Ngani Syambone Syaŵalembile Luka 23:1-56
23 Kaneko gulu josope ja ŵanduwo janyakwiche, ni kwawula najo Yesu kwa Pilato.
2 Kweleko jemanjajo ŵatandite kumjimba magambo kuti, “Tumsimene mundu aju ali mkwasokonasya ŵandu ŵa mtundu wetu. Akwalekasyaga kupeleka msongo kwa Kaisala, soni akulikolanga kuti ali Klistu, mwenye.”
3 Pelepo Pilato ŵamwusisye Yesu kuti, “Ana mmweji mli Mwenye jwa Ayuda?” Yesu ŵajanjile kuti, “Wawojo asyene ni ŵakuŵecheta yeleyi.”
4 Kaneko Pilato ŵasalile ŵakulolela ŵakutaga mbopesi soni gulu ja ŵanduwo kuti, “Ngangumsimana ni magambo galigose mundu jweleju.”
5 Nambo jemanjajo ŵalimbichile kuŵecheta kuti, “Jweleju akwasokonasya mnope ŵandu. Akwiganya mu Yudeya mosope, kutandila ku Galileya, soni mpaka akuno.”
6 Paŵapikene yeleyo, Pilato ŵasachile kumanyilila naga mundujo jwaliji jwa ku Galileya.
7 Paŵayimanyi kuti jwaliji jwakutyochela mu chigawo* chakulamulilidwa ni Helodi, ŵamtumisye kwa Helodijo jwele m’masiku gelego jwaliji ku Yelusalemu kukoko.
8 Helodi paŵam’weni Yesu jwasangalele mnope. Kwa ndaŵi jelewu nditu jwalakwe ŵasachililaga kumwona Yesu ligongo jwaliji mkupikana yejinji yakwamba jwalakwejo, soni jwajembecheyaga kumwona Yesu ali mkutenda yakusimonjesya.
9 Myoyo ŵatandite kumwusya yiwusyo yejinji, nambo jwalakwe nganajangaga chilichose.
10 Nambope, ŵakulolela ŵakutaga mbopesi soni alembi ŵajawulaga kusogolo ni kumŵechetelaga yachipongwe mwaukali.
11 Pelepo Helodi pampepe ni asilikali ŵakwe ŵatandite kumnyosya Yesu. Ŵamtendele yachipongwe mwakum’wecha chakuwala chakusalala mnope, kaneko ŵamtumisye kwa Pilato.
12 Lisiku lilyolyo, Helodi ni Pilato ŵatandite kamulana, pakuŵa yeleyi mkaniyitendekwe jemanjaji ŵaliji ŵakuŵengana mnope.
13 Kaneko Pilato jwaŵilasile ŵakulolela ŵakutaga mbopesi, ŵakulamulila soni ŵandu ŵane
14 ni ŵasalile kuti, “Jemanja mwayiche ni mundu aju kwa une soni mtiteje akwalimbikasya ŵandu kwimuchila. Sambano ngati ayiweni? Une namwusisye munduju pameso penu nambo nganimbata ligongo lililyose lyakumjimbila magambo gamkwambago.
15 Soni atamose Helodi nganamsimana ni magambo galigose. Ni ligongo lyakwe amtumisyesoni kwa m’weji. Nditu ngumsalila jemanja, munduju nganatenda chilichose chakwenela kuwulajidwa nacho.
16 Myoyo chingambe kumkwapula kaneko chinamgopole.”
17 *——
18 Nambo gulu josope ja ŵanduwo jagumisile kuti, “Jwelejo amalane najo basi, nambo atugopolele Balaba!”
19 (Balaba jwaliji mundu jwele ŵamŵisile mu ndende ligongo lyakutandisya yakwimuchila boma kukwatendekwe mumsindamo soni ligongo lyakuwulaga mundu.)
