Ekisodo 9:1-35
9 Myoyo Yehofa ŵamsalile Mose kuti, “Mjawule kwa Falawo ni mkamsalile jwalakwejo kuti, ‘Yehofa Mlungu jwa Ahebeli aŵechete kuti, “Mwakunde ŵandu ŵangu kutyoka kuti akandumichile.
2 Nambo naga mkukana kuti jemanjajo ajawuleje soni kwakakamila kuti akatyoka,
3 mkono wa Yehofa chiwuwulaje yilango yenu yosope. Mlili wakogoya mnope chiwuyiche pa mahachi, abulu, ngamila, ng’ombe soni ngondolo.
4 Yehofa chachiyilekanganya yilango ya Ayisalayeli ni ya Aiguputo, mwamti pangali chilango cha Ayisalayeli atamose chimpepe chachichiwa.”’”
5 Kaneko Yehofa ŵasasile chile ndaŵi jayichitendekwa yeleyi. Ŵatite, “Malaŵi Yehofa chatende yindu yeleyi m’chilambo achino.”
6 Palisiku lyakuyichisya, Yehofa ŵatesile yaŵaŵecheteyo mwamti yilango yosope ya Aiguputo yatandite kuwa, nambo pangali chilango cha Ayisalayeli atamose chimpepe chachawile.
7 Falawo paŵatumile ŵakutumichila ŵakwe kuti akalole yayitendekwe, ŵasimene kuti pangali chilango cha Ayisalayeli chilichose chachawile. Atamose yaliji myoyo, Falawo ŵapitilisye kumusya mtima wakwe mwamti nganiŵakunda ŵanduwo kutyoka.
8 Kaneko Yehofa ŵamsalile Mose soni Aloni kuti, “Mgumbasye m’magasa genu liwu lyakutyochela mu ufuni soni Mose aliponye liwulyo mwinani pameso pa Falawo.
9 Liwulyo lichichenga ni kuŵa luwundu lwaluchigumbala m’chilambo chosope cha Iguputo, soni luchitendekasya kuti yilonda yekulungwakulungwa yikopoche pa chilu cha ŵandu nambosoni yinyama m’chilambo chosope cha Iguputo.”
10 Myoyo jemanjajo ŵajigele liwulyo kutyochela mu ufuni ni kwawula kwa Falawo. Kaneko Mose ŵaliponyisye liwulyo mwinani mwamti liwulyo lyatendekasisye yilonda yekulungwakulungwa pa ŵandu soni yinyama.
11 Ŵakutaga mbopesi ŵakutenda yamasenga ŵalepele kuwonechela pameso pa Mose ligongo lya yilondayo. Pakuŵa yilondayo yakopweche pa chilu pa ŵakutaga mbopesi ŵakutenda yamasengawo ni pa Aiguputo wosope.
12 Nambo Yehofa ŵamkundile Falawo kuti ajumusye mtima wakwe, mwamti jwalakwe nganiŵapikanila jemanjajo mpela yaŵatite Yehofa pakumsalila Mose.
13 Kaneko Yehofa ŵamsalile Mose kuti, “Malaŵi mjimuche kundaŵindaŵipe ni mkawonechele pameso pa Falawo, soni mkamsalile jwalakwejo kuti, ‘Yehofa Mlungu jwa Ahebeli aŵechete kuti, “Mwakunde ŵandu ŵangu kutyoka kuti akandumichile.
14 Nambo naga ngamkwakunda ŵanduwo kutyoka, une chindumisye milili jangu josope pa mmwejo, ŵakutumichila ŵenu, soni ŵandu ŵenu, ni chakulinga chakuti mmanyilile kuti pangali jwalijose jwakulandana ni une pachilambo chosope chapasi.
15 Pakwikana apanotu une ngaliji ndambasukwile mkono wangu ni kumwulaga mmwejo soni ŵandu ŵenu ni milili jakogoya. Soni une ngaliji ndili namjonasile mmwejo pachilambo chapasi.
16 Nambo namlesile mmwejo ni umi ni chakulinga chakuti namlosye machili gangu soni kuti lina lyangu limanyiche pachilambo chosope.
17 Ana mmwejo mkupitilisyape kulikwesya pameso pa ŵandu ŵangu pakwakanya kutyoka?
18 Malaŵi pandaŵi mpela jinojino chinjitendekasya kuti kugwe wula jamatalila gekulungwakulungwa mnope ganganigawonechejepo m’chilambo cha Iguputo.
