Yoswa 15:1-63
15 Malo gele mbumba* ja Yuda japochele* mwakamulana ni maŵasa gawo gajile kwika mpaka kumalile kwa Edomu kuchipululu cha Sini, soni gayiche kumbesi kwa dela ja Negebu chakummwela kwakwe.
2 Malile gawo gakummwela gatandilaga kumbesi kwa Nyasa ja Njete* kutyochela kumkuli wa nyasaji wawalolite mbali jakummwela.
3 Malilega gapitilile chakummwela mpaka kuja kwika kulutando kwa Akilabimu soni gapitilile mpaka ku Sini. Kaneko gakwesile kutandila kummwela mpaka ku Kadesi-balineya mpaka kuja kwika ku Hesiloni soni mpaka ku Adala. Nambosoni gasyungulile mpaka ku Kalika.
4 Malilega gapitilile mpaka kuja kwika ku Asimoni soni mpaka ku Chiŵata* cha Iguputo ni kuja kupelela ku Nyasa.* Gelega ni gagaliji malile gawo gakummwela.
5 Malile gakungopokolyuŵa galiji Nyasa ja Njete* mpaka pambesi pa lusulo lwa Yolodani. Malilega gakotile chakumpoto pamkuli wa nyasaji palupelele lusulo lwa Yolodani.
6 Malilega gajesile mpaka ku Beti-hogila soni gapitile kumpoto kwa msinda wa Beti-alaba. Nambosoni malilega gapite mpaka ku liganga lya Bohani mwanache jwa Lubeni.
7 Malilega gajesile mpaka kuja kwikasoni ku Debili m’Chiŵata cha Akoli. Kaneko gakotile kwinjililaga chakumpoto mpaka kumsinda wa Giligala, wawuli mwakulolegana ni chikwesya cha Adumimu chachili kummwela kwa chiŵata. Malilega gapitilesoni kumalo kugaliji mesi ku Eni-semesi mpaka gayiche ku Eni-logeli.
8 Nambosoni malilega gapitilile mpaka ku Chiŵata cha Mwanache jwa Hinomu kumalo gakuseleleka kumsinda wa Ayebusi chakummwela, kwakuli ku Yelusalemu. Malilega gakwesilesoni mpaka penani pa litumbi mwakulolegana ni Chiŵata cha Hinomu kungapililolyuŵa. Litumbili lili kumbesi kwa Chiŵata cha Alefaimu chakumpoto.
9 Malilega gapitilile kutyochela penani pa litumbi mpaka kumalo kugaliji mesi ku Nefitowa soni mpaka kumisinda ja ku Litumbi lya Efuloni. Nambosoni gapitilile mpaka ku Baala, kwakuli ku Kiliyati-yelimu.
10 Malilega gajesile mwakusyungulila kutyochela ku Baala chakungapililolyuŵa mpaka ku Litumbi lya Seili, soni gapitile pamalo gakuseleleka ga Litumbi lya Yealimu chakumpoto kwakuli ku Kesaloni. Kaneko gaseleleche mpaka ku Beti-semesi soni gapitile ku Timuna.
11 Malilega gajesile mpaka kuja kwika kumalo gakuseleleka ga ku Ekiloni chakumpoto, nambosoni gajile mpaka kwika ku Sikeloni ni kwenda mpaka kuja kwika ku Litumbi lya Baala, soni gajesile mpaka ku Yabineeli ni kuja kupelela kunyasa.
12 Chakungapililolyuŵa, malile ga maloga gapitile mungulugulu Nyasa Jekulungwa.* Gelega galiji malile kusyungulila malo gosope gele mbumba ja Yuda japochele mwakamulana ni maŵasa gawo.
13 Kalebe mwanache jwa Yefune ŵapochele malo pasikati pa mbumba ja Yuda mwakamulana ni yaŵatite Yehofa pakumlamula Yoswa. Malogo gali Kiliyati-aliba, wawuli msinda wa Hebuloni. Aliba ŵaliji baba ŵawo Anaki.
