Masengo ga Ŵandumetume 15:1-41
-
Kulimbana pangani ja kuwumbala ku Antiyokeya (1, 2)
-
Ngani ja kuwumbala ŵayiche najo ku Yelusalemu (3-5)
-
Achakulungwa soni ŵandumetume asongene pampepe (6-21)
-
Chikalata chakutyochela ku likuga lyakulongolela (22-29)
-
Aŵambaleje myasi (28, 29)
-
-
Mipingo jalimbikasidwe ni chikalata (30-35)
-
Paulo ni Balanaba akulekangana kwakwinjilila (36-41)
15 Sambano achalume ŵane ŵayiche kutyochela ku Yudeya ni kutanda kwajiganya abale kuti, “Naga ngamkuwumbala mwakamulana ni chilamusi cha Mose, nganimŵa mkulupwiche.”
2 Nambo Paulo ni Balanaba nganakamulana ni nganisyo sya jemanjajo mwamti ŵakanganile pa ngani jeleji. Myoyo ŵalinganyisye yakuti Paulo, Balanaba ni abale ŵane ajawule kwa ŵandumetume ni achakulungwa ku Yelusalemu kuti akasale ya nganiji.
3 Myoyo ŵandu ŵa mumpingo wa kweleko ŵapechesye panandi kaneko jemanjajo ŵapitilisye ulendo wawo. Ŵapitile ku Foinike ni ku Samaliya, soni ŵaliji mkwalondechesya chenene abale pakwamba yatesile ŵandu ŵamitundu jine pakugalawuchila kwa Mlungu, mwamti abalewo ŵasangalalaga mnope.
4 Paŵayiche ku Yelusalemu, mpingo wosope nambosoni ŵandumetume ni achakulungwa ŵapochele chenene. Kaneko Paulo ni Balanaba ŵasasile yindu yosope yatesile Mlungu kupitila mwa jemanjajo.
5 Nambo ŵandu ŵane ŵele kala ŵaliji mu kagulu ka Afalisi, ŵele kaneko ŵaŵele ŵakulupilila, ŵajimwiche m’mipando jawo ni kuŵecheta kuti, “Ŵandu ŵamitundu jinewo akusosekwa kwawumbasya soni kwalamula kuti akuyeje Chilamusi cha Mose.”
6 Myoyo ŵandumetume pampepe ni achakulungwa ŵasongene pampepe kuti aŵechetane ya nganiji.
7 Paŵaŵechetene kwa ndaŵi jelewu, Petulo ŵajimi ni kutanda kuŵecheta kuti, “Achalongo achimjangu, jemanja akumanyilila chenene kuti une naliji jwandanda kusagulidwa ni Mlungu pasikati pa jemanja kuti, kupitila mwa une ŵandu ŵamitundu jine apikane maloŵe ga ngani syambone ni kukulupilila.
8 Mlungu, jwele akusamanyilila yamumtima, ŵapelechesoni msimu weswela kwa jemanjajo pakulosya kuti akwajitichisya, mpela muŵatupelele m’weji mula.
9 Jwalakwe ŵalosisye kuti pangali kulekangana pasikati pa m’weji ni jemanjajo, mwakuswejesya mitima jawo ligongo lya chikulupi chawo.
10 Sambano ligongo chichi jemanja akusaka amlinje Mlungu pakwatwika ŵakulijiganyaŵa katundu jwakusitopesya, jwele m’weji soni achinangolo ŵetu twalepele kutwichila?
11 M’weji tukusakulupilila kuti tuchikulupuka ligongo lya umbone mtima wekulungwa wa Ambuje Yesu, nombenawo ŵandu ŵamitundu jinewo akusakulupililasoni myoyo.”
12 Ŵandu wosopewo paŵapikene yeleyi ŵatemi jii, ni kutanda kumpikanila Balanaba ni Paulo paŵaliji mkulondesya yakusimonjesya yejinji yaŵatesile Mlungu kwa ŵandu ŵamitundu jine kupitila mwa jemanjajo.
13 Paŵamalisisye kuŵecheta yeleyi, Yakobo jwatite, “Achalongo achimjangu, apikane.
14 Sumiyoni* alondesisye chenene yaŵatesile Mlungu pandanda pakugalawuchila kwa ŵandu ŵamitundu jine kuti asagule ŵandu ŵakumanyika ni lina lyakwe pasikati pa jemanjajo.
15 Sonitu, yeleyi yili yakamulana ni yaŵalembile ŵakulochesya, kuti,
16 ‘Payichimala yindu yeleyi chinjiyikasoni ni kwimusya nyumba* ja Daudi jajagwile. Chinjilinganya yindu yayajonasiche ni kujitaŵasoni nyumbajo,
17 ni chakulinga chakuti ŵandu ŵakusigalawo amsosesose Yehofa ni mtima wosope, pampepe ni ŵandu wosope ŵamitundu jine. Ŵanduwo ali ŵakumanyika ni lina lyangu, yeleyi ni yakuŵecheta Yehofa, jwele jwakukwanilisya yindu yeleyi,
18 yele ŵayisasile kalakala.’
19 Myoyo, nguganisya kuti tukalagasya ŵandu ŵamitundu jine ŵakugalawuchila kwa Mlunguŵa,
20 nambo twalembele chikalata chakwasalila kuti aŵambaleje chilichose chakwayana ni milungu jakusepa. Nambosoni akatendaga yachikululu,* akalyaga yangasikita, soni aŵambaleje myasi.
