Ekisodo 21:1-36
21 “Sambano mwasalile jemanjajo malamusi aga:
2 “Naga msumile kapolo jwa Chihebeli, jwalakwe chamtumichileje mpela kapolo kwa yaka 6. Nambo mu chaka cha 7 jwalakwejo chaŵeje jwagopoka kutyoka mwangamlipilisya chilichose.
3 Naga jwalakwe ŵayiche jika, akusosekwa kutyokasoni jika. Nambosoni naga jwalakwejo ali jwamlume jwamlombele nikuti akusosekwa kutyoka pampepe ni ŵamkwakwewo.
4 Naga ambuje ŵakwewo ampele jwalakwejo jwamkongwe, ni jwamkongwejo akuŵeleka ŵanache ŵachalume kapena ŵachakongwe, pelepo jwamkongwejo pampepe ni ŵanachewo chachiŵa ŵa ambuje ŵakwewo mwamti jwamlumejo chachityoka jika.
5 Nambo naga kapolojo akuŵecheta mwakusimichisya kuti, ‘Une ngusanonyela ambuje ŵangu soni ŵamkwangu ni ŵanache ŵangu, mwamti ngangusaka kuŵa jwagopoka kutyoka,’
6 pelepo ambuje ŵakwewo akusosekwa kwawula najo pameso pa Mlungu jwakuwona. Kaneko ayicheje najo jwalakwejo papali litanga kapena felemu, soni ambuje ŵakwewo ampowoleje liwiwi ni kasyano kakupowolela. Patesile yeleyi nikuti jwalakwe chaŵeje kapolo jwakwe kwa umi wakwe wosope.
7 “Naga jwamlume asumisye mwanache jwakwe jwamkongwe kuti aŵe kapolo, jwamkongwejo ngasatyoka mwalulele kwa ambuje ŵakwe mpela mwakusatyochela kapolo jwamlume.
8 Nambo naga ambuje ŵakwewo ngakusangalala najo soni ngakusaka yakuti jwalakwe aŵe ŵamkwakwe ŵanandi mwamti akumsumisya kwa mundu jwine, ambuje ŵakwewo nganakola ufulu wakumsumisya kwa achalendo ligongo yichiŵa kuti amtendele yindu yachinyengo.
9 Naga ambuje ŵakwewo akumjigala jwamkongwejo ni kumpeleka kwa mwanache jwakwe jwamlume kuti aŵe ŵamkwakwe, jwalakwe ampeje ufulu jwamkongwejo wakulandana ni wakusapochela ŵanache ŵachakongwe.
10 Nambo naga jwalakwe akulombela jwamkongwe jwine, ngakusosekwa kuleka kumsamalila jwamkongwe jwandandajo mwakumpa yakulya, yakuwala soni yakusosekwa ya mu ulombela.*
11 Naga jwalakwejo akulepela kumtendela jwamkongwejo yindu yitatu yeleyi, nikuti jwamkongwejo ali jwagopoka kutyoka ngalipila mbiya jilijose.
12 “Jwalijose jwakumputa mundu mpaka mundujo kuwa nombenajo akusosekwa kumwulaga.
13 Nambo naga jwalakwe atesile yeleyo mwangosi soni Mlungu jwakuwona ayikundile kuti yeleyi yitendekwe, une chinjimlinganyichisya jemanja malo gakuti mundujo atilileje.
14 Naga mundu amtumbilile mnope mjakwe, kaneko ni akumwulaga mjakwejo mwamelepe, mundu jwelejo akusosekwa kumwulaga atamose ali atilile ku malo gangu gakupelechela mbopesi pakusaka kuti akulupuche.
15 Mundu jwalijose jwakwaputa babagwe kapena mamagwe akusosekwa kumwulaga.
16 “Naga jwine ajiŵile mundu ni kumsumisya kapena amsimene ali ni mundujo, jwakwiŵa mundujo akusosekwa kumwulaga.
17 “Jwalijose jwakwatembelela babagwe kapena mamagwe akusosekwa kumwulaga.
18 “Naga achalume akukangana ni jumpepe amputile mjakwejo ni liganga kapena ni chibagela* soni yisimanikwe kuti mjakwejo nganawa nambo ali chigonele, mkusosekwa mtendeje ayi:
19 Naga jwalakwe akukombola kwimuka pagonilepo ni kwendagajendaga pasa pakamulichisya masengo ndodo, pelepo nikuti mundu jwaŵamputile jula ngakusosekwa kupochela chilango.* Nambo jwalakwe chachisosekwa kumlipila malipilo ga ndaŵi josope jatemi mjakwejo ali ngakukamula masengo mpaka pandaŵi jaŵele chenene.
