu ayi: Mkagwisye malo gawo gakupelechela mbopesi, mkagumule yipilila yawo yapadela soni mkagwisye njalamila syawo syapadela* soni mkajoche yiwanichisyo yawo yakusepa.
6 Pakuŵa jemanja mli ŵandu ŵaswela kwa Yehofa Mlungu jwenu, soni Yehofa Mlungu jwenujo amsagwile jemanja kutyochela mwa ŵandu wosope ŵakutama pachilambo chapasi kuti mŵe ŵandu ŵakwe soni chipanje chakwe chapadela.
7 “Ana Yehofa ŵamnonyele soni kumsagula jemanja ligongo lyakuti mwaliji ŵandu ŵajinji kwapunda ŵandu ŵane wosope? Iyayi. Jemanja mwaliji ŵandu ŵamnono mwa ŵandu wosope.
8 Nambo Yehofa ŵatesile yeleyi ligongo lyakumnonyela soni ligongo lya chilanga chaŵalumbile kwa achinangolo ŵenu. Ni ligongo lyakwe Yehofajo ni mkono wakwe wamachili, ŵamwombwele jemanja m’nyumba ja ukapolo, mmyala mwa Falawo mwenye jwamachili jwa ku Iguputo.
9 Jemanja mkumanyilila chenene kuti Yehofa Mlungu jwenu ali Mlungu jwakuwona, Mlungu jwakulupichika soni jwakusasunga chilanga chakwe ni kulosyaga chinonyelo changamala kumibado* 1,000 ja ŵandu ŵele ŵakumsanonyela jwalakwe soni kusunga malamusi gakwe.
10 Nambo ŵandu ŵakusamŵenga jwalakwe chachajonanga. Jwalakwe ngasachelewa kwapa chilango ŵakusamŵenga jwalakwejo, nditu chachawuchisya jemanjajo.
11 Myoyo, mlolechesye kuti mkusunga malamusi soni yaŵamlamwile Mlungu yangumsalila une lelojino kuti myikuyeje.
12 “Naga mkupitilisya kupikanila yindu yaŵamlamwile Mlunguyi soni kuyikuya ni kuyitenda, Yehofa Mlungu jwenu chachisunga chilanga chakwe chaŵatesile kwa jemanja soni chachimlosya chinonyelo changamala mpela mwaŵalumbilile kwa achinangolo ŵenu.
13 Jwalakwe chachimnonyela jemanja soni kumpa upile ni kumtupiya. Nditu jwalakwe chachimpa upile jemanja mwakumpa ŵanache ŵajinji, yagungula yejinji, tiligu, finyo, mawuta, nambosoni chachitendekasya kuti ng’ombe syenu soni ngondolo syenu siŵeleche ŵanache ŵajinji. Chachitenda yeleyi m’chilambo chele jwalakwe jwalumbile kwa achinangolo ŵenu kuti chachimpa.
14 Jemanja chimchiŵa ŵandu ŵaupile mnope mwa ŵandu wosope. Pangali mundu jwalijose mwa jemanja, chinga jwamlume kapena jwamkongwe juchachiŵa jwangali mwanache. Nambosoni pa yilango yenu pangali chilango atamose chimo changasichiŵeleka ŵanache.
15 Yehofa chachimtyochesya jemanja yilwele yosope soni jwalakwe ngasayikasya pa jemanja yilwele yakogoya yamwayiweni mli ku Iguputo. Mmalomwakwe jwalakwe chachiyikasya yilwele yosopeyi kwa ŵandu wosope ŵakusamŵenga jemanja.
16 Jemanja mkusosekwa kuja kwajonanga ŵandu wosope ŵachakampe Yehofa Mlungu jwenu. Mkaja kwatendela chanasa jemanjajo soni mkaja kujitumichila milungu jawo ligongo naga mkuja kutenda yeleyi yichiŵa yindu yakumtega jemanja.
17 “Naga mkuja kuŵecheta mumtima mwenu kuti, ‘Mitunduji jitukulile, ana chingombole uli kujitopola?’
18 Mkaja kwajogopa jemanjajo. Mkakumbuchile yaŵatesile Yehofa Mlungu jwenu kwa Falawo soni kwa Aiguputo wosope.
19 Mkaja kuliŵalilasoni chilango* chamachili chamwachiweni ni meso genu, yimanyisyo, yakusimonjesya, soni yaŵatesile Mlungu pakutambasukula mkono wakwe ni kulosya machili gekulungwa ni chakulinga chakuti Yehofa Mlungu jwenujo amkoposye jemanja. Yeleyi ni yachachitendasoni Yehofa Mlungu jwenu kwa ŵandu wosope ŵamkusimwajogopa.
20 Yehofa Mlungu jwenu chachatendekasya jemanjajo kutenguka* mpaka wosope ŵaŵasigele soni ŵaŵajuŵile ali ajonasiche.
21 Mkaja kwajogopa jemanjajo pakuŵa Yehofa Mlungu jwenu ali ni jemanja. Jwalakwe ali Mlungu jwamkulungwa soni jwakutesya woga.
22 “Nditu Yehofa Mlungu jwenu chakajitoposye mitundu jeleji pameso penu mwapanandipanandi. Jwalakwe ngasamkunda kuti mjimasye mitundu jeleji kamo ni kamo ni chakulinga chakuti yinyama yakwitinji yikatupa ni kumjonanga.
23 Yehofa Mlungu jwenu chachapeleka jemanjaji mmyala mwenu soni nditu chimchagomeka mpaka wosope ali amasile.
24 Jwalakwe chachigapeleka mamwenye gawo mmyala mwa jemanja, soni jemanja chimchigapyajila mena gawo pachilambo chapasi. Pangali jwalijose juchachilimbana ni jemanja mpaka mli mwajonasile jemanjajo.
25 Mkajoche pamoto yiwanichisyo yakusepa ya milungu jawo. Mkaja kukumbila silifa soni golide jwawo kapena kumjigala kuti aŵe jwenu ligongo naga mkuja kutenda yeleyi yichiŵa yindu yakumtega jemanja, pakuŵa yindu yeleyi yili yakunyalaya kwa Yehofa Mlungu jwenu.
26 Mkaja kujigala chindu chakunyalaya ni kuchiŵika m’nyumba mwenu kogopela kuti mmwejo mpaka mŵe ŵakuŵajilwa konasika mpela chinducho. Mkusosekwa kuŵengana nacho mnope ligongo chili chakusosekwa konanjidwa.
Maloŵe Gamwiŵanda
^ Kapena kuti, “Mkaja kulombana.”
^ Alole Kugopolela kwa Maloŵe Gane.
^ Ku Mozambique akusati “geração.”
^ Ŵane akusati “chamuko.”
^ Kagopolele kanesoni, “kogopa.”
