Nehemiya 12:1-47
12 Sambano aŵa ni ŵakutaga mbopesi soni Alefi ŵaŵawusile yimpepe ni Selubabele mwanache jwa Salatiyeli soni Yesuwa kutyochela ku ukapolo, Selaya, Yelemiya, Esala,
2 Amaliya, Maluki, Hatusi,
3 Sekaniya, Lehumu, Melemoti,
4 Ido, Ginetoyi, Abiya,
5 Miyamini, Madiya, Biliga,
6 Semaya, Yoyalibu, Yedaya,
7 Salilu, Amoki, Hilikiya, soni Yedaya. Ŵeleŵa ŵaliji achimlongola ŵa ŵakutaga mbopesi, nambosoni achalongo achimjawo ŵaŵapali m’masiku ga Yesuwa.
8 Alefi ŵaliji Yesuwa, Binuyi, Kadimiyele, Selebiya, Yuda, soni Mataniya, juŵalongolelaga nyimbo syakumyamichila Mlungu pampepe ni achalongo achimjakwe.
9 Achalongo achimjawo ŵa jemanjaji ŵaŵaliji Bakibukiya soni Uni ŵajimaga mwakulolegana ni jemanjaji ni kulondelaga.*
10 Yesuwa jwaŵeleche Yoyakimu, Yoyakimu jwaŵeleche Eliyasibu, soni Eliyasibu jwaŵeleche Yoyada.
11 Yoyada jwaŵeleche Yonatani, soni Yonatani jwaŵeleche Yaduwa.
12 Sambano aŵa ni ŵaŵaliji ŵakutaga mbopesi m’masiku ga Yoyakimu, soni ŵeleŵa ni ŵaŵaliji ŵakulongolela ŵa nyumba sya achinangolo ŵawo. Juŵajimilaga nyumba ja Selaya ŵaliji Melayiya. Juŵajimilaga nyumba ja Yelemiya ŵaliji Hananiya.
13 Juŵajimilaga nyumba ja Esala ŵaliji Mesulamu. Juŵajimilaga nyumba ja Amaliya ŵaliji Yehohanani.
14 Juŵajimilaga nyumba ja Maluka ŵaliji Yonatani. Juŵajimilaga nyumba ja Sebaniya ŵaliji Yosefe.
15 Juŵajimilaga nyumba ja Halimu ŵaliji Adena. Juŵajimilaga nyumba ja Melayoti ŵaliji Helikayi.
16 Juŵajimilaga nyumba ja Ido ŵaliji Sekaliya. Juŵajimilaga nyumba ja Ginetoni ŵaliji Mesulamu.
17 Juŵajimilaga nyumba ja Abiya ŵaliji Sikili. Juŵajimilaga nyumba ja Miniamini ŵaliji . . .* Juŵajimilaga nyumba ja Mowadiya ŵaliji Pilitayi.
18 Juŵajimilaga nyumba ja Biliga ŵaliji Samuwa. Juŵajimilaga nyumba ja Semaya ŵaliji Yehonatani.
19 Juŵajimilaga nyumba ja Yoyalibu ŵaliji Matenayi. Juŵajimilaga nyumba ja Yedaya ŵaliji Usi.
20 Juŵajimilaga nyumba ja Selayi ŵaliji Kalayi. Juŵajimilaga nyumba ja Amoki ŵaliji Ebele.
21 Juŵajimilaga nyumba ja Hilikiya ŵaliji Hasabiya. Juŵajimilaga nyumba ja Yedaya ŵaliji Netanele.
22 Mena ga Alefi ŵaŵaliji ŵakulongolela nyumba sya achinangolo ŵawo m’masiku ga Eliyasibu, Yoyada, Yohanani, soni Yaduwa ŵagalembaga mpela muŵatendelaga ni mena ga ŵakutaga mbopesi. Ŵatesile yeleyi mpaka pandaŵi ja ulamusi wa Daliyo jwa ku Pelisiya.
23 Nombenawo Alefi ŵaŵaliji ŵakulongolela maŵasa ga achinangolo ŵawo, mena gawo galembedwaga m’buku ja mbili ja ndaŵi jelejo mpaka kwika m’masiku ga Yohanani mwanache jwa Eliyasibu.
