Genesesi 16:1-16
-
Hagala ni Isimayeli (1-16)
16 Sambano Salai ŵamkwakwe Abulamu nganiŵaŵelechela ŵamkwakwewo mwanache, nambo ŵakwete jwamasengo jwa ku Iguputo lina lyakwe Hagala.
2 Myoyo Salai ŵamsalile Abulamu kuti, “Yehofa andendekasisye kuti ngaŵeleka ŵanache. Myoyo agambe kugona ni jwamasengo jwanguju kuti mwine mpaka ngole ŵanache kupitila mwa jwalakwejo.” Pelepo Abulamu ŵapikanile yaŵaŵechete Salai.
3 Abulamu paŵatemi m’chilambo cha Kanani kwa yaka 10, Salai ŵaŵaliji ŵamkwakwe Abulamujo ŵamjigele jwamasengo jwakwe jwa ku Iguputo lina lyakwe Hagala ni kumpeleka kwa Abulamu kuti aŵe ŵamkwakwe.*
4 Myoyo Abulamu ŵagonile ni Hagala, mwamti jwalakwe ŵakwete msigo. Hagala pajwamanyilile kuti akwete msigo jwatandite kumtendela chipongwe Salai juŵaliji ambujegwe.
5 Pelepo Salai ŵamsalile Abulamu kuti, “Kulaga kungulagaku wawojo ni ŵatendekasisye. Une ni junampeleche jwamasengo jwangu mmyala mwawo. Nambo sambano jwalakwe payiweni kuti akwete msigo, atandite kundendela chipongwe. Myoyo Yehofa atuwelusye, naga une ndili jwakulemwa kapena wawojo.”
6 Pelepo Abulamu ŵamsalile Salai kuti, “Jwamasengojutu ali mmyala mwenu. Myoyo mtende najo chilichose chamkuchiwona kuŵa chakuŵajilwa.” Pelepo Salai ŵatandite kumlagasya Hagalajo mwamti mpaka jwatisile.
7 Kaneko lilayika lya Yehofa lyamsimene Hagala ali pachisima m’chipululu, palitala lyakwawula ku Suli.
8 Pelepo lilayikalyo lyamwusisye Hagala kuti, “Mmwe Hagala, jwamasengo jwa Salai, ana mkutyochela kwapi soni mkwawula kwapi?” Hagala ni ŵajanjile kuti, “Ngwatila ambuje ŵangu ŵakongwe Salai.”
9 Pelepo lilayika lya Yehofa lila lyamsalile kuti, “Mwujile kwa ambuje ŵenuwo soni mkalinandiye pameso pawo.”
10 Kaneko lilayika lya Yehofa lila lyamsalilesoni kuti, “Une chinjatupiya ŵanache* ŵenu mwamti chachiŵa ŵangaŵalanjika.”
11 Lilayika lya Yehofalyo lyapitilisye kuŵecheta kuti, “Apano mkwete msigo soni chimchiŵeleka mwanache jwamlume ni chimumpe lina lyakuti Isimayeli,* pakuŵa Yehofa apikene kulila kwenu.
12 Jwalakwe chachiŵa mpela bulu jwamwitinji.* Mkono wakwe uchilimbana ni mundu jwalijose, soni mkono wa mundu jwalijose uchilimbana ni jwalakwejo. Nambosoni jwalakwe chachitama mwakulekangana ni achalongo achimjakwe* wosope.”
13 Pelepo Hagala jwaŵilanjile pa lina lya Yehofa juŵaŵechetanaga najo, ŵatite, “Wawo ali Mlungu jwakulola chilichose.” Jwalakwe jwaŵechetesoni kuti, “Ana yisyene une nam’weni jwakusambonajo?”
14 Ni ligongo lyakwe chisimacho ŵachikolasile kuti Beeli-lahai-loi.* (Chisimachi chili pasikati pa Kadesi ni Beledi.)
15 Myoyo Hagala ŵamŵelechele Abulamu mwanache jwamlume, soni Abulamu ŵampele mwanachejo lina lyakuti Isimayeli.
16 Abulamu ŵaliji ni yaka 86 pandaŵi jele Hagala ŵaŵelekaga Isimayeli.
Maloŵe Gamwiŵanda
^ Pelepa nikuti Hagala ŵaŵele ŵamkwakwe ŵaŵili ŵa Abulamu.
^ Mu Chihebeli ŵatiga, “mbeju.”
^ Kugopolela kuti “Mlungu akusapikana.”
^ Chinyama chelechi chikwimila ndamo jakutenda yindu mwakulijimila pajika.
^ Kagopolele kanesoni, “jwalakwe chachitamaga mwakulimbana ni achalongo achimjakwe.”
^ Kugopolela kuti “chisima cha jwaumi jwambweni une.”
