Awanicisye kuti akutama mumsinda wa Galileya mundaŵi ja Yesu. Ajesile ulendo welewu wakwawula ku Yelusalemu kukutenda cindimba ca Masakasa. Mu msindamo mugumbele ni ŵandu ŵayice kutyocela m’mikuli jine ja kwanawula kukutenda cindimbaci. Wawojo akusaka kupeleka mbopesi kwa Yehofa. Akulinga kulikanganicisya kupita mulikuga lya ŵandu mu ka msewu kakwawula ku Nyumba ja Mlungu kwineku ali ajigele mbusi. Pakopocele ku Nyumba ja Mlunguji, asimene kuti jigumbele ni ŵandu ŵakusaka kupeleka mbopesi. Pambesi pakwe, jiyice ndaŵi jakuti wawojo apelece mbusi jila kwa jwambopesi. Pandaŵiji, akukumbucila kuti mlongo mjawo jwakwete najo magongo alisoni mulikuga lya ŵandulyo. Yesu jwasasile yakusosekwa kutenda pandaŵiji. (Aŵalanje Matayo 5:24.) Ana wawojo nambosoni mlongo mjawojo mpaka atende wuli kuti atende yindu yakuyikasya mtendele mwakamulana ni yaŵasasile Yesuyi? Mu ndandanda wawuli pasipa, asagule cakusosekwa kutenda cacili cakulondola.

WAWOJO AKUSOSEKWA . . .

• kutagulilana ni mlongo mjawojo naga akuyiwona kuti pana magongo gakupikanika gagamtendekasisye mjawojo kutumbila

• kulinga kumkamucisya mjawojo kucenga kaganisye kakwe naga wawojo akuyiwona kuti mjawojo jwangakaŵa kutumbila kapena kulinga kututilana cakusawusyaco

• kumpikanila mwalung’wanu mlongo mjawojo pakulinga kutagulila nganisyo syakwe, atamose kuti wawojo ngakupikanicisya. Ampepesye mjawojo ligongo lya mwakupikanila soni yakuyicisya ya yitendo yawo

MJAWOJO AKUSOSEKWA . . .

• kusosa cikamucisyo kutyocela kwa ŵane mumpingo mwakwasalila yaŵatite wawojo pakumlemwecesya

• kwakalipila wawojo, kuwilisya yiliyose yakwaya nganijo soni kwakanganicisya kuti ajiticisye kuti wawojo ni ŵaŵalemwisye

• kumanyilila kuti pasosekwe kulinandiya soni kulimba mtima kuti wawojo amyicile mjawojo, soni kuti ŵakululucile kutyocela pasi pamtima

Atamose kuti masiku agano kulambila kwetu ngakukusapwatikapo kupeleka nyama mpela mbopesi, ana Yesu jwajiganyaga cici pakwamba ya mkamulano wawupali pasikati pa kuŵa ŵamtendele ni acimjetu ni kulambila kwakwiticika kwa Mlungu?