20 Pilato jwaŵechetesoni ni ŵanduwo ligongo jwalakwe ŵasakaga kumgopola Yesu.
21 Kaneko jemanjajo ŵatandite kugumila kuti, “Akamwulaje jwelejo! Akamwulaje jwelejo!”
22 Pilato ŵawusisyesoni jemanjajo kuti, “Ligongo chichi? Ana mundu jweleju alemwisye chichi? Une nganimbata chilichose mwa jwalakweju chakwenela kuwulajidwa nacho. Myoyo chingambe kumkwapula kaneko chinamgopole.”
23 Pelepo jemanjajo ŵalimbichile kugumila kuti jwalakwejo akamwulaje, mwamti Pilato ŵagambile kunda.
24 Myoyo Pilato ŵatesile yaŵasakaga jemanjajo.
25 Jwalakwe ŵamgopwele mundu juŵamsakaga kuti ŵagopolele jula, jwele ŵamŵisile mu ndende ligongo lyakutandisya yakwimuchila boma soni ligongo lyakuti ŵamwuleje mundu. Nambo ŵampeleche Yesu kwa jemanjajo kuti yaŵasakagayo yitendekwe.
26 Sambano jemanjajo paŵajawulaga najo, ŵamkamwile mundu jwine jwa ku Kulene lina lyakwe Simoni juŵaliji mkupita kutyochela ku musi wine. Jemanjajo ŵampele munduju chitela chakulagasichila* kuti anyakule ni kumkuyaga Yesu.
27 Gulu jekulungwa ja ŵandu jaliji mkumkuya jwalakwejo, kupwatikapo achakongwe ŵaŵaliji mkuliputa pamtima ligongo lya chanasa soni kumlilila jwalakwejo.
28 Yesu ŵagalawuchile achakongwewo ni kwasalila kuti, “Jemanja achakongwe ŵa ku Yelusalemu, mleche kundilila une. Nambo mlililile mwachimsyene soni ŵanache ŵenu.
29 Pakuŵa ndaŵi jikwika jele ŵandu chachiŵecheta kuti, ‘Ŵana upile achakongwe ŵangaŵeleka, ŵele chipagwile nganaŵelecheje soni ŵele nganajonjesyeje!’
30 Ŵanduwo chachitanda kugasalila matumbi gekulungwakulungwa kuti, ‘Mtugwile!’ soni matumbi gamwanamwana kuti, ‘Mtuwunichile!’
31 Naga jemanjaji akutenda yeleyi chitela chili cheŵisi, kuli wuli chitelacho pachijumwile?”
32 Achalume ŵaŵili ŵachiswamba ŵajigalidwesoni kuti akawulajidwe yimpepe ni Yesu.
33 Paŵayiche pamalo gakolanjidwa kuti Chikalakasa, ŵamkomele Yesu pachitela chiŵandika ni ŵachiswamba ŵala, jwine kumlyo jwine kumchiji.
34 Nambo Yesu jwaliji mkuŵecheta kuti, “Atati, ŵakululuchile jemanjaji ligongo ngakumanyilila yakutenda.” Nombenawo asilikali ŵatesile kalotalota* kuti amanyilile ŵachajigale yakuwala yakwe.
35 Nambosoni ŵandu ŵagambile kwima ni kulolelaga. Nambo ŵakulamulila ŵaliji mkumnyosya jwalakwejo kuti, “Ŵakombwele kwakulupusya ŵandu ŵane, amleche alikulupusye msyene naga ali Klistu, Jwakusagulidwa jwa Mlungu.”
36 Atamose asilikali ŵaliji mkumtendela yachipongwe. Jemanjaji ŵayiche paŵaliji Yesu ni kumpa finyo jwewanganye ni yindu yakuŵaŵa,
37 soni ŵaliji mkumnyosya kuti, “Naga mmwejo mli Mwenye jwa Ayuda, mlikulupusyetu.”
38 Penani pakwe ŵaŵisilepo chikwangwani chelembe kuti, “Aju ali Mwenye jwa Ayuda.”
39 Kaneko jumo mwa ŵachiswamba ŵala jwatandite kumŵechetela jwalakwe yachipongwe kuti, “Ana ngati mmwejo mli Klistu? Mlikulupusyetu, soni mtukulupusye m’weji!”
