Numeli 16:1-50
16 Kaneko Kola ŵakamulene ni Datani, Abilamu soni Oni. Kola ŵaliji mwanache jwa Isala chisukulu cha Kohati, juŵaliji mwanache jwa Lefi. Datani ni Abilamu ŵaliji yisukulu ya Lubeni nambo baba ŵawo ŵaliji Eliyabu. Nombenajo Oni ŵaliji chisukulu cha Lubeni nambo babagwe ŵaliji Peleti.
2 Jemanjaji pampepe ni achakulungwakulungwa ŵa Ayisalayeli ŵakwana 250 ŵakamulene kuti alimbane ni Mose. Achakulungwakulungwa ŵeleŵa ŵaliji ŵakusagulidwa pasikati pa ŵanduwo, soni ŵaliji achalume ŵakuchimbichika.
3 Jemanjaji ŵajigalene ni kwawula kwa Mose soni Aloni ni kutanda kulimbana nawo mwakuŵecheta kuti, “Yitupesisye yamkutenda jemanja. Ŵanduŵatu ali ŵaswela wosope ŵeneŵa, soni Yehofatu ali pasikati pawo. Nambi ligongo chichi jemanja mlikwesisye pasikati pa ŵandu ŵa Yehofaŵa?”
4 Mose paŵapikene maloŵe gelega ndaŵi jijojo ŵatindiŵele ni kwinama mpaka ngope jakwe pasi.
5 Kaneko jwalakwe ŵamsalile Kola soni wosope ŵaŵaliji ku mbali jakwe kuti, “Malaŵi kundaŵi Yehofa chatumanyisye mundu jwali jwakuŵajilwa pameso pakwe soni jwali jwamswela jwakwenela kumŵandichila jwalakwejo. Mundu jwalijose juchachimsagulajo, jwelejo ni juchachimŵandichilaga jwalakwejo.
6 Myoyo jemanja chimtende ayi: Mmwejo Kola pampepe ni ŵandu wosope ŵali kumbali jenu chimjigale yakupalila moto.
7 Malaŵi chimŵiche moto mwelemo soni ubani ni kwika nayo pameso pa Yehofa. Mundu jwalijose juchachimsagula Yehofajo, jwelejo ni kuti ali mundu jwamswela. Jemanja ŵanache ŵa Lefi mpundangenye mnope.”
8 Kaneko Mose ŵaŵechete ni Kola kuti, “Jemanja ŵanache ŵa Lefi mpikane ayi:
9 Yehofa Mlungu jwa Ayisalayeli ŵamsagwile jemanja kutyochela pasikati pa Ayisalayeli ŵane wosope kuti mumŵandichileje jwalakwejo. Ŵamsagwile jemanja kuti mtumichileje ku chitenti chakwe nambosoni kuti mjimeje pasogolo pa Ayisalayeli wosope ni kwatumichilaga jemanjajo. Ana yaŵatesileyi mkuyiwona mpela yindu yamwana?
10 Ana mkuyiwona mpela yamwana yaŵatesile Mlungu pakumsagula jemanja pampepe ni achalongo achimjenu wosope ŵali ŵanache ŵa Lefi kuti mumŵandichileje jwalakwejo? Sambano ligongo chichi mkusachililasoni kuti mtumichileje mpela ŵakutaga mbopesi?
11 Pa ligongo lyeleli mmwejo soni ŵandu wosope ŵali kumbali jenu msongene kuti mlimbane ni Yehofa. Ana Aloni atesile chichi kuti mmwejo mŵecheteje yakudandawula mwakusisyana najo?”
12 Kaneko Mose ŵamtumisye mundu kuti akamŵilanje Datani ni Abilamu ŵanache ŵa Eliyabu, nambo jemanjajo ŵajanjile kuti, “Uwe kweleko ngatuyika.
13 Ana mkupela yili yamwana kuti mwatukopwesye m’chilambo chakwenda mkaka ni uchi chila ni kutujinjisya m’chipululu muno kuti mtuwulaje? Sambano ana mkusakasoni kuliŵika mwasyene kuŵa jwakutulamulila?
14 Sonitu mpaka apano nganimŵepe kutujinjisya m’chilambo chine chilichose chakwenda mkaka ni uchi kapena kutupa malo gakulima soni migunda ja mipeleya mpela chipanje chetu. Ana chimwakolotole meso achalume ŵelewo* kuti agambeje kumkuya mpela ŵandu ŵangalola? Kweleko m’wejo ngatuyika.”
15 Pelepo Mose ŵatumbile mnope, ni ŵamsalile Yehofa kuti, “Akapochela mbopesi jambeju ja jemanjaji. Pangali ligongo lililyose lyakuti ambechetele yeleyi. Unetu nganisumula bulu jwa jemanjaji atamose jumo kapenasoni kumlemasya bulu jwawo jwalijose.”
