LIGONGO CICI KULI KWAKUSOSEKWA: Ŵandu kuti amlambileje Yehofa mwakwiticika, akusosekwa kulijiganya ndamo syakwe soni kutenda yindu mwakamulana ni yakulijiganyayo. (Yes. 2:3, 4) Buku ja “Cinonyelo ca Mlungu” jili jaŵili pa mabuku gakutendela lijiganyo lya Baibulo. Bukuji jikusijakamucisya ŵakulijiganya Baibulo kumanyilila songa syakusosekwa sya Mlungu syakamulana ni umi wawo wa lisiku ni lisiku. (Ahe. 5:14) Tukusosekwa kwajiganya ŵandu mwakwayika pamtima kuti yalimbikasyeje cenene kucenga ndamo syawo.—Alo. 6:17.

MWAMPAKA TUTENDELE:

• Akoseceleje cenene, ali mkuganicisya yakusosecela ya jwakulijiganya jwawo. Alinganyeje yiwusyo yakamula mtima yakwakamucisya kumanyilila nganisyo, soni mwakupikanila jwakulijiganyajo panganijo (Miy. 20:5; be-CN 259)

• Akamulicisyeje masengo mabokosi ndaŵi syosope pakumkamucisya jwakulijiganyajo kulola kusosekwa kwakamulicisya masengo songa sya m’Baibulo

• Amkamucisyeje jwakulijiganyajo kuganicisya pangani sine syakwayana ni cikumbumtima, nambo akamsagulila yakutenda (Aga. 6:5)

• Mwalunda, amanyilileje naga jwakulijiganya jwawo akusosekwa cikamucisyo kuti akamulicisye masengo songa sine sya m’Baibulo. Mwacinonyelo, amlimbikasyeje kucenga ndamo syakwe ligongo lyakumnonyela Yehofa (Miy. 27:11; Yoh. 14:31)