Kumtyosya mundu kukusawuchenjela mpingo nambosoni mundu jwatesile chakulemwa jwangapitikuka mtimajo. (1 Akoli. 5:6, 11) Tukusalosya kuti tukusamnonyela Yehofa naga tukukamulana ni chamukocho. Ana mpaka chiŵe uli chinonyelo pakuŵa yikusaŵa yakupweteka kwa ŵandu ŵakwayidwe, kupwatikapo ŵachibale ŵakwe soni komiti jakwelusya?

Tukusalosya kuti tukusanonyela mnope ndamo syapenani sya Yehofa. (1 Pet. 1:14-16) Tukusalosyasoni kuti tukumnonyela mundu jwatyosyedwejo. Atamose kuti chamuko chikusaŵa chakupweteka, nambo ‘akusapata mtendele wawuli chisogosi cha umi wakulungama.’ (Aheb. 12:5, 6, 11) Naga tukusakunguluka ni mundu juŵamtyosisye mumpingo kapena juŵalilekangenye jika ni mpingo, tukusalosya kuti ngatukuyamichila chamuko cha Yehofa. Tukumbuchileje kuti Yehofa akusiŵajamuka ŵandu ŵakwe “pa mlingo wakwenela.” (Yel. 30:11, NWT) Naga tukukamulana ni chamuko chapeleche Yehofa soni tukupitilisya kutenda yindu yausimu, tukusakola chikulupi chakuti mundujo lisiku line chachiwujila kwa Yehofa.—Yes. 1:16-18; 55:7.

ALOLELE FIDIYO JAKUTI, AŴEJE ŴAKULUPICHIKA PASIMENE NI YAKUTENGUSYA, KANEKO AJANJE YIWUSYO AYI:

• Ana achinangolo ŵa Chiklistu akusapikana wuli mwanache jwawo patyosyedwe mumpingo?

• Ana ŵandu ŵamumpingo mpaka alikamuchisye chamtuli liŵasa lyalikwete mwanache jwamtyosyedwe?

• Ana ni ngani japi ja m’Baibulo jajikulosya kusosekwa kwakuŵa ŵakulupichika kwa Yehofa kupundana ni ŵamwiŵasa mwetu?

• Ana mpaka tulosye chamtuli kuti tuli ŵakulupichika kwa Yehofa kupundana ni ŵamwiŵasa mwetu?