19 Myoyo mwatume ŵakutumichila ŵenu kuti akayijigale yilango yenu yosope ni yindu yenu yosope yayili kwitinji kuti yiŵe pamalo gambone. Mundu jwalijose jwele nganaŵa m’nyumba soni chinyama chilichose chachili kusa chichiwa pandaŵi jele matalilago gachigwaga.”’”
20 Jwakutumichila jwa Falawo jwalijose juŵajogopaga maloŵe ga Yehofa, ŵajigele mwachitema yilango yakwe soni ŵamasengo ŵakwe ni kwajinjisya m’nyumba.
21 Nambo jwalijose jwanganapikanila maloŵe ga Yehofa, ŵalesile pasa ŵamasengo ŵakwe soni yilango yakwe.
22 Sambano Yehofa ŵamsalile Mose kuti, “Mtambasukule mkono wenu ni mwulosye kwinani, ni chakulinga chakuti matalila gagwe pachilambo chosope cha Iguputo. Matalilago chigagwile pa ŵandu, yinyama ni yakumela yosope ya m’chilambo cha Iguputo.”
23 Myoyo Mose ŵatambasukwile mkono wakwe ni kulanjila kwinani ni ndodo jakwe. Pelepo Yehofa ŵatendekasisye kuti kulindime soni kuti kugwe matalila, mwamti moto* wagwilile pachilambo chapasi. Yehofa ŵapitilisye kugwisya matalilago pachilambo chosope cha Iguputo.
24 Kwapalitu matalila soni moto waliji mkumesya pasikati pa matalilago. Matalilago galiji gekulungwa mnope gele nganigawonecheje chitandilile ŵandu kutama m’chilambo cha Iguputo.
25 Matalilago gajonasile chilichose chachaliji kusa m’chilambo chosope cha Iguputo, kutandila mundu mpaka chinyama. Gajonasile yakumela yosope soni kugwisya yitela yosope ya m’chilambocho.
26 Nambo kudela ja Goseni kuŵatamaga Ayisalayeli nganikugwa matalilago.
27 Myoyo Falawo ŵatumile ŵakutumichila ŵakwe kuti akamŵilanje Mose soni Aloni. Ali ayiche ŵasalile jemanjajo kuti, “Apa sambano ndemwisye. Yehofa ali jwakulungama soni une ni ŵandu ŵangu tuli ŵakulemwa.
28 Mumŵende Yehofa kuti alekasye kulindima soni matalilaga. Pachimtende yeleyi, chinamkunde kuti mjawuleje soni ngamtama akuno.”
29 Myoyo Mose ŵamjanjile jwalakwejo kuti, “Pachingambe kopoka mumsinda muno chingwesye makono gangu kwa Yehofa. Pelepo kulindimako chikuleche soni matalilago chigaleche kugwa ni chakulinga chakuti wawojo amanyilile kuti chilambo chapasi chili cha Yehofa.
30 Nambo une ngumanyilila kuti atamose yeleyi yili yitendekwe, wawojo soni ŵakutumichila ŵawo ngasatenda yindu yakulosya kumjogopa Yehofa Mlungu.”
31 Sambano fulakisi* soni balele yaliji yili yijonasiche ligongo balele jwaliji ali akomele soni fulakisi jwaliji ali atesile maluŵa.
32 Nambo tiligu ni sipeloti* nganiyijonasika ligongo syaliji mbeju syakomala mwakuchelewa.
33 Sambano Mose ŵatyosile pameso pa Falawo ni ŵakopweche mumsindamo. Kaneko ŵatambasukwile makono gakwe pameso pa Yehofa mwamti kulindima kula kwalesile soni matalila gala galesile kugwa, nambosoni wula jalesile kugwa pachilambo chapasi.
34 Sambano Falawo paŵayiweni kuti wula jila, matalila gala, soni kulindima kula kulesile ŵapitilisye kulemwa mwakuŵape jwakumula mtima. Jwalakwe ŵatesile yeleyi pampepe ni ŵakutumichila ŵakwe.
35 Myoyo Falawo jwapitilisye kuŵa jwakumula mtima soni nganiŵakunda Ayisalayeli kutyoka. Ŵatesile yeleyi mpela muŵaŵechetele Yehofa kupitila mwa Mose.
Maloŵe Gamwiŵanda
^ Pelepa komboleka akusala ya kumesya kwamachili kwa njasi.
^ Jeleji jaliji mbeju jiŵalimaga ku Iguputo soni ŵajikamulichisyaga masengo pakupanganya yakuwala.
^ Sipeloti uli mtundu wa tiligu nambo uli wanganong’a mpela tiligu jusyesyenejo. Kalakala ŵandu ŵa ku Iguputo ŵalimaga mbeju jeleji.