14 Myoyo Kalebe ŵatopwele ŵanache ŵatatu ŵa Anaki ŵaŵatamaga kweleko. Ŵanachewo ŵaliji Sesayi, Ahimani soni Talimai. Ŵeleŵa ni ŵaŵaliji ŵakutyochela mwa Anaki.
15 Kaneko Kalebe ŵapite kuti akataje ngondo ŵandu ŵa mumsinda wa Debili. Msinda wa Debili pandanda wamanyikaga ni lina lyakuti Kiliyati-sefala.
16 Kaneko Kalebe ŵatite, “Mundu juchakawugomeche msinda wa Kiliyati-sefala ni kuwusumula, mundu jwelejo chinjimpa mwanache jwangu jwamkongwe Akisa kuti aŵe ŵamkwakwe.”
17 Myoyo Otiniyele mwanache jwa Kenasi juŵaliji mpwakwe jwa Kalebe, ni juŵawusumwile msindawo. Pelepo ŵampele mwanache jwakwe jwamkongwe Akisa kuti aŵe ŵamkwakwe.
18 Akisa paŵaliji mkwawula kumangwakwe, ŵasalile ŵamkwakwe kuti ŵaŵende mgunda babagwe. Kaneko Akisa ŵatulwiche pa bulu jwakwe.* Myoyo babagwewo ŵamwusisye kuti, “Ana mkusaka chichi?”
19 Jwalakwe ŵajanjile kuti, “Pakuŵa ambele malo chakummwela* gagali gejumu, nguŵenda kuti ambesoni Guloti-maimu.* Chonde ambe malo gelega pakulosya kuti ambele upile.” Myoyo Kalebe ŵampele jwalakwejo malo gaŵili, Guloti jakulutando ni Guloti jakwiŵanda.
20 Malo gakuyichisyaga ni gajapochele mbumba ja Yuda mpela chipanje chawo mwakamulana ni maŵasa gawo.
21 Misinda jajaŵele ja mbumba ja Yuda chakummwela kumalile ni Edomu ni aji: Kabiseeli, Eda, Yaguli,
22 Kina, Dimona nambosoni msinda wa Adada.
23 Papalisoni msinda wa Kedesi, Hasoli, Itinani,
24 Sifi, Telemu, Beloti,
25 Hasoli-hadata soni Keliyoti-hesiloni, wawuli msinda wa Hasoli.
26 Papalisoni msinda wa Amamu, Sema, Molada,
27 Hasala-gada, Hesimoni, Beti-peleti,
28 Hasala-suwali, Beeleseba, nambosoni msinda wa Bisiyotiya.
29 Papalisoni msinda wa Baala, Iyimu, Esemu,
30 Elitoladi, Kesili, Holima,
31 Sikilagi, Madimana, Sanisana,
32 Lebayoti, Silihimu, Aini, nambosoni msinda wa Limoni. Misinda josope pampepe japali 29, soni misindaji jakwete misi jakwe.
33 Ku Sefela kwaliji misinda aji: Esitaoli, Sola, Asina,
34 Sanowa, Eni-ganimu, Tapuwa, Enamu,
35 Yalimuti, Adulamu, Soko, Aseka,
36 Saalaimu, Aditayimu, Gedela, nambosoni msinda wa Gedelotaimu.* Misinda jeleji japali 14 soni jakwete misi jakwe.
37 Papalisoni msinda wa Senani, Hadasa, Migidali-gadi,
38 Dileyani, Misipa, Yokiteeli,
39 Lakisi, Bosikati, Egiloni,
40 Kaboni, Lahimamu, Kitilisi,
41 Gedeloti, Beti-dagoni, Naama, nambosoni msinda wa Makeda. Misinda jeleji japali 16 soni jakwete misi jakwe.
42 Papalisoni msinda wa Libina, Eteli, Asani,
43 Ifita, Asina, Nesibu,
44 Keyila, Akisibu, nambosoni msinda wa Malesa. Misinda jeleji japali 9 soni jakwete misi jakwe.
45 Papalisoni msinda wa Ekiloni pampepe ni tumisinda twine twamwanamwana* soni misi jakuŵandikana najo,
46 nambosoni malo gosope ga mumbali mwa msinda wa Asidodi soni misi jakuŵandikana najo, kutyochela ku Ekiloni kwawulaga chakungapililolyuŵa.
