Tukutama mchilambo chele ŵandu ŵakwe akusayiwona yambone kuŵa yakusakala, yakusakala kuŵa yambone. (Yes. 5:20) Chakutesya chanasa chili chakuti ŵandu ŵane akusatenda yindu yakusayiŵenga Yehofa. Akusatenda yakusakala mpela kulombana achalumepe kapena achakongwepe. Ŵanache pali kusukulu, achimjawo mpaka ŵanyenjeleleje kuti atendeje yakusakala. Achinangolo ana mpaka twakamuchisye uli ŵanache ŵetu kuti aŵe ŵakoseka kulimbana ni yakusawusya yiliyose yampaka asimane nayo?

Ŵakamuchisyeje ŵanache ŵawo kumanyilila ndamo syapenani sya Yehofa. (Lef. 18:3) Mwakamulana ni yaka ya ŵanache ŵawo, ŵajiganyeje yajikusasala Baibulo pangani ja kutamila malo gamo ŵandu ŵakuti nganalombane. (Det. 6:7) Akusosekwa kuliwusya kuti, ‘Ana najiganyisye ŵanache ŵangu umbone wakulosya chinonyelo mwakuŵajilwa, umbone wakuwala mwakulichimbisya, soni kusosekwa kwakuchimbichisya yiŵalo yawo yakusisika? Ana ŵanache ŵangu najiganyisye yampaka atende naga mundu jwine akwalosya yakuŵagula, kapena akwasalila kutenda yindu yakusayiwona Yehofa kuŵa yakulemwecheka?’ Kwajiganya ŵanache ŵetu mkanipaŵe mpaka kwakamuchisye kuŵambala kusimana ni yakusawusya. (Mis. 27:12; Jwak. 7:12) Kwajiganya ŵanache ŵawo, kukusalosya kuti akwanonyela ŵanachewo, ŵali mbaso ja mtengo wapenani mnope jakutyochela kwa Yehofa.—Sal. 127:3.

ALOSYE FIDIYO JAKUTI, ATAŴE NYUMBA JAKULIMBA—MWAKWACHENJELA ŴANACHE ŴAWO KU “YINDU YAKUSAKALA,” KANEKO AKAMBILANE YIWUSYO AYI:

• Ligongo chichi achinangolo ŵane akusachelewa kwajiganya ŵanache ŵawo pangani ja kutamila malo gamo ŵandu ŵakuti nganalombane?

• Ligongo chichi achinangolo akusosekwa “kwajamukaga soni kwajiganyaga” ŵanache ŵawo pakukuya malangiso ga Yehofa?—Aef. 6:4

• Ana gulu ja Yehofa jipeleche yindu yamtuli yakwakamuchisya achinangolo kwajiganya ŵanache ŵawo pangani ja kutamila malo gamo ŵandu ŵakuti nganalombane?—w19.05 12, libokosi

• Ligongo chichi achinangolo ndaŵi syosope akusosekwa kukambilanaga ni ŵanache ŵawo, ŵanachewo mkanasimane ni yakusawusya?