Esitele 5:1-14
5 Palisiku lyatatu Esitele jwawete yakuwala yakwe yaumwenye ni kuja kwima mu luŵala lwamkati lwa ku nyumba ja mwenye. Jwalakwe ŵajimi mwakulolegana ni nyumba ja mwenyejo. Pandaŵijo mwenyewo ŵaliji ali atemi pampando wawo waumwenye mwakulolegana ni mlango ŵakwinjilila m’nyumba jaumwenyejo.
2 Mwenyewo paŵagambile kumwona Esitele juŵaliji ŵamkwawo mwenye ali ajimi mu luŵala lwa nyumbajo ŵasangalele mnope, mwamti mwenyewo ŵamlanjile Esitelejo ni ndodo jawo jagolide jajaliji mmyala mwawo. Kaneko Esitele ŵaŵandichile mwenyewo ni kukwaya kusonga kwa ndodojo.
3 Mwenyewo ŵamwusisye kuti, “Ana chisawisye chichi ŵamkwangu Esitele? Mkusaka kuŵenda chichi? Atamose mli mŵendile hafu ja umwenye wanguwu, unetu mpaka nampe.”
4 Pelepo Esitele ŵajanjile kuti, “Naga mpaka yasangalasye wawojo mwenye ngwaŵenda kuti lelo ayiche pampepe ni Hamani ku pwando janalinganyichisye wawojo.”
5 Pelepo mwenyewo ŵasalile ŵakutumichila ŵawo kuti, “Mjawule mkamsalile Hamani kuti ayiche akuno mwachitemachitema mwakamulana ni yaŵendile Esiteleyi.” Myoyo mwenyewo pampepe ni Hamani ŵapite ku pwando jaŵalinganyisye Esitelejo.
6 Jemanjajo ali mkumwa finyo pa pwandojo mwenyewo ŵamwusisye Esitelejo kuti, “Ana mkusaka kuŵenda chichi? Chilichose chamkusaka chinampe. Ana mkusaka namtendele chichi? Unetu mpaka nampe chilichose, atamose mli mŵendile hafu ja umwenye wanguwu.”
7 Esitele ŵajanjile mwenyewo kuti, “Unetu yangusaka kuŵenda yili yakuti;
8 Naga mpaka andosye umbone mtima soni naga mpaka yasangalasye wawojo mwenye kuti apikane yangusaka kuŵenda ni kundendela yangusakayo, wawo mwenye ayiche pampepe ni Hamani ku pwando jachinalinganyichisye malaŵi. Mwamti malaŵigo une chinjasalila yangusaka kuŵendayo mwakamulana ni maloŵe gawo wawo mwenye.”
9 Palisiku lyelelyo Hamani ŵatyosile ali mkusangalala mnope, nambotu Hamaniju paŵagambile kumwona Moledekayi ali pa geti ja ku nyumba ja mwenye, soni ali ayiweni kuti Moledekayijo nganajima ni kutetemelaga pameso pa jwalakwe, Hamani ŵamtumbilile mnope Moledekayijo.
10 Nambo Hamanijo ŵawukamwile mtima, mwamti ŵapite ku nyumba jakwe. Kaneko jwalakwe ŵaŵilasisye achimjakwe soni ŵamkwakwe, lina lyawo Selesi.
11 Sambano Hamani ŵatandite kulilapilila pameso pa achimjakwewo kuti jwana chipanje chejinji soni kuti jwana ŵanache ŵajinji. Nambosoni jwalakwe ŵatandite kulilapilila ligongo lyakuti mwenye ŵamkwesisye paudindo ni kumpa mpando wapenani mnope kwapunda ŵakulongolela ŵane wosope soni ŵakutumichila ŵa mwenye.
12 Hamani ŵaŵechetesoni kuti, “Konjechesya pelepa, Esitele ŵamkwawo mwenye ŵenewo, ŵambilasile une kuti napechesye mwenye kupwando jele ŵamkwawo mwenyewo ŵalinganyisye. Pangalisonitu jwine jwamŵilasile. Mwamti malaŵiga ambilasilesoni kuti ngaŵe ni ŵamkwawo mwenyewo pampepe ni mwenye.
13 Nambotu yosopeyi ngayikungwanila pangupitilisya kumwona Moledekayi, Myuda jula ali mkutama pa geti ja ku nyumba ja mwenye.”
14 Myoyo Selesi ŵamkwakwe ŵala soni achimjakwe wosope ŵala ŵamsalile jwalakwe kuti, “Ŵatume ŵandu kuti alinganye chitela, chiŵe chelewu makono 50. Soni malaŵi kundaŵi ŵasalile mwenye kuti Moledekayi akamkoleche pachitelacho. Kaneko ni akajawule ku pwandoko yimpepe ni mwenyewo kuti akasangalale.” Maloŵe gelega gamsangalesye mnope Hamani, mwamti jwasalile ŵandu kuti alinganye chitelacho.