40 Nambo mjakwe jula ŵamjamwiche mjakwejo kuti, “Ana mmweji ngamkogopa Mlungu pakuyiwona kuti mpochele chilango* chakulandana ni munduju?
41 M’wejitu tukuŵajilwa kupochela chilango chelechi, pakuŵa tukupochela yakutuŵajila mwakamulana ni yatwatesile, nambo mundu aju nganalemwa chilichose.”
42 Kaneko jwaŵechete kuti, “Yesu, akangumbuchile pachakajinjile mu Uchimwene wawo.”
43 Pelepo Yesu ŵamsalile jwalakwe kuti, “Nditu ngumsalichisya mmwejo lelojino kuti, chimchiŵa ni une mu Paladaiso.”
44 Sambano ndaŵi pajaliji cha mma 12 koloko* musi, chipi chatesile m’chilambocho mpaka cha mma 3 koloko* kwigulo,
45 ligongo lyuŵa lyalesile kuŵala. Pandaŵiji nguwo ja m’nyumba ja Mlungu japapwiche pasikati, kutyochela penani mpaka pasi.
46 Kaneko Yesu ŵagumisile kuti, “Atati, ngupeleka umi wangu mmyala mwawo!” Paŵagambile kuŵecheta yeleyi, ŵamalichiche.
47 Jwamkulungwa jwa asilikali paŵagambile kuyiwona yeleyi, jwatandite kuŵecheta mwakumkwesya Mlungu kuti, “Nditu, mundu aju jwaliji jwakulungama.”
48 Soni ŵandu wosope ŵaŵasongene kweleko ni kulolelaga, paŵayiweni yayatendekweyi, ŵawujile msimangwawo ali mkuliputa pamtima.
49 Nambo ŵandu wosope ŵaŵammanyililaga jwalakwejo ŵajimi chapakutalichila. Nombenawo achakongwe ŵaŵampechesye jwalakwejo kutyochela ku Galileya ŵalijisoni papopo ni kulolelaga yindu yeleyi.
50 Sambano papali mundu jwine lina lyakwe Yosefe. Jwalakwe jwaliji jumo mwa achakulungwakulungwa ŵa mu Luŵala Lwekulungwa lwa Ayuda, soni jwaliji mundu jwambone ni jwakulungama.
51 (Mundu jweleju jwakanile kukamuchisya nawo pa yindu yaŵasakaga ŵandu kumtenda Yesu.) Jwalakwe jwaliji jwakutyochela ku Alimateya, msinda wa ŵandu ŵa ku Yudeya, soni jwaliji mkwembecheya Uchimwene wa Mlungu.
52 Mundu jweleju jwapite kwa Pilato kukuŵenda chilu cha Yesu.
53 Myoyo jwalakwe ŵachitulwisye chilucho ni kuchiŵijilila ni nguwo jambone, kaneko ŵapite kukusika chilucho m’malembe gaŵatesile kusepa pa lwala. M’malembega ŵaliji mkanamsichemo mundu chitandilile.
54 Sambano lisiku lyakosechela Sabata lyakwanile, soni Sabatajo jaliji jili jisigele panandi kutanda.
55 Nambo achakongwe ŵaŵayiche ni Yesu kutyochela ku Galileya ŵapite nawo kuti akalole malembego soni ŵapaweni paŵachisichile chilucho.
56 Kaneko jemanjajo ŵawujile kuja kulinganya yakununjilisya soni mawuta gakununjila. Nambope pa lisiku lya Sabata ŵapumwile mwakamulana ni Chilamusi.
Maloŵe Gamwiŵanda
^ Ku Mozambique akusati “província.”
^ Maloŵe ga mundimeji gangasimanikwa mu yakulemba yine yakala mnope. Yeleyi yikulosya kuti nganigaŵa mbali ja Malemba gakusalilidwa ni Mlungu.
^ Alole Kugopolela kwa Maloŵe Gane.
^ Ŵane akusati “mayele.”
^ Ŵane akusati “chamuko.”
^ Maloŵe gakwe gandanda, “awala ja 6.”
^ Maloŵe gakwe gandanda, “awala ja 9.”
