Ligongo cici ŵamkwakwe Loti ŵagalawucile munyuma paŵatilaga ku Sodomu? Baibulo jangasala cilicose. (Gen. 19:17, 26) Cikalamusyo caŵasasile Yesu, cikusalosya kuti ŵamkwakwe Loti ŵaganicisyaga mnope yindu yaŵayilesile ku Sodomu. (Luk. 17:31, 32) Ana mpaka tuŵambale camtuli kwasa unasi wetu ni Mlungu mpela mwaŵatendele ŵamkwakwe Loti? Tukakunda kuti kusacilila mnope yindu yakucilu kuŵe pamalo gandanda pa umi wetu. (Mat. 6:33) Yesu jwasasile kuti “nganituŵa tukombwele kutumicila Mlungu ni Cipanje pandaŵi jimo.” (Mat. 6:24) Nambi ana mpaka tutende wuli naga tuyikopocele kuti yindu yakucilu yitandite kutumalila ndaŵi jetu jakutendela yindu ya usimu? Tukusosekwa kupopela kwa Yehofa kuti atupe macili gakumanyilila yindu nambosoni patukusosecela kucenga.

AGANICISYE YA FIDIYO JAKOLA MBALI SITATU JA MTWE WAKUTI AKUMBUCILEJE ŴAMKWAKWE LOTI, KANEKO AJANJE YIWUSYO YAKUYICISYAYI:

• Ana mtima wakusacilila kola mbiya wasokonasisye camtuli kaganisye, kaŵecete, soni katende kayindu ka Gloria?

• Ana cisyasyo ca ŵamkwakwe Loti cikutukalamusya ya cici masiku agano?

• Ana kukamulicisya masengo yiwundo ya m’Baibulo kwakamucisye camtuli Ce Joni soni liŵasa lyawo?

• Ana kamulana mnope ni ŵakumasengo kwakwayiye camtuli usimu wa Ana?

• Ligongo cici tukusosekwa kuŵa ŵakulimba mtima patutandite kusacilila mnope cipanje?

• Ana liŵasa lya Ce Buleya lyatanditesoni camtuli kuŵika yindu ya usimu pa malo gandanda?

• Ana ni yiwundo yapi ya m’Baibulo yalijiganyisye mu fidiyoji?