Ana pa umi wawo akulimbana ni yindu yamtuli? Ana ali mtwe wa liŵasa ŵakulingalinga kusamalila liŵasa lyawo? Ana ali nangolo jwakusamalila liŵasa lyawo jika? Ana ali mwanache jwa sukulu jwakulagasidwa ni achimjawo kusukulu? Ana akusalwalalwala kapena akulimbana ni ukalamba? Kusala yisyene jwalijose akwete yakusawusya yakwe. Aklistu ŵajinji akulimbana ni yakusawusya yejinji pandaŵi jimo. Nambo tukumanyilila kuti pachangakaŵapa chitugopoledwe ku yakusawusya yosopeyi.—2 Akoli. 4:16-18.

Yikusaŵa yakutamika mtima pasi kumanyilila kuti Yehofa akusamanyilila yakusawusya yetu, akusayamichila kulupichika soni kupilila kwetu. Soni jwalakwe atusunjile upile wejinji kusogoloku. (Yel. 29:11, 12) Nombe najo Yesu akusatenda chidwi ni m’weji. Patukutenda utumiki wetu tukusaŵa ŵakusimichisya kuti Yesu ‘ali ni m’weji.’ (Mat. 28:20) Kuganichisya yakugopolwa ku ulemwa ni chiwa kwachikutendekwa pasi pa Uchimwene wa Mlungu, kukusatukamuchisya kulimbisya chembecheyo chetu. Kukusatukamuchisyasoni kuŵa ŵakusimichisya kupilila yakusawusya yatukusimana nayo apano.—Alo. 8:19-21.

ALOLELE FIDIYO JAKUTI, AJEGAMILEJE KWA YESU NDAŴI JA YAKUSAWUSYA PAJIKUŴANDICHILA!—MAJALI GA UCHIMWENE GAMSOGOLO, KANEKO AJANJE YIWUSYO AYI:

• Ana ŵandu ŵatalikangene chamtuli ni Mlungu, soni ana yakuyichisya yakwe yaliji yamtuli?

• Ana ŵandu ŵakulupichika kwa Yehofa akwembecheya yindu yamtuli kusogoloku?

• Ana yeleyi yichikwanilichikwa chamtuli?

• Ana wawojo akwembecheya kwanilichikwa kwa yindu yapi m’chilambo chasambano?