16 Kaneko Mose ŵamsalile Kola kuti, “Malaŵi mmwejo pampepe ni wosope ŵali kumbali jenu mkajime pameso pa Yehofa. Soni nombenajo Aloni chakajime nawo.
17 Jwalijose akajigale chakupalila moto chakwe ni kuŵika ubani mwelemo. Kaneko jwalijose akayiche pameso pa Yehofa ali ajigele chakupalila moto chakwe mmyala. Achalume wosope ŵali kumbali jenu akajigale yakupalila moto yakwana 250, nombe mmwejo soni Aloni jwalijose akajigale chakupalila moto chakwe.”
18 Myoyo jwalijose ŵajigele chakupalila moto chakwe. Kaneko ŵaŵisile moto soni ubani penani pakwe ni kuja kwima kumlango wa chitenti chakusimanilana pampepe ni Mose soni Aloni.
19 Kola paŵasongangenye ŵandu ŵaŵaliji kumbali jakwe kuti alimbane ni Mose soni Aloni kumlango wa chitenti chakusimanilana, kuŵala kwa uchimbichimbi wa Yehofa kwawonechele kwa Ayisalayeli wosope ŵaŵasongene kweleko.
20 Pelepo Yehofa ŵamsalile Mose ni Aloni kuti,
21 “Mtyoche pasikati pa gulu ja ŵandu ŵeleŵa ni chakulinga chakuti najonanje wosopeŵa m’kandaŵi kamnono.”
22 Paŵapikene yeleyi, jemanjajo ŵatindiŵele mpaka ngope syawo pasi ni kuŵecheta kuti, “Wawo Mlungu jwetu, Mlungu jwele jwakusapeleka umi kwa ŵandu wosope, ana akusaka kuti kulemwa kwa mundu jumo kwatendekasye kwatumbilila Ayisalayeli wosope?”
23 Pelepo Yehofa ŵamsalile Mose kuti,
24 “Mŵechete kwa Ayisalayeli. Mwasalile jemanjajo kuti, ‘Mtyoche ku matenti ga mwanja Kola, Datani soni Abilamu.”
25 Kaneko Mose ŵanyakwiche ni kulongana pampepe ni achakulungwa ŵa Ayisalayeli kwawula kwa Datani ni Abilamu.
26 Jwalakwe ŵasalile Ayisalayeli kweleko kuti, “Chonde, mtyoche ku matenti ga ŵandu ŵakusakalaŵa, soni mkakwaya chindu chilichose cha ŵandu ŵeleŵa pakogopela kuti mpaka ampyajilile kumpepe ni jemanjaji ligongo lya kulemwa kwawoku.”
27 Ndaŵi jijojo ŵandu ŵaŵaliji ku matenti ga Kola, Datani, soni Abilamu ŵatyosile. Kaneko Datani soni Abilamu pampepe ni achiŵamkwawo soni ŵanache ŵawo ŵakopweche m’matenti gawo ni kwimajima m’milango ja matentigo.
28 Kaneko Mose ŵatite, “Lelo jemanja chimmanyilile kuti Yehofa ŵandumile kuti ndende yindu yosope yeneyi, soni kuti nganiyiŵa yakwamba kutyochela mumtwe mwangu. Chimmanyilile yeleyo pachiyitendekwe ayi:
29 Naga ŵandu ŵeleŵa akuwa mpela mwakusawila ŵandu wosope, soni naga yindu yachiyatendechele jemanjaji yili yakulandana ni yindu yayikusiyatendechela ŵandu wosope, pelepo ni kuti Yehofa ngananduma une.
30 Nambo naga Yehofa akwatendela jemanjajo chindu chachilendo chakuti nganichitendekweje, mwamti chilambo ni kuwuguka* ni kwamila jemanjajo soni kwajawusya ku Malembe* ali ŵaumi pampepe ni yindu yawo yosope, pelepo chimmanyilile nditu kuti ŵandu aŵa nganamchimbichisya Yehofa.”
31 Paŵagambile kumalisya kuŵecheta maloŵe gelega, pamalo paŵajimi jemanjajo pawugwiche.
32 Chilambo chawugwiche* ni kwamila jemanjajo pampepe ni maŵasa gawo. Chammisilesoni mundu jwalijose juŵaliji kumbali ja Kola pampepe ni yindu yawo yosope.
33 Myoyo jemanjajo nambosoni ŵandu wosope ŵaŵaliji kumbali jawo ŵajinjile m’Malembe* ali ŵaumi. Kaneko chilambo chawunichile jemanjajo mwamti ŵajonasiche pasikati pampingo wa Ayisalayeli.
34 Ayisalayeli wosope ŵaŵaliji pelepo ŵatandite kutila ali mkugumila kuti, “Tukogopa kuti chilambo mpaka chitumilesoni m’wejo.”