24 Ŵakwalongolela Alefi ŵaliji Hasabiya, Selebiya ni Yesuwa mwanache jwa Kadimiyele. Soni achalongo achimjawo ŵajimaga mwakulolegana ni jemanjaji ni kwimbaga nyimbo syakumchimbichisya Mlungu soni kumyamichila mwakamulana ni yaŵalamwile Daudi mundu jwa Mlungu jusyesyene. Gulu jilijose ja alonda jajimaga mwakuŵandikana ni gulu jine ja alonda.
25 Sambano Mataniya, Bakibukiya, Obadiya, Mesulamu, Talimoni , soni Akubu ŵajimaga pageti ni kulondelaga. Jemanjaji ŵalondelaga yipinda yakusunjila katundu yayaliji mwakuŵandikana ni mageti.
26 Jemanjaji ŵatumichile m’masiku ga Yoyakimu mwanache jwa Yesuwa soni chisukulu cha Yosadaki. Nambosoni ŵatumichile m’masiku ga Nehemiya juŵaliji bwanamkubwa soni Esala juŵaliji jwakutaga mbopesi soni jwakukopela Chilamusi.*
27 Pakuwugulila lutenje lwa Yelusalemu ŵasongangenye Alefi m’madela gosope gaŵatamaga ni kwika nawo ku Yelusalemu kuti akasangalale pa mwambo wakuwugulila lutenjewu. Pa mwambowu, ŵajimbaga nyimbo syakumyamichila Mlungu. Ŵajimbaga pakamulichisya masengo yakwimbila yakusyungulila yakuwoneka mpela mbale, yakwimbila yangonji, soni yakwimbila yangonji yamtundu wine.
28 Ŵanache ŵa ŵakwimbawo* ŵasongangene pampepe kutyochela ku chigawo* chapakuŵandika, m’madela gosope gakusyungulila Yelusalemu, ku madela gaŵatamaga Anetofa,
29 ku Beti-giligala, kumadela ga ku Geba soni ga ku Beti-asimafeti. Yaliji myoyo pakuŵa ŵakwimbaŵa ŵataŵile malo gawo gakutama kusyungulila msinda wosope wa Yelusalemu.
30 Kaneko ŵakutaga mbopesi soni Alefi ŵaliswejesye. Nambosoni jemanjaji ŵaswejesye ŵandu wosopewo. Ŵaswejesyesoni mageti ni mapupa ga lutenjelo.
31 Kaneko une nakwesile penani pa lutenjelo yimpepe ni ŵakulongolela ŵa ku Yuda. Nambosoni nasagwile magulu gaŵili gakwimba nyimbo syakumyamichila Mlungu, soni magulu gane ga ŵandu gakuti gakuyeje panyuma pawo. Gulu jine ja ŵakwimba jajendaga chakumlyo penani pa lipupalyo jili mkwinjilila ku Geti ja Mawunjili ga Liwu.
32 Hosaya soni hafu ja ŵakulongolela ŵa ku Yuda ŵajendaga panyuma pa jemanjaji.
33 Ŵaliji yimpepe ni Asaliya, Esala, Mesulamu,
34 Yuda, Benjamini, Semaya, soni Yelemiya.
35 Jemanjaji ŵalijisoni yimpepe ni ŵane mwa ŵanache ŵa ŵakutaga mbopesi ali mkwimba ni malipenga. Ŵane mwa ŵanacheŵa ŵaliji Sekaliya mwanache jwa Yonatani. Yonatani jwaliji mwanache jwa Semaya, Semaya jwaliji mwanache jwa Mataniya, Mataniya ŵaliji mwanache jwa Mikaya, Mikaya jwaliji mwanache jwa Sakuli, Sakuli jwaliji mwanache jwa Asafu.
36 Papalisoni achalongo achimjakwe aŵa, Semaya, Asalele, Milalayi, Gilalayi, Mayi, Netanele, Yuda, soni Hanani. Jemanjaji ŵajimbaga pakamulichisya masengo yakwimbila ya Daudi mundu jwa Mlungu jusyesyene. Soni Esala jwakukopela Chilamusi* jwajendaga pasogolo pa jemanjajo.
37 Ŵakwimbaŵa ali ayiche pa Geti ja Chisima ŵajesilepe mpaka kuja kwika ku Masitepe ga Msinda wa Daudi. Jemanjaji ŵayiche mpaka kulutando kwa lutenjelo ni kujipita nyumba ja Daudi, soni mpaka ŵajile kwika ku Geti ja ku Mesi jajaliji chakungopokolyuŵa.
