Lefitiko 5:1-19
5 “‘Naga mundu am’weni jwine ali mkutenda ulemwa kapena amanyilile ya ulemwawo, mundu jwelejo ali mboni. Sambano naga akupikana kuŵilanga* kuti akapelechele umboni nganijo nambo ngakwawula kukupelechela umboniwo, pelepo jwalakwejo alemwisye. Mundu jwelejo akusosekwa kwanga magambo pakulemwa kwakweko.
2 “‘Kapena naga mundu akwayiye chindu chilichose changaswejela, chinga chinyama chamwitinji chewe chachili changaswejela kapena chinyama chakulanga chewe chachili changaswejela, kapenasoni yaumi yamwanamwana yangaswejela yewe yayikusajenda m’tumagulu, mundu jwakwayiye yeleyi ali jwangaswejela. Mundu jweleju akwete magambo atamose kuti atesile yeleyi ali ngakumanyilila.
3 Kapena naga jwine mwangamanyilila akwayiye chindu chilichose changaswejela chakwayana ni mundu champaka chimtendekasye kuti aŵe jwangaswejela panyuma pakwe ni kumanyilila yeleyi, jwalakwe akwete magambo atamose kuti atesile yeleyo mwangamanyilila.
4 “‘Kapena naga mundu jwine awutuchile kulumbila kuti chatende chine chakwe chinga chambone kapena chakusakala mwamti atesile yeleyi mwangamanyilila, jwalakwe akwete magambo* atamose kuti amanyilile mwakuchelewa kuti ŵawutuchile kulumbila.
5 “‘Naga mundu akwete magambo ligongo lyakuti atesile chimo mwa yindu yeleyi, akusosekwa akasale ulemwa watesilewo.
6 Jwalakwe ayicheje najo kwa Yehofa mbopesi jamagambo ligongo lya ulemwa watesilewo. Mbopesi jakwe jiŵeje mwanache jwa ngondolo jwamkolo kapena mwanache jwa mbusi jwamkolo kuti juŵe mbopesi jaulemwa wakwe. Kaneko jwakutaga mbopesi chachisimasya ulemwa wa mundujo.
7 “‘Naga nganaŵa akwanisye kupata ngondolo kapena mbusi, ayicheje kwa Yehofa ni mawunda gaŵili kapena ŵanache ŵaŵili ŵa njuŵa kuti aŵe mbopesi jakwe jamagambo ligongo lya ulemwa watesilewo. Chijuni chimo chiŵe cha mbopesi jaulemwa soni chijakwecho chiŵe cha mbopesi jakutinisya.
8 Jwalakwe ayicheje nayo yijuniyo kwa jwakutaga mbopesi, ni jwakutaga mbopesijo asikiteje chijuni chimocho nambo mwangamalisya lukosi losope kuti chiŵe mbopesi jaulemwa wa mundujo.
9 Jwakutaga mbopesijo amisileje jine mwa myasi ja chijuni cha mbopesi jaulemwacho mumbali mwa malo gakupelechela mbopesi. Nambo myasi jine josope ja chijunicho ajisuluchisyeje pasi mumbali mwa malo gakupelechela mbopesigo. Jeleji jili mbopesi jaulemwa.
10 Nambo chijuni chinecho achipelecheje kuti chiŵe mbopesi jakutinisya pakukuya yakusatenda pakupeleka mbopesi jakutinisya. Kaneko jwakutaga mbopesi chachisimasya ulemwa wa mundujo mwamti yakulemwa yakweyo yichikululuchidwa.
11 “‘Sambano naga mundujo nganaŵa akwanisye kupata mawunda gaŵili kapena ŵanache ŵaŵili ŵa njuŵa, jwalakwejo ayicheje ni utandi wetililiche mlingo wakwe uŵeje mbali jimo kutyochela pa mbali 10 sya efa jimo* kuti uŵe mbopesi jaulemwa wakwewo. Utandiwo akawuwanganya ni mawuta kapena kuŵikamo ubani, pakuŵa jeleji jili mbopesi jaulemwa.
12 Jwalakwe ayicheje nawo utandiwo kwa jwakutaga mbopesi. Kaneko jwakutaga mbopesijo asapuleje utandiwo kugumbala ligasa limo kuti ujimile mbopesi josopejo ni kuwujocha pamoto pamalo gakupelechela mbopesi kuti ukoposyeje lyosi. Utandiwo awujocheleje penani pa mbopesi sya Yehofa syasili kala pamoto. Jeleji jili mbopesi jaulemwa.
13 Pambesi pakwe jwakutaga mbopesi chachisimasya ulemwa wa mundujo. Chachitenda yeleyi paulemwa uliwose mwa maulemwa gelega mwamti chachikululuchidwa. Utandi wosope wakusigala pambopesijo uŵeje wa jwakutaga mbopesi, mpelaga mwayikusaŵela ni mbopesi jambeju.’”
14 Yehofa ŵapitilisye kuŵecheta ni Mose kuti,
15 “Naga mundu atesile mwangakulupichika kwa Mlungu mwamti alemwisye mwangosi mwakukamulichisya masengo mwakulemwecheka yindu yeswela ya Yehofa, jwalakwe ajigaleje ngondolo jamkambako jangalemala ni kwika najo kwa Yehofa kuti jiŵe mbopesi jamagambo gakwe. Mtengo wa ngondolojo uŵeje mbiya syasilifa sya sekeli,* usito wakwe uŵe wakamulana ni usito wa liganga lyakupimila lya sekeli lya kumalo geswela.
16 Kaneko mundujo alipileje ni mbiya syasilifa yindu yakamulichisye masengo mwakulemwechekayo, soni pa mbiya syachalipilesyo, pa mbiya msano silisyose ajonjechesyejepo mbiya jimo. Pambesi pakwe jwakutaga mbopesijo ajigaleje mbiyasyo pampepe ni ngondolo jamkambako ja mbopesi jamagambo jila ni kusimasya ulemwa wa mundujo. Pelepo ulemwa wa mundujo uchikululuchidwa.
17 “Naga mundu jwine alemwisye mwakutenda chindu chele Yehofa ŵalamwile kuti ngakusosekwa kuchitenda atamose kuti atesile chinducho mwangamanyilila, jwalakwe akwete magambo soni akusosekwa kwanga magambo gakwego.
18 Jwalakwe ajigaleje ngondolo jamkambako jangalemala ni kwika najo kwa jwakutaga mbopesi kuti jiŵe mbopesi jamagambo gakwe. Mtengo wa ngondolojo uŵeje wakamulana ni mtengo wakusosechela kupeleka. Kaneko jwakutaga mbopesijo chachisimasya ulemwa wa mundujo uŵatesile mwangosiwo, mwamti yakulemwa ya mundujo yichikululuchidwa.
19 Pakuŵa jwalakwe akwete magambo ligongo lyakuti amlemwechesye Yehofa, akusosekwa kupeleka mbopesi jamagamboji.”
Maloŵe Gamwiŵanda
^ Kapena kuti, “apikene kutembelela.” Komboleka kuti gelega galiji maloŵe gakumtembelela mundu jwatesile chakulemwajo kapena mundu jwamanyilile ulemwawo nambo ni ngayika kukupelechela umboni.
^ Yikuwoneka kuti mundujo jwaŵaga ni magambo ligongo lyakuti alepele kukwanilisya yalumbileyo.
^ Mlingo welewu uli chiŵandika kilogalamu jimo. Alole Yakumbesi B14.
^ Sekeli jimo jaŵaga jakusitopa magalamu 11.4. Alole Yakumbesi B14.