35 Kaneko moto wakutyochela kwa Yehofa wayiche ni kwatinisya achalume 250 ŵaŵaliji mkututumisya ubani ŵala.
36 Sambano Yehofa ŵamsalile Mose kuti,
37 “Mumsalile Eliyesala mwanache jwa Aloni jwali jwakutaga mbopesi kuti ajawule pamalo pawuli moto wawatinisye ŵanduwo ni kujigala yakupalila moto ligongo yindu yeleyo yili yeswela. Mumsalilesoni jwalakwe kuti ajasile kwakutalika makala ga moto.*
38 Yakupalila moto ya achalume ŵalusile maumi gawo ligongo lyakulemwa kwawo myijigale ni kuyijongola kuti yiŵe tumalata twakwepepala ni kutunyambatika pamalo gakupelechela mbopesi. Mtende yeleyi ligongo lyakuti yakupalila motoyo yayiche pameso pa Yehofa, myoyo yaŵele yeswela. Tumalata tweleto chituŵe chimanyisyo chakwakalamusya Ayisalayeli.”
39 Myoyo jwakutaga mbopesi Eliyesala ŵajigele yakupalila moto ya chisyano cha kopa yaŵayiche nayo achalume ŵaŵatiniche ŵala ni kuyijongola kuti ayinyambatiche pamalo gakupelechela mbopesi.
40 Jwalakwe ŵatesile yeleyi mwakamulana ni yaŵamsalile Yehofa kupitila mwa Mose. Yeleyi yaliji mpela chimanyisyo chakwakumbusya Ayisalayeli kuti mundu jwalijose jwachilendo jwanganaŵa jwa m’liŵasa lya Aloni akayikaga pameso pa Yehofa kukututumisya ubani, soni kuti pakasimanikwa mundu jwalijose jwakumsyasya Kola soni ŵandu ŵaŵaliji kumbali jakwe.
41 Palisiku lyakuyichisya, Ayisalayeli wosope ŵatandite kudandawula mwakusisyana ni Mose soni Aloni ali mkuŵecheta kuti, “Jemanja ŵandu ŵaŵilimwe mwawuleje ŵandu wa Yehofa.”
42 Ayisalayeli ali asongene myoyo kuti alimbane ni Mose soni Aloni, paŵagalawiche ni kulola ku chitenti chakusimanilana ŵagambile kuliwona liwunde lili liwunichile chitenticho. Kaneko kuŵala kwa uchimbichimbi wa Yehofa kwawonechele.
43 Pelepo Mose ni Aloni ŵapite ku chitenti chakusimanilanako.
44 Kweleko Yehofa ŵamsalile Mose kuti,
45 “Jemanja mtyoche pasikati pa ŵanduŵa ni chakulinga chakuti napyajile mkandaŵi kamnono.” Pelepo jemanjajo ŵatindiŵele mpaka ngope syawo pasi.
46 Kaneko Mose ŵamsalile Aloni kuti, “Mjigale chakupalila moto ni mŵiche mwelemo moto kutyochela pamalo gakupelechela mbopesi soni mŵiche ubani penani pakwepo ni mjawuleje mwachitemachitema kwali Ayisalayeliko kuti mkasimasye ulemwa wa jemanjajo. Mtende yeleyi ligongo lyakuti ukali wa Yehofa utandite kwagwila jemanjajo mwamti mlili utandite kala.”
47 Ndaŵi jijojo Aloni ŵajigele chakupalila motocho mpela muŵaŵechetele Mose ni kuwutuchila kuŵaliji ŵanduwo. Paŵayiche kweleko ŵasimene kuti ŵandu atandite kala kuwa ligongo lya mliliwo. Myoyo jwalakwe ŵaŵisile ubani mu chakupalila motocho ni kutanda kusimasya ulemwa wa ŵanduwo.
48 Aloni ŵapitilisye kwima pasikati pa ŵandu ŵaŵawile soni ŵaŵaliji umiwo. Pambesi pakwe mliliwo walesile.
49 Ŵandu ŵaŵawile ni mliliwo ŵakwanile 14,700, ngaŵalanjila ŵandu ŵaŵawile ligongo lya Kola.
50 Mliliwo pawalesile Aloni ŵawujile kwa Mose kumlango wa chitenti chakusimanilana.
Maloŵe Gamwiŵanda
^ Pelepa akwamba ŵandu ŵaŵakamulene ni jemanjajo pakwimuchila kwawo.
^ Mu Chihebeli ŵatiga, “chilambo chikuwugula pakamwa pakwe.”
^ Alole Kugopolela kwa Maloŵe Gane.
^ Mu Chihebeli ŵatiga, “chawugwile pakamwa pakwe.”
^ Alole Kugopolela kwa Maloŵe Gane.
^ Komboleka kuti pelepa akwamba makala kapena liwu lyalyasigalile mu yakupalila motoyo kapena yayaliji chiŵandika ni yakupalila motoyo.
