Genesesi 14:1-24
14 Masiku gelego Amulafeli ŵaliji mwenye jwa ku Sinala, Aliyoki ŵaliji mwenye jwa ku Elasa, Kedolaomele ŵaliji mwenye jwa ku Elamu soni Tidali ŵaliji mwenye jwa ku Goimu.
2 Mamwenye gelega gatesile ngondo ni Bela mwenye jwa ku Sodomu, Bilisa mwenye jwa ku Gomola, Sinabu mwenye jwa ku Adima, Semebeli mwenye jwa ku Seboyimu soni mwenye jwa ku Bela kwakuli ku Sowali.
3 Mamwenye gosopega gakamulene yakuti gakamenyane ku Chiŵata* cha Sidimu kwakuli ku Nyasa ja Njete.*
4 Pandanda mamwenye gelega galiji pasi pa ulamusi wa mwenye Kedolaomele kwa yaka 12. Nambo mu chaka cha 13 mamwenyega gajimuchile ulamusi wa mwenyeju.
5 Myoyo mu chaka cha 14 mwenye Kedolaomele yimpepe ni mamwenye gagaliji kumbali jakwe ŵayiche kukwagomeka Alefaimu ku Asiteloti-kalinaimu, Asusimu ku Hamu soni Aemimu ku Safe-kiliyataimu.
6 Ŵagomechesoni ŵandu ŵa ku Holi ŵaŵatamaga ku matumbi ga Seili mpaka kuja kwika ku dela ja Eli-palani jajaliji kuchipululu.
7 Kaneko jemanjaji ŵagalawiche ni kwawula ku Eni-misipati kwakuli Kadesi. Kweleko ŵagomeche dela josope ja Aamaleki soni ŵagomeche Aamoli ŵaŵatamaga ku Hasasoni-tamala.
8 Jeleji ni ndaŵi jele mwenye jwa ku Sodomu ŵanyakwiche kuti akapute nawo ngondo. Mwenyeju jwanyakwiche yimpepe ni mwenye jwa ku Gomola, mwenye jwa ku Adima, mwenye jwa ku Seboyimu soni mwenye jwa ku Bela kwakuli ku Sowali. Jemanjaji ŵajimi mwakosechela kuputa ngondo pampepe ni asilikali ŵawo ku Chiŵata cha Sidimu.
9 Ŵakosechele kumenyana ni Kedolaomele mwenye jwa ku Elamu, Tidali mwenye jwa ku Goimu, Amulafeli mwenye jwa ku Sinala soni Aliyoki mwenye jwa ku Elasa. Mamwenye mcheche gelega galimbene ni mamwenye msano.
10 Sambano Chiŵata cha Sidimu chakwete masimbo gejinji gakola lipula. Myoyo mamwenye ga ku Sodomu ni Gomola pagalingaga kutila, gagwilaga m’masimbo gelega soni ŵane ŵaŵasigele ŵatilile kumatumbi.
11 Kaneko ŵele ŵaŵapundile pangondojo ŵajigele yindu yosope ya mumsinda wa Sodomu ni Gomola kupwatikapo yakulya yawo yosope ni kwawulaga nayo.
12 Jemanjaji ŵamjigelesoni Loti mwanache jwa mlongo mjakwe Abulamu juŵatamaga mumsinda wa Sodomu. Ŵamjigele pampepe ni yindu yakwe yosope, ni kwawulaga najo.
13 Payatendekwe yeleyi, mundu jwine juŵakulupwiche kungondo kula ŵayiche kukumsalila Abulamu juŵaliji Mhebeli. Pandaŵiji Abulamu ŵaliji mkutama* pa yitela yineyakwe yekulungwakulungwa yele msyene jwaliji Mamule jwa ku Amoli juŵaliji mlongo mjawo jwa Esikolo ni Aneli. Jemanjaji ŵatesile ulongo ni Abulamu.
14 Pelepo Abulamu ŵapikene kuti mlongo mjakwe jula ajimgele mpela kapolo. Myoyo jwalakwe ŵasongangenye ŵandu ŵakwe ŵakumanyilila kuputa ngondo. Wosope ŵaliji ŵamasengo ŵakwe ŵakwana 318 ŵaŵapagwile m’nyumba jakwe. Jemanjaji ŵakuyisye adaniwo mpaka kuja kwika ku Dani.
15 Pachayiche chilo, Abulamu ŵagaŵenye ŵandu ŵakwewo m’magulu. Kaneko jwalakwe ni ŵamasengo ŵakwewo ŵajimuchile adaniwo ni kwagomeka, mwamti ŵakuyisye jemanjaji mpaka kuja kwika ku Hoba kwakuli kumpoto kwa Damasiko.
16 Jwalakwe jwakulupwisye katundu josope juŵasumwile ŵanduwo. Nambosoni ŵamkulupwisye Loti juŵaliji mlongo mjakwe pampepe ni yindu yakwe yosope soni achakongwe ni ŵandu ŵane.
17 Abulamu paŵawujaga kukumgomeka Kedolaomele yimpepe ni mamwenye gaŵaliji nago, mwenye jwa ku Sodomu ŵapite kuja kusimana ni Abulamu ku Chiŵata cha Safe chakumanyikwasoni kuti Chiŵata cha Mwenye.
18 Nambosoni Melekisedeki jwaŵaliji mwenye jwa ku Salemu ŵayiche nawo mkate* soni finyo. Jwalakwe ŵaliji jwakutaga mbopesi jwa Mlungu Jwakwinani Mnope.
19 Kaneko jwalakwe ŵampele upile Abulamu, mwamti jwaŵechete kuti:
“Abulamu apochele upile kutyochela kwa Mlungu Jwakwinani Mnopejo,Mlungu jwele ŵapanganyisye kwinani ni chilambo chapasi;
20 Achimbichikwe Mlungu Jwakwinani Mnope,Jwele jwapeleche adani ŵenu mmyala mwenu.”
Pelepo Abulamu ŵampele jwalakwejo chalikumi pa chindu chilichose.
21 Kaneko mwenye jwa ku Sodomu ŵamsalile Abulamu kuti, “Mumbe ŵandu ŵangu pewo, nambo yindu yine yosope mjigale kuti yiŵe yenu.”
22 Nambo Abulamu ŵamsalile mwenye jwa ku Sodomu kuti, “Ngulumbila* pameso pa Yehofa Mlungu Jwakwinani Mnope, jwele juŵapanganyisye kwinani soni chilambo chapasi.
23 Nganjigala chindu chilichose chachili chenu atamose ulusi kapena chingwe cha sapato jenu, kogopela pamalaŵi chimchiŵecheta kuti, ‘Une ni junamsichilisye Abulamu.’
24 Une nganjigala chilichose kulekapo yele yalile kala anyamata ŵanguŵa. Nambo pakwamba ya ŵandu ŵaŵalongene yimpepe ni une ŵali Aneli, Esikolo soni Mamule, ajigale yindu yakusosekwa kupochela.”
Maloŵe Gamwiŵanda
^ Chiŵata chili malo gakutuluka pasikati pa matumbi.
^ Jeleji jili Nyasa Jewe.
^ Kapena kuti, “ŵaliji mkutama m’matenti.”
^ Mikate jakala ŵajipanganyaga ni utandi wa tiligu kapena balele.
^ Mu Chihebeli ŵatiga, “Ngukwesya mkono wangu.”
