Lefitiko 10:1-20
10 Kaneko Nadabu soni Abihu, ŵanache ŵa achalume ŵa Aloni, jwalijose ŵajigele chakupalila moto ni kuŵika makala ga moto soni ŵaŵisile ubani penani pakwe. Pelepo jemanjajo ŵatandite kututumisya ubaniwo pameso pa Yehofa pakamulichisya masengo moto wakutindana ni chilamusi, yele nganiŵalamula kuti ayitende.
2 Ndaŵi jijojo moto ŵatulwiche kutyochela kwa Yehofa ni kwatinisya jemanjajo mwamti ŵawilile pameso pa Yehofa papopo.
3 Pelepo Mose ŵamsalile Aloni kuti, “Ayi ni yaŵechete Yehofa, ‘Ŵandu wosope ŵakumbandichila une akumbuchileje kuti ndili jwamswela soni ŵandu wosope anjimbichisyeje.’” Pandaŵiji Aloni ŵagambile kutama jii ngaŵecheta chilichose.
4 Myoyo Mose ŵamŵilasile Misayeli ni Elisafani, ŵanache ŵa Usiyele apwawo babaŵawo Aloni, ni kwasalila kuti, “Myiche akuno mjigale mitembo ja achalongo achimjenu jajili pasogolo pa malo geswela ni kwawula najo kusa kwa malo gatukunjile matentiga.”
5 Myoyo jemanjajo ŵayiche pasogolo ni kujigala mitembo ja achalumewo, ŵaŵaliji chiwalile mikanjo jawo. Mitembojo ŵapite najo kusa kwa malo gaŵakunjile matenti gawo, mpela yaŵatite Mose pakwalamula jemanjajo.
6 Kaneko Mose ŵamsalile Aloni soni ŵanache ŵakwe ŵane ŵachalume ŵali Eliyesala soni Itamala kuti, “Mkaleka wumbo syenu syangasamalila soni mkapapula yakuwala yenu pakogopela kuti mpaka m’we, nambosoni Mlungu mpaka ŵatumbilile Ayisalayeli wosope. Ayisalayeli wosope ŵali achalongo achimjenu ni ŵachalile malilo ga ŵandu ŵaŵawuleje Yehofa ni motowo.
7 Jemanja mkatyoka kumlango wa chitenti chakusimanilana kuno. Naga mkutyoka chim’we ligongo Yehofa amsagwile jemanja ni mawuta kuti mŵe ŵakutaga mbopesi.” Pelepo jemanjajo ŵatesile mwakamulana ni maloŵe ga Mosego.
8 Kaneko Yehofa ŵamsalile Aloni kuti,
9 “Mmwejo soni ŵanache ŵenu mkamwaga finyo kapena yakumwa yiliyose yampaka yimtendekasye kukolelwa pamkwika ku chitenti chakusimanilana. Mŵambaleje kutenda yeleyi kuti mkawa. Lyeleli lili lilamusi lyakuti mkuyeje ku mibado* jenu josope mpaka kalakala.
10 Yeleyi yili myoyo ni chakulinga chakuti jemanja mkomboleje kulekanganya pasikati pa chindu chakundidwa ni Mlungu ni chindu changakundidwa, soni pasikati pa chindu changaswejela ni chindu cheswela.
11 Yili myoyosoni ni chakulinga chakuti mkomboleje kwajiganya Ayisalayeli malamusi gosope gapeleche Yehofa kwa jemanjajo kupitila mwa Mose.”
12 Kaneko Mose ŵamsalile Aloni soni ŵanache ŵakwe ŵaŵasigele ŵala ŵali Eliyesala soni Itamala kuti, “Mjigale mbopesi jambeju jajisigele kutyochela pa mbopesi syakwawula kwa Yehofa syakocha pamoto ni mpanganye mikate* jangali yakusasaŵisya. Mikatejo mkalile chiŵandika malo gakupelechela mbopesi ligongo mikatejo jili yindu yeswela mnope.
13 Mlileje mikate jeleji kumalo geswela ligongo jeleji jili mbali jenu jakupochela soni mbali jamkupochela ŵanache ŵenu kutyochela pa mbopesi syakwawula kwa Yehofa syakocha pamoto, pakuŵa yeleyi ni yaŵandamwile Mlungu.
14 Mkalilesoni pamalo geswela* chidali cha nyama ja mbopesi jakuyuya nambosoni lukongolo lwakunyuma lwakumlyo lwachimpochele mpela mbali japadela. Mlyeje mmwejo, ŵanache ŵenu ŵachalume soni ŵanache ŵenu ŵachakongwe ligongo yindu yeleyi ayipeleche kwa jemanja mpela mbali jamkupochela mmwejo soni ŵanache ŵenu kutyochela pa mbopesi syamkamulano sya Ayisalayeli.
15 Ayisalayeliwo ayicheje ni lukongolo lwachapeleche mpela mbali japadela soni chidali cha nyama ja mbopesi jakuyuya pampepe ni mawuta ga mbopesi jakocha pamoto. Yindu yeleyi myikwesyeje mwinani ni kuyiyuya aku nakuku pameso pa Yehofa. Mmwejo soni ŵanache ŵenu ŵa achalume mjigaleje yindu yeleyi mpela mbali jenu jamkupochela mpaka kalakala, mpela yaŵatite Yehofa pakundamula.”
16 Kaneko Mose ŵajisosilesosile nyama ja mbusi jakusigala pa mbopesi jaulemwa, nambo ŵajisimene kuti ajijochiche kala josope jenejo pamoto. Pelepo Mose ŵamtumbilile mnope Eliyesala soni Itamala ŵali ŵanache ŵachalume ŵa Aloni ŵaŵasigele ŵala, mwamti ŵatite,
17 “Ligongo chichi nganimlya nyama ja mbopesi jaulemwa? Mwasosekwagatu kulila nyama jelejo kumalo geswela, pakuŵa nyamajo jili chindu cheswela mnope. Nyamajo ŵajipeleche kwa jemanja kuti mwatyochesye Ayisalayeli wosope ulemwa wawo soni kuti msimasye ulemwa wa jemanjajo pameso pa Yehofa.
18 Nambosonitu pangali atamose jumo jwajinjile kumalo geswela ni myasi ja mbopesi jaulemwajo. Mwasosekwagatu kulila nyamajo kumalo geswela, mpela yaŵatite pakundamula.”
19 Pelepo Aloni ŵamjanjile Mose kuti, “Mpikane, ngati m’yiweni yayindendechele lelo jemanjaji papeleche kwa Yehofa mbopesi jawo jaulemwa soni mbopesi jawo jakutinisya? Nambi yikaŵe kuti lelo ndile mbopesi jaulemwajo, ana yikamsangalesye Yehofa?”
20 Mose paŵapikene yeleyi yamkamwile mtima.
Maloŵe Gamwiŵanda
^ Ku Mozambique akusati “geração.”
^ Mikate jakala ŵajipanganyaga ni utandi wa tiligu kapena balele.
^ Kapena kuti, “pamalo geswela mwakamulana ni Chilamusi.”