20 “Naga mundu akumputa kapolo jwakwe jwamlume kapena kapolo jwakwe jwamkongwe ni ndodo ni kapolojo akuwila mmyala mwakwe, mundujo akusosekwa kumpa chilango.
21 Nambope naga kapolojo atemi ni umi kwa lisiku limo kapena gaŵili, nikuti mundujo ngakusosekwa kumpa chilango ligongo kapolojo ŵatesile kumsuma ni mbiya syakwe.
22 “Naga achalume akumenyana ni akumwulasya jwamkongwe jwakwete msigo mwamti jwamkongwejo akuŵeleka mwanache masiku gakwe mkanigakwane nambo pangali jwawile, jwamwulesye jwamkongwejo akusosekwa kulipila mwakamulana ni mwachalamulile ŵamkwakwe ŵa jwamkongwejo soni jwalakwe akusosekwa kupeleka malipilogo kupitila mwa ŵakwelusya.
23 Nambo naga pana jwawile nikuti akusosekwa kupeleka umi wakwe kuti alipile umi wa mundu jwawilejo.
24 Naga amwulesye liso chasosekweje kulipila liso, lino kulipila lino, mkono kulipila mkono, lusajo kulipila lusajo,
25 kocha ni moto kulipila kocha ni moto, liŵanga kulipila liŵanga, kuputa kulipila kuputa.
26 “Naga mundu amputile pa liso kapolo jwakwe jwamlume kapena kapolo jwakwe jwamkongwe mwamti lisolyo liwulele, nikuti jwalakwe chachimkunda kapolojo kutyoka mwangamlipikasya chilichose ligongo lya liso lyamwulesyelyo.
27 Nambosoni naga jwalakwe akumkuwula lino kapolo jwakwe jwamlume kapena jwamkongwe nikuti jwalakwe chachimkunda kapolojo kutyoka mwangamlipikasya chilichose ligongo lya lino lyamkuwilelyo.*
28 “Naga ng’ombe jikumgunda jwamlume kapena jwamkongwe mwamti mundujo akuwa, ng’ombejo jikusosekwa kujiputa maganga mpaka jiwe soni nyama jakwejo ngakusosekwa kulya. Nambo msyene ng’ombejo ngakusosekwa kumpa chilango.
29 Nambo naga ng’ombejo jatamilaga kugunda ŵandu mwamti ŵandu ŵaŵele ali mkumsalila msyene yajikutenda ng’ombejo nambo msyenejo nganajilolelaga ni jiwuleje jwamlume kapena jwamkongwe, nikuti ng’ombejo akusosekwa kujiputa ni maganga soni msyenejo akusosekwa kumwulaga.
30 Naga jwalakwe amlamwile kuti alipile, akusosekwa kulipila mtengo wosope wakuwombolela umi wakwe mwakamulana ni mwamlamulilemo.
31 Chinga ng’ombejo jigundile mwanache jwamlume kapena jwamkongwe, msyene ng’ombejo akusosekwa kumlamula mwakamulana ni lilamusi lyeleli.
32 Nambo naga ng’ombejo jigundile kapolo jwamlume kapena kapolo jwamkongwe, msyene ng’ombejo akusosekwa kupeleka mbiya syakwana masekeli* 30 kwa ambuje ŵakwe ŵa kapolojo soni ng’ombejo akusosekwa kujiputa maganga mpaka kuwa.
33 “Naga mundu nganawugala palisimbo kapena asosile lisimbo ni kulileka lyangawunichila, kaneko ng’ombe kapena bulu ni kugwila mwisimbomo,
34 msyene lisimbojo akusosekwa kulipila. Jwalakwe akusosekwa kulipila kwa msyene yilangoyo soni chilango chachiwilecho chiŵeje chakwe.
35 Naga ng’ombe ja mundu jiwulesye ng’ombe ja jwine mpaka ng’ombejo kuwa, nikuti ng’ombe jaumijo akusosekwa kujisumisya ni kugaŵana mbiya syakwesyo soni ng’ombe jajiwilejo akusosekwa kugaŵana nyama jakwe.
36 Kapena naga ng’ombejo jamanyikaga kuti jikusatamila kugunda ng’ombe sijakwe nambo msyenejo nganajilolelaga, pelepo jwalakwe akusosekwa kumlipikasya ng’ombe ligongo lya ng’ombe jajiwilejo, nambo ng’ombe jajiwilejo chajigaleje kuti jiŵe jakwe.
Maloŵe Gamwiŵanda
^ Pelepa akwamba kugona ni ŵamkwakwewo.
^ Kagopolele kanesoni, “chida.”
^ Ŵane akusati “chamuko.”
^ Ŵane akusati, “lyamkusilelyo.”
^ Sekeli jimo jaŵaga jakusitopa magalamu 11.4. Alole Yakumbesi B14.
