Yoswa 14:1-15
14 Sambano Ayisalayeli ŵajigele chilambo cha Kanani mpela chipanje chawo. Jwakutaga mbopesi Eliyesala soni Yoswa mwanache jwa Nuni pampepe ni mitwe ja maŵasa ga mbumba* sya Isalayeli ni ŵaŵapeleche maloga kwa jemanjaji kuti gaŵe chipanje chawo.
2 Maloga ŵagapeleche kwa mbumba 9 ni hafu sya Isalayeli mwakutenda kalotalota.* Yeleyi yatendekwe mwakamulana ni maloŵe ga Yehofa gaŵamlamwile Mose.
3 Mose ŵapeleche malo kwa mbumba siŵili ni hafu sya Ayisalayeli ku lisi line* lya lusulo lwa Yolodani kuti gaŵe chipanje chawo. Nambo mbumba ja Lefi nganajipa malo pasikati pa jemanjajo kuti gaŵe chipanje chawo.
4 Manase soni Efulayimu ŵaŵaliji ŵanache ŵa Yosefe ŵaŵele mbumba siŵili sya Isalayeli. Alefi nganiŵagaŵila malo gawogawope kuti gaŵe chipanje chawo. Nambo ŵagambile kwapa misinda jakuti atameje nambosoni malo gakulichisya yilango soni gakuti asunjeje yindu yawo.
5 Myoyo Ayisalayeli ŵagaŵene chilambocho mwakamulana ni yaŵatite Yehofa pakumlamula Mose.
6 Kaneko achalume ŵane ŵa mbumba ja Yuda pampepe ni Kalebe mwanache jwa Yefune jwa muliŵasa lya Kenisi ŵapite kwa Yoswa ku Giligala. Paŵayiche kweleko, Kalebe ŵamsalile Yoswa kuti, “Wawojo akumanyilila chenene yaŵaŵechete Yehofa kwa Mose mundu jwa Mlungu jwakuwona jula yakwamba wawojo ni une patwaliji ku Kadesi-balineya.
7 Uneji nakwete yaka 40 pandaŵi jele Mose jwakutumichila jwa Yehofa ŵandumisye kutyochela ku Kadesi-balineya kwawula kuja kusonda chilambo cha Kanani. Panawusile namsalile jwalakwejo mwakuwona mtima yosope yanayiweni kweleko.
8 Atamose kuti achalongo achimjangu ŵanalongene nawo ŵaŵechete yakwatendekasya ŵanduwo kwasa mtima, nambo une nampikanile Yehofa Mlungu jwangu ni mtima wosope.
9 Palisiku lyelelyo Mose ŵalumbile kuti, ‘Chilambo chimwapondilecho chichiŵa chipanje chenu soni cha ŵanache ŵenu mpaka kalakala. Yeleyi yichiŵa myoyo ligongo lyakuti mmwejo mumpikanile Yehofa Mlungu jwangu ni mtima wosope.’
10 Mwakamulana ni maloŵe gakwega Yehofa asunjilepe ni umi yaka 45 yosope yeneyi kutyochela pandaŵi jele Yehofajo ŵaŵechete maloŵe gelega kwa Mose pandaŵi jele Ayisalayeli ŵaliji m’chipululu, mpaka lelo ndili chiŵela umi mwamti ngwete yaka 85.
11 Machili gangu apano gali gakulandana ni ganakwete pandaŵi jele Mose ŵandumisyaga kukusonda chilambocho. Mpaka apano machili gangu nganigachenga mwamti mpaka ngombole kuputa ngondo soni kutenda yindu yine mpela pandanda.
12 Myoyo ambe dela jamatumbi aji jele Yehofa ŵasasile palisiku lyelila kuti chinjipochela. Atamose kuti wawojo palisiku lyelila ŵapikene kuti kweleko kwana Aanakimu ŵakusatama m’misinda jakulimbangana, nambope ngukulupilila nditu kuti Yehofa chaŵe ni une soni changamuchisye kuti natopolanye jemanjajo mpela muŵaŵechetele Yehofajo kwa une.”
13 Myoyo Yoswa ŵamŵendile Mlungu kuti amkamuchisye Kalebe mwanache jwa Yefune soni ŵampele msinda wa Hebuloni kuti uŵe chipanje chakwe.
14 Ni ligongo lyakwe msinda wa Hebuloni uli chipanje cha Kalebe mwanache jwa Yefune jwa muliŵasa lya Kenisi mpaka lelo. Yeleyi yili myoyo ligongo lyakuti jwalakwejo ŵampikanile Yehofa Mlungu jwa Ayisalayeli ni mtima wakwe wosope.
15 Msinda wa Hebuloni pandanda wamanyikaga ni lina lyakuti Kiliyati-aliba. Aliba jwaliji mundu jwakusosekwa mnope pasikati pa Aanakimu. Pambesi pakwe, m’chilambo cha Isalayeli mwaliji mwangalisoni ngondo.
Maloŵe Gamwiŵanda
^ Mundamo ja Ayuda msyenembumba ŵaŵaga mtati, mwakulekangana ni ndamo ja Ayawo jele msyenembumba akusaŵaga mjomba.
^ Ŵane akusati “mayele.”
^ Pelepa akwamba lisi lya kungopokolyuŵa kwa lusulo lwa Yolodani.
