LIGONGO LYAKWE YILI YAKUSOSEKWA: Kuti Yehofa aŵe nawo paunasi wambone, ŵakulijiganya Baibulo akusasosekwa kulipeleka kwa jwalakwe soni kubatiswa. (1 Pet. 3:21) Yehofa akusiŵacenjela mwausimu ŵandu ŵele ŵakusatenda yindu mwakamulana ni kulipeleka kwawo. (Sal. 91:1, 2) Aklistu akusalipeleka kwa Yehofa ngaŵa kwa mundu, masengo, kapena ciwanja cine cakwe. M’yoyo, ŵatukusalijiganya nawo Baibulo akusasosekwa kumnonyela soni kum’yamicila Mlungu.—Alo. 14:7, 8.

NA MPAKA ATENDE MWATULI:

• Pakutendesya lijiganyo lyawo lya Baibulo, atagulilaneje yindu yine yakwamba Yehofa. Amlimbikasyeje kuŵalangaga Baibulo lisiku lililyose soni kupopelaga kwa Yehofa “mwangalecesya.”—1 Ates. 5:17; Yak. 4:8.

• Amlimbikasyeje jwakulijiganya Baibulo jwawo kuti alipelece soni abatiswe. Amkamucisyejesoni kola yakulinga yamwanamwana mpela kupeleka ndemanga pamisongano, kapena kulalicila kwa ŵandu ŵakutama ciŵandika ni kumangwakwe, nambosoni ŵakusakamulana nawo masengo. Pakutenda yeleyi akaliŵalila kuti Yehofa jwangamkanganicisya mundu kuti amtumicileje. Mundu akusasagula jika kulipeleka kwa Yehofa.—Deut. 30:19, 20.

• Amlimbikasyeje jwakulijiganya Baibulo jwawo kucenga ndamo syakwe kuti amsangalasye Yehofa soni kuti aŵajilwe kubatiswa. (Miy. 27:11) Ndamo soni yisyoŵe yine yikusaŵa kuti yatamilicice mnope mwa jwakulijiganya Baibulo jwawo. M’yoyo akusasosekwa kwendelecela kumkamucisya kuti awule umundu wakwe wakala ni kuwala wasambano. (Aef. 4:22-24) Atagulilaneje ngani syasiŵele mkukopoka mu Sanja ja Mlonda syakuti “Baibulo Limasintha Anthu”

• Amsalileje yakusangalasya yasimene nayo pakumtumicila Yehofa.—Yes. 48:17, 18