Chikalata cha Yakobo 5:1-20
5 Sambano mpikane jemanja ŵandu ŵakusichila: Mlile mwakugumila ligongo lya yipwetesi yachiyimgwile.
2 Yipanje yenu yiwosile, soni yijosolo yilile yakuwala yenu.
3 Golide ni silifa yamkuliwunjichila yijonasiche kala ni mkuwo. Mkuwo welewo uchilosya kuti jemanja mli ŵakulemwa soni uchijonanga yilu yenu mpela mwawukusajonanjila moto. Yindu yamliwunjichileyo yichiŵa mpela moto m’masiku gakumalisya.
4 Mpikane jemanja, malipilo gamlepele kwapa ŵamasengo ŵagowola m’migunda jenu gakumlilila Mlungu, soni Yehofa jwakusalamulila yakwinani apikene kulila kwakudandawula kwa ŵandu ŵakugowolawo.
5 Jemanja mtemi umi wapenani pachilambo chapasi pano, umi wakwamba kulisangalasya. Mitima jenu jikwimbala mpela yinyama yayikusaŵa yili mkwimbalilape mpaka pa lisiku lyakuyiwulaga.
6 Jemanja mumlamwile ni kumwulaga mundu jwakutenda yambone.* Jwalakwe* ngakusangalala ni jemanja.
7 Myoyo achalongo achimjangu, mŵe ŵakuwusimana mtima mpaka pandaŵi ja kuŵapo* kwa Ambuje. Mganichisye yakusatendaga jwakulima. Jwalakwe akusajembecheya mwakuwusimana mtima ndaŵi ja yisogosi yambone yakutyochela mwitaka. Akusajembecheya kuti jiyiche wula jandanda mpaka jakumalisya.
8 Jemanjasoni mwusimane mtima. Mitima jenu jiŵeje jangatenganyika, ligongo ndaŵi ja kuŵapo* kwa Ambuje jiŵandichile.
9 Achalongo achimjangu, mkatamilaga kwadandawula ŵane, kogopela kuti ata kum’welusya. Mpikane, jwakuwelusya ajimi kala pamlango.
10 Achalongo achimjangu, mganichisyeje ya ŵakulochesya ŵaŵaŵechetaga yakwamba lina lya Yehofa, soni mjigalile chisyasyo chawo chakuŵa ŵakupilila paŵasimanaga ni yipwetesi soni chakuŵa ŵakuwusimana mtima.
11 Mpikane, paja kwa ŵandu ŵapilile tukusati jemanjajo ali ŵakusangalala.* Jemanja mwapikene yakwamba kupilila kwa Yobu, soni myiweni yaŵatite Yehofa pakumpa upile. Yeleyi yalosisye kuti Yehofa akwete chinonyelo chekulungwa soni ali jwachanasa.
12 Achalongo achimjangu, ngusaka kumsalila chindu chakusosekwa mnope. Mleche kulumbila, chinga mwakulanjila kwinani kapena chilambo chapasi kapenasoni chindu chine chilichose. Nambo pamtite kuti “Elo” jiŵeje elo, soni pamtite kuti “Iyayi” jiŵeje iyayi, ni chakulinga chakuti mkaŵa ŵakwenela kupochela chilango.*
13 Ana pasikati penu pana jwalijose jwakusimana ni yakusawusya? Mundu jwelejo akaleka kupopela. Ana pana jwalijose jwakusangalala? Jwelejo ajimbeje nyimbo syakumchimbichisya Mlungu.
14 Ana pasikati penu pana jwalijose jwakulwala? Jwelejo ŵaŵilanje achakulungwa ŵa mumpingo, soni jemanjajo chachimpopelela jwalakwe ni kumpakasya mawuta m’lina lya Yehofa.
15 Lipopelo lyakupopela mwachikulupi lichimkamuchisya jwakulwalajo kuti aŵe chenene, mwamti Yehofa chachimjimusya jwalakwejo. Nambosoni, naga ŵatesile yakulemwa, Mlungu chachimkululuchila.
16 Myoyo, mwasalileje ŵane yakulemwa yenu mwangasisa chilichose soni mpopelelaneje ni chakulinga chakuti mŵe chenene. Lipopelo lya mundu jwakulupichika likusaŵa lyamachili.*
17 Pajatu Eliya ŵaliji mundu mpela m’weji. Nambope jwalakwejo paŵapopesile kuti wula jikagwa, wulajo nganijigwa kwa yaka yitatu ni myesi 6.
18 Kaneko ŵapopesilesoni, mwamti wula jagwile ni kumelesya yakumela pachilambo.
19 Achalongo achimjangu, naga jwine pasikati penu asapwiche ni kuleka kukuya yayili yisyesyene nambo jwine akwika ni kumkamuchisya kuti awuje,
20 mmanyilile kuti jwalijose jwakumkamuchisya mundu jwakulemwa kuti aleche matala gakwe gakusakala chachimkulupusya mundujo ku chiwa soni Mlungu chachimkululuchila yakulemwa yakwe.
Maloŵe Gamwiŵanda
^ Pelepa komboleka kuti akwamba Yesu kapena ŵakumkuya ŵakwe ŵakulupichika.
^ Pelepa komboleka kuti akwamba Mlungu kapena akwamba Yesu paŵajimwiche ku chiwa.
^ Alole Kugopolela kwa Maloŵe Gane.
^ Alole Kugopolela kwa Maloŵe Gane.
^ Kapena kuti, “ŵana upile; ŵajaliwe.”
^ Ŵane akusati “chamuko.”
^ Maloŵe gakwe gandanda, “likusakamula masengo mwamachili.”
