Esitele 3:1-15
3 Panyuma pa yeleyi Mwenye Ahasiwelo ŵamkwesisye udindo Hamani, mwanache jwa Hamedata jwa mu mbumba* ja Agagi, mwamti ŵampele mpando wapenani mnope kupunda ŵakulongolela ŵane wosope ŵaŵaliji ni jwalakwe.
2 Nambosoni ŵakutumichila wosope ŵa mwenye ŵaŵatamaga pageti ŵatindiŵalaga pameso pa Hamani ni kwinama mpaka ngope syawo pasi. Ŵatendaga yeleyi ligongo ni yiŵalamwile mwenye kuti ŵandu atendeje pakumchimbichisya Hamanijo. Nambo Moledekayi jwakanaga kumtindiŵalila jwalakwe kapena kwinama mpaka ngope jakwe pasi.
3 Myoyo ŵakutumichila ŵa mwenye ŵaŵatamaga pa geti ja mwenye ŵamwusisye Moledekayijo kuti, “Ligongo chichi ngamkupikanila lilamusi lya mwenye?”
4 Lisiku lililyose jemanjaji ŵamwusyaga yeleyi, nambo jwalakwe nganiŵapikanilaga. Kaneko jemanjaji ŵamsalile Hamani kuti alole naga chayilechelele yakutenda ya Moledekayiyi. Pakuŵa Moledekayijo ŵaliji ali ŵasalile jemanjaji kuti jwalakwe ali Myuda.
5 Sambano Hamani paŵayiweni kuti Moledekayi akukana kumtindiŵalila ni kwinama mpaka ngope jakwe pasi, ŵatumbile mnope.
6 Nambo Hamani ŵayiweni kuti gamba kumwulaga Moledekayipe kuli kwangakwanila, pakuŵa ŵandu ŵamsalile Hamanijo pakwamba ya ŵandu ŵa mtundu wa Moledekayi. Myoyo Hamani jwatandite kusaka kwawulaga Ayuda wosope ŵaŵaliji mu ulamusi wa Ahasiwelo, ŵasakaga kwawulaga ŵandu wosope ŵa mtundu wa Moledekayi.
7 M’mwesi wandanda wawuli mwesi wa Nisani,* m’chaka cha 12 cha Mwenye Ahasiwelo, jemanjajo ŵatesile Puli (kugopolela kuti Kalotalota*) pameso pa Hamani kuti amanyilile lisiku* soni mwesi. Mwamti Pulijo jwagwilile m’mwesi wa 12 wawuli mwesi wa Adala.*
8 Kaneko Hamani ŵamsalile Mwenye Ahasiwelo kuti, “Pana ŵandu ŵane ŵakusimanikwa palipose mu yigawo* yosope ya ulamusi wawo. Malamusi gakusajendela jemanjaji gali gakulekangana ni gakusajendela ŵandu ŵane wosope. Nambosoni jemanjaji ŵangapikanila malamusi gawo wawo mwenye, soni naga agamba kwaleka jemanjaji nikuti yindu ngayajendela chenene wawo mwenye.
9 Naga mpaka yasangalasye wawo mwenye alembe lilamusi lyakuti ŵandu ŵeleŵa awulajidwe. Une chimbeleche kwa nduna matalente* gasilifa gakwana 10,000 kuti agaŵiche mwakusunjila chipanje cha mwenye.”*
10 Pelepo mwenyewo ŵawusile mbete jawo jakudindila ni kujipelaka kwa Hamani, mwanache jwa Hamedata juŵaliji jwa mu mbumba ja Agagi, jwelesoni ŵaliji mdani jwa Ayuda.
11 Mwenyewo ni ŵamsalile Hamanijo kuti, “Silifa soni ŵanduwo napeleche kwa mmwejo mtende nawo yamkusaka.”
12 Kaneko ŵaŵilasile alembi ŵa mwenye palisiku lya 13 lya mwesi wandanda. Jemanjaji ŵalembile mu yikalata yindu yosope yaŵalamwile Hamani kuti yijawule kwa ŵakulolela achibwanamkubwa, kwa achibwanamkubwa ŵakulolela yigawo soni kwa ŵakulongolela ŵa ŵandu ŵakulekanganalekangana. Ku chigawo chilichose ŵalembele mwakamulana ni muŵalembelaga ŵandu kweleko, soni mtundu uliwose wa ŵandu ŵawulembele m’chiŵecheto chawo. Yikalatayo ŵayilembile mu lina lya Mwenye Ahasiwelo soni ŵayidindile ni mbete jakudindila ja mwenye.
13 Kaneko yikalatayo ŵapelele ŵandu ŵakupeleka yikalata kuti ajawule nayo kuyigawo yosope ya mwenyewo. Mu yikalatamo ŵalamwile kuti ŵawulaje, ŵajonanje ni kwamala Ayuda wosope, chinga ŵachinandipile kapena achakulungwa chinga ŵanache kapena achakongwe. Ŵalamwile kuti atende yeleyi lisiku limo, palisiku lya 13 lya mwesi wa 12 wawuli mwesi wa Adala, nambosoni kuti ajigale katundu jwawo.
14 Yindu yaŵayilembile m’yikalatayo ŵayitamilikasisye kuti yiŵe lilamusi ku yigawo yosope. Soni ŵayigombelechesye kwa ŵandu wosope kuti ŵanduwo akosechele lisikulyo.
15 Ŵakupeleka yikalata ŵala ŵanyakwiche mwachitemachitema mwakamulana ni yaŵalamwile mwenye. Mwamti lilamusi lyapelechedwe ku Susani,* msinda waumwenye wakola yakulichenjela.* Kaneko mwenyewo yimpepe ni Hamani ŵatemi ni kumwaga, nambo ŵandu ŵa mu msinda wa Susani* ŵaliji ali asokonechele nganisyo, nganamanyililaga chachikutendekwa.
Maloŵe Gamwiŵanda
^ Alole Kugopolela kwa Malowe Gane.
^ Alole Yakumbesi B15.
^ Ŵane akusati Mayele.
^ Pelepa akwamba lisiku lyakwawulaga Ayuda.
^ Alole Yakumbesi B15.
^ Ku Mozambique akusati “províncias.”
^ Talente jimo jaŵaga jakusitopa makilogalamu 34.2. Alole Yakumbesi B14.
^ Kagopolele kanesoni, “Une chimbeleche matalente gakwana 10,000 mwakusunjila chipanje cha mwenye kuti ŵape ŵandu ŵachakamule masengo gelega.”
^ kapena kuti “Susa.”
^ Kapena kuti “nyumba jaumwenye.”
^ Kapena kuti “Susa.”
