Ngani Syambone Syaŵalembile Mateyu 22:1-46
22 Yesu ŵasalilesoni jemanjajo chiwanichisyo chine kuti,
2 “Uchimwene wakwinani mpaka tuwulandanye ni mwenye juŵalinganyisye pwando ja ulombela wa mwanache jwakwe jwamlume.
3 Mwenyewo ŵatumisye achikapolo ŵakwe kuti akasalile ŵandu ŵaŵaŵilasile ku pwandojo kuti ayiche, nambo ŵanduwo nganasaka kwika.
4 Jwalakwe ŵatumisyesoni achikapolo ŵane, ni kwasalila kuti, ‘Mkasalile ŵakuŵilanjidwawo kuti, “Jamani, une linganyisye kala chakulya chaligulo, soni mbuleje ng’ombe ni yinyama yakwimbala, mwamti yosope yili chilepe. Ayiche ku pwando ja ulombela.”’
5 Nambo ŵanduwo nganayikosya, mwamti ŵatyosile, jwine jwapite kumgunda wakwe, jwine kumalonda.
6 Soni ŵakuŵilanjidwa ŵanewo, ŵakamwile achikapolowo, ni kwatendela yangalwe kaneko kwawulaga.
7 “Mwenyewo ŵatumbile mnope, mwamti ŵatumisye asilikali ŵakwe kukwawulaga ŵandu ŵaŵawuleje achikapolo ŵala soni ŵawujochile moto msinda wawo.
8 Kaneko ŵasalile achikapolo ŵakwe kuti, ‘Pwando ja ulombela jili chilepe, nambo ŵandu ŵatwaŵilasile ŵala ŵaliji ŵangaŵajilwa.
9 Myoyo, mjawule kumisewu jakopoka mumsinda, soni mkamŵilanjile ku pwando ja ulombela mundu jwalijose jwachimkamsimane.’
10 Achikapolowo ŵatesile yaŵasalileyi, ŵapite kumisewujo ni kuja kwasonganganya ŵandu wosope ŵaŵasimene, ŵakusakala ni ŵambone ŵakwe, mwamti chipinda chakutendela pwando ja ulombela chagumbele ni ŵanduwo soni ŵaliji mkulya.
11 “Mwenyewo paŵajinjile kuti ŵalole achalendowo, ŵam’weni mundu jwine jwele nganawala chakuwala chakuŵajilana ni pwandojo.
12 Myoyo ŵamwusisye mundujo kuti, ‘Bwanawe, mkusimanikwa wuli amuno mli nganim’wala chakuwala chakuŵajilwa?’ Mundujo jwasoŵile chakwanga.
13 Kaneko mwenyewo ŵasalile ŵakutumichila ŵakwe kuti, ‘Amtaŵe munduju makono soni ngongolo ni akamponye kusa kuchipi. Kweleko ni kuchachilila soni kulumanya meno.’
14 “Pakuŵa ŵakuŵilanjidwa ali ŵajinji, nambo ŵakusagulidwa ali ŵakuŵalanjika.”
15 Kaneko Afalisi ŵapite kukulangana yakuti ampatile magongo Yesu pamaloŵe gakwe.
16 Myoyo ŵatumisye ŵakulijiganya ŵawo kwa jwalakwe, pampepe ni ŵachipani cha Helodi, ni jemanjaji ŵamsalile jwalakwe kuti, “Mwalimu, m’we tukumanyilila kuti wawo akusaŵecheta yakuwona soni akusajiganya litala lya Mlungu mwakuwona, nambosoni ŵangatenda yindu pakusaka kwasangalasya ŵandu, ligongo wawo ŵangajigalika ni kawoneche ka ŵanduwo.
17 Atusalile nganisyo syawo. Ana malamusi gakusatujitichisya* kuti tukomeje msongo kwa Kaisala kapena iyayi?”
18 Nambo Yesu pakumanyilila kusakala kwawo, ŵatite, “Ligongo chichi mkulinga une, jemanja ŵachinyengo?
19 Mundosye mbiya jakomela msongojo.” Jemanjajo ŵampele mbiya ja dinali.
20 Ni jwalakwe ŵawusisye kuti, “Ana ngopeji soni maloŵe gakwega yili ya ŵani?”
21 Jemanjajo ŵamjanjile kuti, “Yili ya Kaisala.” Kaneko jwalakwe ŵasalile kuti, “Sambano, mpelecheje yindu ya Kaisala kwa Kaisala, nambo yindu ya Mlungu kwa Mlungu.”
