Lefitiko 6:1-30
6 Yehofa ŵapitilisye kuŵecheta ni Mose kuti,
2 “Naga mundu alemwisye soni atesile yindu mwangakulupichika pameso pa Yehofa, mwakumlambusya mjakwe pa yindu yaŵamsunjisye kapena amjiŵile jwalakwe mwachinyengo kapenasoni kumjiŵila pakamulichisya masengo machili,
3 mwinesoni alokwete chindu cha msyene ni panyuma pakwe akulambusya pakwamba ya chinducho, soni naga alumbile mwaunami paulemwa watesile mwa maulemwa gelega, jwalakwejo akusosekwa kutenda yindu ayi:
4 Naga atesile chimo mwa yindu yeleyi ni kukola magambo, jwalakwe awuchisyeje chindu chiŵajiŵilecho, chinga chiŵajiŵile pakamulichisya masengo machili kapenasoni chiŵajiŵile mwachinyengo. Awuchisyejesoni chindu chaŵamsunjisye mjakwecho kapena chindu chaŵalokwetecho,
5 kapenasoni chindu chilichose chiŵalumbilile mwaunami. Awuchisyeje chinducho soni ajonjechesyepo panandi.* Mundujo akawuchisyeje chinducho palisiku lyayimanyiche kuti jwalakwejo ali jwakulemwa.
6 Kaneko mundujo ajigaleje ngondolo jamkambako jangalemala ni kwika najo kwa jwakutaga mbopesi kuti ajipeleche kwa Yehofa kuti jiŵe mbopesi jamagambo ga mundujo. Ngondolo ja mbopesi jamagambojo jiŵeje jakamulana ni mtengo wamlamwile.
7 Jwakutaga mbopesi chachisimasya ulemwa wa jwalakwejo pameso pa Yehofa mwamti yiliyose yaŵatesile yayamtendekasisye kuti akole magambo yichikululuchidwa.”
8 Yehofa ŵapitilisye kuŵecheta ni Mose kuti,
9 “Mumsalile Aloni soni ŵanache ŵakwe kuti, ‘Lilamusi lya mbopesi jakutinisya ni ali: Mbopesi jakutinisya jitameje pamoto penani pamalo gakupelechela mbopesi chilo chosope mpaka kundaŵi. Motowo ukasimaga pamalo gakupelechela mbopesigo.
10 Jwakutaga mbopesi awaleje chakuwala chakwe chakamulila masengo. Nambosoni mkati mwakwe awaleje kabudula* kuti jusiŵeje chilu chakwe. Kaneko jwalakwejo atyosyeje liwu* lya mbopesi jakutinisya jajipile ni moto pamalo gakupelechela mbopesi. Liwulyo aliŵicheje mumbali mwa malo gakupelechela mbopesigo.
11 Panyuma pakwe awuleje yakuwala yakwe yila ni kuwala yakuwala yine. Kaneko ajigaleje liwulyo nikuja kwasa kumalo gambone kusa kwa malo gakunjile matenti gawo.
12 Pamalo gakupelechela mbopesi, moto ukasimaga, ugambeje kukolelape. Jwakutaga mbopesi akwisileje sasu kundaŵi kulikose soni aŵicheje mbopesi jakutinisya pasasupo. Penani pa mbopesijo ajocheleje mawuta ga mbopesi jamkamulano kuti gakoposyeje lyosi.
13 Pamalo gakupelechela mbopesi moto ukasimaga, ugambeje kukolelape ndaŵi syosope.
14 “‘Sambano ali ni lilamusi lyakwayana ni mbopesi jambeju: Jemanja ŵanache ŵa Aloni mjigaleje mbopesijo ni kwika najo pameso pa Yehofa kumalo gakupelechela mbopesi.
15 Sambano jumo mwa ŵanachewo asapuleje kugumbala ligasa limo utandi wetililiche wewanganye ni mawuta wa mbopesi jambeju. Ajigaleje utandiwo pampepe ni ubani wosope waŵisile mu mbopesi jambejujo kuti yijimile mbopesi josope jenejo. Kaneko ayijocheje pamoto yosope yeneyi pamalo gakupelechela mbopesi kuti yikoposyeje lyosi lya kaliwungo kambone kakumsangalasya* Yehofa.
16 Aloni soni ŵanache ŵakwe ajigaleje utandi wakusigala pa mbopesi jambejujo kuti uŵe wawo. Utandiwo awukamulichisyeje masengo pakupanganya mikate* jangali yakusasaŵisya, soni mikatejo alileje kumalo geswela mu luŵala lwa chitenti chakusimanilana.