38 Gulu jine ja ŵandu ŵakwimba nyimbo syakumyamichila Mlungu jajendaga kumbali jakumchiji, soni une pampepe ni hafu jine ja ŵandu twakuyaga panyuma pakwe. Jemanjaji ŵajesile penani pa lutenjelo kwinjililaga ku Sanja ja Mawufuni mpaka kuja kwika ku Lipupa Lyekulungwa.
39 Jemanjaji ŵapitile pa Geti ja Efulayimu, ku Geti ja Msinda Wakala, ku Geti ja Somba, ku Sanja ja Hananeli, ku Sanja ja Meya, soni ku Geti ja Ngondolo. Kaneko jemanjaji ŵayiche ku Geti ja Alonda ni kwima pelepo.
40 Kaneko magulu gaŵili gakwimba nyimbo syakumyamichila Mlungu gala gajimi kusogolo kwa nyumba ja Mlungu jusyesyene. Myoyo une pampepe ni hafu ja ŵakulongolela jajaliji ni une twajimisoni.
41 Eliyakimu, Maseya, Miniamini, Mikaya, Eliyoyenayi, Sekaliya, soni Hananiya ŵaŵaliji ŵakutaga mbopesi ŵajimisoni kusogolo kwa nyumbaji ali mkwimba malipenga.
42 Papalisoni Maseya, Semaya, Eliyesala, Usi, Yehohanani, Malikiya, Elamu, soni Eseli. Ŵakwimba ŵala ŵajimbile mwakwesya maloŵe soni Isilahiya ni juŵalongolelaga jemanjaji.
43 Pa lisiku lyeleli jemanjaji ŵapeleche mbopesi syejinji soni ŵasangalele, pakuŵa Mlungu jusyesyene ŵatendekasisye jemanjaji kusangalala mnope. Achakongwe soni ŵanache ŵasangalelesoni, mwamti chisangalalo chachaliji ku Yelusalemu chapikaniche kwakutalika.
44 Pa lisiku lyeleli ŵasagwile achalume ŵakuti aloleleje nyumba syakusunjila yakupeleka, mbeju syandanda kukomala soni chalikumi. Ŵasosekwaga kusunga mwelemu yasongangenye kutyochela ku migunda ja m’misinda mwakamulana ni winji wachasalaga Chilamusi kuti apelecheje kwa ŵakutaga mbopesi soni Alefi. Yaliji myoyo pakuŵa ŵandu ŵa ku Yuda ŵasangalalaga ligongo lya utumiki waŵatendaga ŵakutaga mbopesi soni Alefi.
45 Ŵakutaga mbopesi soni Alefi ŵatandite kukamula masengo ga Mlungu jwawo soni kukuya lilamusi lyakuliswejesya mpela muŵatendelaga ŵakwimba soni alonda ŵapageti. Ŵatesile yeleyi mwakamulana ni yaŵalamwile Daudi soni Solomo, mwanache jwa Daudijo.
46 Kalakalako m’masiku ga Daudi soni Asafu ŵapali ŵandu ŵaŵalongolelaga ŵakwimba, soni ŵaŵalongolelaga nyimbo syakuchimbichisya soni syakumyamichila Mlungu.
47 M’masiku ga Selubabele soni m’masiku ga Nehemiya, Ayisalayeli wosope ŵapelekaga yakupeleka kwa ŵakwimba soni kwa alonda ŵapageti mwakamulana ni yaŵasosechelaga jemanjaji lisiku lililyose. Ŵaŵikagasoni pambali yakupeleka yakwawula kwa Alefi, soni Alefiwo ŵaŵikaga pambali yakupeleka yakwawula kwa ŵandu ŵa mu mbumba* ja Aloni.
Maloŵe Gamwiŵanda
^ Kagopolele kanesoni, “ni kutumichilaga.”
^ Yikuwoneka kuti m’Malemba ga Chihebeli nganigasala lina pelepa.
^ Kapena kuti “mlembi.”
^ Kapena kuti “ŵaŵajiganyidwe chenene kwimbawo.”
^ Pelepa akwamba chigawo chakusyungulila Yolodani.
^ Kapena kuti “mlembi.”
^ Alole Kugopolela kwa Maloŵe Gane.
