Lefitiko 21:1-24
21 Yehofa ŵapitilisye kuŵecheta ni Mose kuti, “Mŵechetane ni ŵakutaga mbopesi, ŵali ŵanache ŵa Aloni. Mwasalile jemanjajo kuti, ‘Pakasimanikwa jwakutaga mbopesi jwakulisakasya ni mtembo pasikati pa ŵandu ŵakwe.
2 Nambo mpaka alisakasye naga mundu jwawilejo ali mlongo mjakwe jwa myasi jimo, mwachisyasyo mamagwe, babagwe, mwanache jwakwe jwamlume, mwanache jwakwe jwamkongwe, akulugwe kapena mpwakwe.
3 Mpaka alisakasyesoni naga jwawilejo ali alumbugwe ŵa myasi jimo ŵele nganagoneje ni jwamlume soni ŵele nganaŵe kulombela.
4 Nambo ngakusosekwa kulisakasya ni kuŵa ŵangaswejela ligongo lya mtembo wa jwamkongwe jwa mundu jwine jwakutyochela pasikati pa ŵandu ŵakwe.
5 Jwakutaga mbopesi ngakusosekwa kumyola lupala, kumyola ndewu sya m’majeje kapenasoni kulikatakata pachilu chakwe.
6 Jemanjajo akusosekwa kuŵa ŵaswela pameso pa Mlungu jwawo, nambosoni akasakasyaga lina lya Mlungu jwawo, pakuŵa jemanjajo ni ŵakupeleka kwa Yehofa mbopesi syakocha pamoto. Mbopesi syelesi sili mpela yakulya ya Mlungu. Myoyo jemanjajo akusosekwa kuŵa ŵaswela.
7 Ŵakutaga mbopesi ngakusosekwa kulombela lihule kapena jwamkongwe juŵagonilepo ni ŵalume kapenasoni jwamkongwe juŵamlesile ŵamkwakwe ulombela. Akatendaga yeleyi ligongo lyakuti jwakutaga mbopesi ali jwamswela pameso pa Mlungu jwakwe.
8 Jemanja mwawoneje ŵakutaga mbopesi kuŵa ŵaswela ligongo lyakuti jemanjaji ni ŵakusapeleka yakulya ya Mlungu. Jwakutaga mbopesi mumwoneje kuŵa jwamswela, ligongo une Yehofa jwangumswejesya jemanja ndili jwamswela.
9 “‘Naga mwanache jwamkongwe jwa jwakutaga mbopesi alisakesye mwakutenda uhule, pelepo ŵasakesyesoni babagwe. Mwanache jwelejo mkusosekwa kumjocha pamoto.
10 “‘Mundu jwakutumichila mpela jwamkulungwa jwa ŵakutaga mbopesi pasikati pa ŵakutaga mbopesi achimjakwe,* juŵamsagwile mwakumtaga mawuta pamtwe pakwe, soni juŵamŵisile kuti awaleje yakuwala yapadela ya jwakutaga mbopesi, jwelejo ngakusosekwa kusileka wumbo syakwe ngasisamalila kapena kupapula yakuwala yakwe.
11 Jwamkulungwa jwa ŵakutaga mbopesi ngakusosekwa kuŵandichila mtembo wa mundu jwalijose. Jwalakwe ngakusosekwa kulisakasya ni mtembo atamose wa babagwe kapena wa mamagwe.
12 Jwalakwejo ngakusosekwa kutyoka ku chitenti cha Mlungu, soni ngakusosekwa kuchisakasya chitenti cha Mlungucho. Yili myoyo ligongo lyakuti jwalakwe ŵamsagwile mwakumtaga mawuta pamtwe pakwe. Mawuta gelega gali chimanyisyo cha kulipeleka kwakwe. Une ndili Yehofa Mlungu jwenu.
13 “‘Jwakutaga mbopesi alombeleje jwamkongwe jwanganagonanejepo ni ŵalume.
14 Jwalakwe ngakusosekwa kulombela jwamkongwe jwamasije, jwamkongwe juŵamlesile ulombela ŵamkwakwe, jwamkongwe juŵagonilepo ni ŵalume, kapenasoni lihule. Nambo akusosekwa kulombela jwamkongwe kutyochela pasikati pa ŵandu ŵakwe jwakuti nganagonejepo ni ŵalume.
15 Jwalakwe ngakusosekwa kwasakasya ŵanache ŵakwe pasikati pa ŵandu ŵakwe, ligongo une ndili Yehofa jwangumswejesya jwalakwejo.’”
16 Yehofa ŵapitilisye kuŵecheta ni Mose kuti,
17 “Mumsalile Aloni kuti, ‘Mwanache jwenu jwalijose jwamlume jwali jwamlemale akayikaga kukupeleka mkate* kwa Mlungu. Mkuyeje yeleyi ku mibado* jenu josope mpaka kalakala.
18 Naga apali mundu jwamlemale, jwelejo akayikaga kumalo gakupelechela mbopesi, chinga mundujo ali jwangalola, jwamlemale ngongolo, jwamlemale kungope* kapenasoni jwamlewu lukongolo lumo kapena mkono umo.
19 Chinga mundujo ali jwamwulale lusajo kapena mkono,
20 mundu jwamtulumbale chindu pamgongo, mundu jwamjipi mwakulemala,* jwamlemale liso, mundu jwakwete ulwele wakunyanya pachilu, mundu jwakwete yiŵengwa kapena jwamkasiche kuyalo.*
21 Jwamlume jwalijose jwali jwamlemale pasikati pa ŵanache ŵa jwakutaga mbopesi Aloni, akayikaga pamalo gakupelechela mbopesi kuti apeleche kwa Yehofa mbopesi syakocha pamoto. Ligongo lyakuti ali jwamlemale, jwalakwe akayikaga kukupeleka mkate kwa Mlungu jwakwe.
22 Jwalakwe mpaka alye yakulya ya Mlungu jwakwe kutyochela pa yindu yayili yeswela. Mpaka alyesoni yakulya kutyochela pa yindu yayili yeswela mnope.
23 Nambope jwalakwe ngakusosekwa kuŵandichila likatani nambosoni akayika pamalo gakupelechela mbopesi ligongo lyakuti jwalakwejo ali jwamlemale. Ngakusosekwa kusakasya malo gangu geswela, ligongo une ndili Yehofa jwangwaswejesya jemanjajo.’”
24 Myoyo Mose ŵamsalile yindu yeleyi Aloni, ŵanache ŵakwe nambosoni Ayisalayeli wosope.
Maloŵe Gamwiŵanda
^ Mu Chihebeli ŵatiga, “achalongo achimjakwe.”
^ Mikate jakala ŵajipanganyaga ni utandi wa tiligu kapena balele.
^ Ku Mozambique akusati “geração.”
^ Mu Chihebeli ŵatiga, “jwamlemale lupula.”
^ Kagopolele kanesoni, “mundu jwamnyolole chilu.”
^ Pelepa akwamba jwamkasiche mabatile. Ŵane akusati “sugama.”