17 Pakuteleka mkatewo mkawanganyaga ni yakusasaŵisya yiliyose. Napele yeleyi mpela mbali jawo kutyochela pa mbopesi syangu syakocha pamoto. Yeleyi yili yeswela mnope mpela mwajiŵelele mbopesi jaulemwa soni mbopesi jamagambo.
18 Mwanache jwamlume jwalijose jwakupagwa mu msela wa Aloni alyeje yindu yeleyi. Jeleji jili mbali jawo jachapocheleje jemanjaji ndaŵi syosope kutyochela pa mbopesi syakwawula kwa Yehofa syakocha pamoto. Chilichose chachikwayiye mbopesijo achiwoneje kuŵa cheswela.’”
19 Yehofa ŵaŵechetesoni ni Mose kuti,
20 “Aloni soni ŵanache ŵakwe ndaŵi syosope apelecheje mbopesi aji kwa Yehofa pa lisiku lyasagulidwe kuŵa jwamkulungwa jwa ŵakutaga mbopesi: apelecheje utandi wetililiche mlingo wakwe uŵeje mbali jimo kutyochela pa mbali 10 sya efa jimo,* kuti uŵe mbopesi jambeju. Ajigaleje hafu ja utandiwo ni kuwupeleka kundaŵi soni hafu jinejo ni kuwupeleka ligulo.
21 Ajigaleje utandiwo pampepe ni mawuta ni kutelechela mikate m’chiwaya. Mikatejo ajigaŵanyegaŵanyeje ni kujiwanganya chenene ni mawuta, kaneko ajipelecheje kuti jiŵe mbopesi jambeju ja kaliwungo kambone kakumsangalasya* Yehofa.
22 Mwanache jwalijose jwakupagwa kutyochela mu msela wa Aloni juchachisagulidwa kuti ajinjile mmalo mwa jwamkulungwa jwa ŵakutaga mbopesi chachisosekwagasoni kupeleka mbopesi jeleji. Mbopesi josope jenejo ajijocheje pamoto kuti jikoposyeje lyosi lyakuti lijawuleje kwa Yehofa. Lyeleli lili lilamusi lyakuti akuyeje mpaka kalakala.
23 Mbopesi jilijose jambeju jele msyene jwakwe ali jwakutaga mbopesi ajijocheje josope jenejo, jikasigalaga jine jakuti mundu alye.”
24 Yehofa ŵaŵechetesoni kwa Mose kuti,
25 “Mumsalile Aloni soni ŵanache ŵakwe kuti, ‘Lilamusi lyakwamba mbopesi jaulemwa ni ali: Chilango cha mbopesi jaulemwa achisikitileje pameso pa Yehofa pamalo gakusasikitila chilango cha mbopesi jakutinisya. Mbopesi jeleji jili chindu cheswela mnope.
26 Jwakutaga mbopesi jwachapeleche nyama ja mbopesi jaulemwajo, alyeje nawo nyamajo. Nyamajo alileje kumalo geswela mu luŵala lwa chitenti chakusimanilana.
27 “‘Chindu chilichose chachikwayiye nyama ja mbopesijo achiwoneje kuŵa cheswela. Naga myasi jigwilile pa chakuwala cha mundu jwine, chakuwalacho achichapileje kumalo geswela.
28 Chiŵiga chakamulichisye masengo pakuteleka nyamajo achikasanyeje. Nambo naga atelechele mu chiwiya* cha chisyano cha kopa achikwecheje ni kuchigulula ni mesi.
29 “‘Jwamlume jwalijose jwali jwakutaga mbopesi alyeje nyamajo. Nyama ja mbopesijo jili chindu cheswela mnope.
30 Nambo akalya nyama ja mbopesi jaulemwa jele myasi jakwe jine ŵajinjile najo m’malo geswela mu chitenti chakusimanilana kukusimasya ulemwa. Nyama jelejo ajijocheje josope jenejo pamoto.
Maloŵe Gamwiŵanda
^ Kapena kuti, “Alipileje ni mbiya syasilifa mtengo wa chinducho, soni pa mbiya syachalipilesyo, pa mbiya msano silisyose ajonjechesyejepo mbiya jimo.”
^ Kapena kuti, “kabudula jwamkati.”
^ Kapena kuti, “liwu lyamawuta,” pelepa akwamba liwu lyewanganyichilane ni mawuta gakugwa kutyochela pambopesi.
^ Kapena kuti, “kakumnonyelesya.” Mu Chihebeli ŵatiga, “kakumtamika mtima pasi.”
^ Mikate jakala ŵajipanganyaga ni utandi wa tiligu kapena balele.
^ Mlingo welewu uli chiŵandika kilogalamu jimo. Alole Yakumbesi B14.
^ Kapena kuti, “kakumnonyelesya.” Mu Chihebeli ŵatiga, “kakumtamika mtima pasi.”
^ Ŵane akusati “chisuso.”