47 Papalisoni msinda wa Asidodi pampepe ni tumisinda twine twamwanamwana* soni misi jakwe. Nambosoni papali msinda wa Gasa pampepe ni tumisinda twine twamwanamwana soni misi jakuŵandikana najo mpaka kuja kwika kwiŵanda ku Chiŵata cha Iguputo, nambosoni ku Nyasa Jekulungwa* soni mumbali mwa nyasajo.
48 Ku dela jamatumbi kwapali msinda wa Samilu, Yatili, Soko,
49 Dana, Kiliyati-sana, wawuli msinda wa Debili.
50 Msinda wa Anabu, Esitemo, Animu,
51 Goseni, Holoni nambosoni msinda wa Gilo. Misinda jeleji japali 11 soni jakwete misi jakwe.
52 Papalisoni msinda wa Alabu, Duma, Esani,
53 Yanimu, Beti-tapuwa, Afeka,
54 Humuta, Kiliyati-aliba, wawuli msinda wa Hebuloni, nambosoni msinda wa Siyoli. Misinda jeleji japali 9 soni jakwete misi jakwe.
55 Papalisoni msinda wa Mawoni, Kalimeli, Sifi, Yuta,
56 Yeseleeli, Yokideyamu, Sanowa,
57 Kayini, Gibeya nambosoni msinda wa Timuna. Misinda jeleji japali 10 soni jakwete misi jakwe.
58 Papalisoni msinda wa Halihu, Beti-suli, Gedoli,
59 Maalati, Beti-anoti, nambosoni msinda wa Elitekoni. Misinda jeleji japali 6 soni jakwete misi jakwe.
60 Papalisoni msinda wa Kiliyati-baala, wawuli msinda wa Kiliyati-yelimu, nambosoni msinda wa Laba. Misinda jeleji japali jiŵili soni jakwete misi jakwe.
61 Mu dela jachipululu mwapali msinda wa Beti-alaba, Midini, Sekaka,
62 Nibisani, Msinda wa Njete, nambosoni msinda wa Eni-gedi. Misinda jeleji japali 6 soni jakwete misi jakwe.
63 Nambo achalume ŵa mu mbumba ja Yuda ŵalepele kwatopola Ayebusi ŵaŵatamaga ku Yelusalemu, mwamti Ayebusiwo akutamape pasikati pa mbumba ja Yuda ku Yelusalemu mpaka lelo.
Maloŵe Gamwiŵanda
^ Mundamo ja Ayuda msyenembumba ŵaŵaga mtati, mwakulekangana ni ndamo ja Ayawo jele msyenembumba akusaŵaga mjomba.
^ Kapena kuti, “japochele mwakutenda kalotalota.”
^ Nyasa jeleji jikusamanyikasoni ni lina lyakuti Nyasa Jewe.
^ Chiŵata chili malo gakutuluka pasikati pa matumbi.
^ Jeleji jili Nyasa ja Mediterranean.
^ Nyasa jeleji jikusamanyikasoni ni lina lyakuti Nyasa Jewe.
^ Jeleji jili Nyasa ja Mediterranean.
^ Kagopolele kanesoni, “Kaneko paŵaliji pa bulu jwakwe, Akisa ŵakwatile mmyala pakusaka kuti ampikane.”
^ Kapena kuti, “ku Negebu.”
^ Linali likusagopolela kuti, “Matanda ga Mesi.”
^ Kagopolele kanesoni, “Gedela pampepe ni machinga gakwe ga ngondolo.”
^ Kapena kuti, “twakusyungulila msindawo.”
^ Kapena kuti, “twakusyungulila msindawo.”
^ Jeleji jili Nyasa ja Mediterranean.
