Ana ligongo chichi tukusasangalala mnope ni misongano ja pachaka? Mpela muyaŵelele ni Aisalaeli, masiku agano misongano jekulungwakulungwa jikusatupa upile wa kumlambila Yehofa yalumo ni ŵakulupilila achimjetu ŵajinji. Pamisonganoji tukusasangalala ni chakulya cha usimu. Tukusasangalalasoni patukukunguluka ni achimjetu. Tukusalosya kuyamichila mwakusimanikwa masiku gosope gatatu ga msonganowu.

Patusongene ngatukusosekwa kwamba ganichisya yampaka tupate, nambo tukusosekwasoni kulola yampaka tutende pakwalosya ŵane chinonyelo. (Agal. 6:10; Aheb. 10:24, 25) Mpaka tulosye kuti tukwaganichisya ŵane mwakwawugulila matanga, soni mwakwasunjila malo gakutama ŵandu ŵa mwiŵasa mwetupe. (Afil. 2:3, 4) Pamisonganoji tukusakola upile wakola achimjetu ŵasambano. Mpaka tukole chakulinga chakwamanyilila ŵane lisiku lililyose pologalamu ja msonganowu mkanijitande, patumalisisye soni pandaŵi jakupumula. (2 Akoli. 6:13) Yeleyi yichitukamuchisya kuti tupate achimjetu ŵajinji ŵachitutama nawo mpaka kalakala. Nambo chakusosekwa mnope ni chakuti, ŵane payiweni kuti tukusanonyelana yisyesyene chachitanda kumtumichila Yehofa.—Yoh. 13:35.

ALOLELE FIDIYO JAKUTI, MISONGANO JA YILAMBO JAKUTI “CHINONYELO CHILI CHANGAMALA”, KANEKO AJANJE YIWUSYO AYI:

• Ana abale ni alongo ŵayilambo kukwatendechele misongano ja yilambo ja 2019, ŵalosisye chamtuli chinonyelo ŵandu ŵaŵayiche ku msonganowu?

• Ligongo chichi chinonyelo soni mkamulano yili yakusosekwa mnope pasikati pa ŵandu ŵa Yehofa?

• Ana ni mitundu japi ja chinonyelo jele abale ŵa m’Likuga Lyakulongolela ŵajigombelechesye?

• Ana chinonyelo chakamuchisye chamtuli abale ni alongo ŵa ku Germany ni ku South Korea kuŵa ŵakamulana?

• Ana tuli ŵakusachilila kutenda chichi?