22 Jemanjajo paŵagambile kupikana yeleyi, ŵasimonjile mnope, kaneko ŵawutandite ulendo ni kumleka jwalakwejo.
23 Palisiku lilili, Asaduki ŵakusati ŵawe ngasajimuka, ŵayiche kwa jwalakwejo ni kumwusya kuti,
24 “Mwalimu, Mose jwatite, ‘Naga jwamlume alombele, nambo awile mkanamŵelechele mwanache jwamkongwejo, mlongo mjakwe jwa jwamlumejo akusosekwa kumjigala ni kumŵelechela mwanache mlongo mjakwe jula.’
25 Sambano twakwete achalume 7 ŵapaulongo. Jwandanda jwalombele nambo jwawile mkanamŵelechele ŵanache jwamkongwejo, kaneko mlongo mjakwe jwamjigele jwamkongwejo.
26 Jwelejusoni jwawile mkanamŵelechele ŵanache, mwamti yeleyi yatendekwesoni ni jwatatu, mpaka wosope 7 ŵala.
27 Pambesi pakwe, nombenajo jwamkongwejo jwawile.
28 Ŵawe pachachijimukaga, ana jwamkongweju chachiŵa jwa ŵani pa achalume 7 ŵala, pakuŵa wosope ŵamlombile?”
29 Yesu ŵajanjile kuti, “Jemanja mkulemwesya, ligongo ngamkumanyilila Malemba soni machili ga Mlungu.
30 Pakuŵa ŵandu pachachijimuka ku chiwa achalume ngasalombela soni achakongwe ngasalombedwa, nambo chachiŵa mpela malayika gakwinani.
31 Nambo pakwamba ya kwimuka kwa ŵandu ŵawe, ana nganimŵalanjeje yaŵaŵechete Mlungu kwa jemanja? Jwalakwe jwatite,
32 ‘Une ndili Mlungu jwa Abulahamu, Mlungu jwa Isaki soni Mlungu jwa Yakobo.’ Jwalakwe ali Mlungu jwa ŵandu ŵaumi ngaŵaga ŵawe.”
33 Gulu ja ŵandu pajapikene yeleyi, jasimonjile mnope ni kajiganye kakwe.
34 Afalisi paŵapikene yakuti Yesu ŵamasisye makani Asaduki, ŵajigalene kagulu ni kwika kwa jwalakwejo.
35 Pakusaka kumlinga jwalakwe, Mfalisi jwine jwakumanyilila Chilamusi jwamwusisye kuti,
36 “Mwalimu, pa malamusi gosope, ana lilamusi lyekulungwa ni lyapi?”
37 Yesu ŵamjanjile jwalakwejo kuti, “‘Mumnonyeleje Yehofa Mlungu jwenu ni mtima wenu wosope, ni umi wenu wosope soni ni nganisyo syenu syosope.’
38 Lyeleli lili lilamusi lyekulungwa soni lyandanda.
39 Lyaŵili lyakulandana nalyo lili lyakuti, ‘Mumnonyeleje mjenu mpela mwamkusalinonyelela mwasyene.’
40 Chilamusi chosope soni yakulemba ya ŵakulochesya yigonile pa malamusi gaŵili gelega.”
41 Sambano Afalisiwo ali papopo, Yesu ŵawusisye kuti,
42 “Ana jemanja mkuganisya wuli pakwamba ya Klistu? Ana jwalakwejo ali mwanache jwa ŵani?” Jemanjajo ŵamjanjile kuti, “Ali mwanache jwa Daudi.”
43 Jwalakwe ŵawusisye jemanjajo kuti, “Nambi ligongo chichi Daudi mwakulongoleledwa ni Mlungu ŵamkolasile jwalakwejo kuti Ambuje? Jwalakwe jwatite,
44 ‘Yehofa ŵasalile Ambuje ŵangu kuti, “Mtame kumkono wangu wamlyo mpaka pachinjiŵika adani ŵenu pasi pa ulamusi wenu.”’
45 Sambano naga Daudi ŵamkolasile jwalakwejo kuti Ambuje, ana yikukomboleka wuli kuŵasoni mwanache jwakwe?”
46 Pangali mundu juŵapakombwele kumjanga, soni kutandila palisiku lyeleli, pangali jwalijose juŵalimbile mtima kumwusyasoni jwalakwejo.
Maloŵe Gamwiŵanda
^ Kapena kuti, “Ana yili yakuŵajilwa.”