21 Pakuŵa kutandila kalakala ŵandu aŵele ali mkwiganya maloŵe gaŵalembile Mose mumsinda uliwose, ligongo pa lisiku lililyose lya sabata ŵagaŵalangaga maloŵego kwa wosope m’masunagoge.”
22 Pelepo ŵandumetumewo ni achakulungwa nambosoni mpingo wosope ŵakamulene yakuti asagule achalume pasikati pawo ni kwatumisya ku Antiyokeya pampepe ni Paulo ni Balanaba. Myoyo ŵatumisye Yudasi jwakusamanyikasoni ni lina lyakuti Balasaba, nambosoni Sila. Jemanjaji ŵaliji ŵane mwa achalume ŵakulongolela pasikati pa abalewo.
23 Ŵalembile chikalata ni kuchitumisya kupitila mwa jemanjajo. Ŵatite:
“M’weji achalongo achimjenu, ŵandumetume soni achakulungwa, tukumlembela chikalatachi jemanja achalongo achimjetu ŵamitundu jine ŵamkutama ku Antiyokeya, Siliya soni ku Kilikiya. Mpochele moni!
24 M’weji tupikene kuti ŵandu ŵane ŵakutyochela akuno ŵayiche kwa jemanja ni kutanda kuŵecheta yakumsokonasya, kuti ajonanje chikulupi chenu. Nambotu nganitwatuma jemanjaji.
25 Myoyo tukamulene yakuti tusagule achalume ni kwatumisya kwa jemanja pampepe ni mlongo mjetu Balanaba ni Paulo.
26 Achalongo achimjetuŵa ŵalipeleche ni umi wawo wosope ligongo lya lina lya Ambuje ŵetu Yesu Klistu.
27 Myoyo tukutumisyasoni Yudasi ni Sila, ni chakulinga chakuti jemanjajisoni amsalile nganiji ni maloŵe gapakamwa.
28 Mwakulongoleledwa ni msimu weswela tuyiweni kuti tukamtwika jemanja yakusitopesya, nambo chitugambe kumsalila yindu yakusosekwa ayi:
29 mpitilisye kuŵambala chilichose chakupelechedwa ku milungu jakusepa. Mŵambalejesoni myasi, yachikululu* soni kulya yangasikita. Naga mkupitilisya kuŵambala yindu yeleyi, yindu yichimjendela chenene. Tukumsosela yambone yosope!”
30 Myoyo achalumewo ŵanyakwiche ni kwawula ku Antiyokeya. Paŵayiche kweleko ŵasongangenye ŵakulijiganya wosope ni kwapa chikalatacho.
31 Paŵachiŵalasile chikalatacho, ŵasangalele mnope pakupikana maloŵe gakulimbikasyago.
32 Pakuŵa Yudasi ni Sila ŵalijisoni ŵakulochesya, jemanjaji ŵakamuchisye abalewo soni kwalimbikasya ni maloŵe gejinji.
33 Jemanjaji ŵatemipe kweleko kwakandaŵi. Kaneko paŵawujilaga kuŵatyochele, abale ŵasosele ulendo wambone.
34 *——
35 Nambo Paulo ni Balanaba ŵasigalile ku Antiyokeya. Jemanjaji pampepe ni abale ŵane ŵajinji ŵaliji mkwiganya soni kulalichila ngani syambone syakwamba maloŵe ga Yehofa.
36 Sambano pali pamasile masiku nditu, Paulo ŵamsalile Balanaba kuti, “Kwende tujawulesoni kwa achalongo achimjetu mumsinda uliwose watwalalichile maloŵe ga Yehofa, kuti tukalole mwayikwendela yindu paumi wawo.”
37 Pelepo Balanaba ŵasimichisye yakuti amjigale Yohane, jwakusamanyikasoni ni lina lyakuti Maliko.
38 Nambo Paulo nganiyimsangalasya yakuti amjigale jwalakwejo paulendo wawo, ligongo lyakuti pandanda ŵalesile jemanjaji ku Pamfuliya soni nganajawula nawo ku masengo gakulalichila.
39 Pelepo jemanjaji ŵakanganile mnope, mwamti ŵalekangene kwakwinjilila. Balanaba ŵamjigele Maliko ni kukwela liboti kwawula ku Kupulo.
40 Nambo Paulo ŵamsagwile Sila. Kaneko abale paŵapopesile kuti Yehofa amlosye umbone mtima wekulungwa Paulojo, ŵanyakwiche.
41 Jwalakwe ŵajesile mu Siliya soni Kilikiya ali mkujilimbikasya mipingo.
Maloŵe Gamwiŵanda
^ Keleka kali kalembe kane ka lina lya Simoni (Petulo).
^ Kapena kuti, “tenti.”
^ Mu Chigiliki akusati, por·nei′a. Alole Kugopolela kwa Maloŵe Gane.
^ Mu Chigiliki akusati, por·nei′a. Alole Kugopolela kwa Maloŵe Gane.
^ Maloŵe ga mundimeji gangasimanikwa mu yakulemba yine yakala mnope. Yeleyi yikulosya kuti nganigaŵa mbali ja Malemba gakusalilidwa ni Mlungu.
