Patukuliŵichila yakulinga yakumtumichila Yehofa, tukusaŵa tuli mkukamulichisya masengo machili getu mwalunda. (1Ak 9:26) Mbesi ja chilambochi jiŵandichile mnope. Myoyo kuliŵichila yakulinga mpaka kutukamuchisye kuti tukamulichisye masengo mwalunda ndaŵi jajisigeleji. (Aef 5:15, 16) Pakulambila kwawo kwa peŵasa mpaka akambilane yindu yakusaka kutenda mu chaka cha utumiki chachikwikachi. Pakusaka kwakamuchisya, kabuku ka utumikika kakwete yakulinga yine yampaka akole. Uli ngalinga kuganichisya yakulinga yeleyi soni kupopela ni kulola naga mpaka ayikwanilisye.—Yak 1:5.

Mwachisyasyo, ana yili yakomboleka kumkamuchisya mundu jwa m’liŵasa lyawo kuti atende upayiniya wakutamilichika? Mwine akukayichila naga chachikombolaga kupeleka maawala gakusasosekwa mpayiniya. Naga yili myoyo uli ngalinga kuŵechetana ni apayiniya ŵane ŵaŵamalene ni chakusawusyachi. (Mis 15:22) Kombolekasoni mpaka amŵilanje mpayiniya kuti amwusye yiwusyo pakulambila kwawo kwa peŵasa. Kaneko alembe ndandanda. Naga pakwete paŵatesile upayiniya munyumamu, ana apano yili yakomboleka kuti atendesoni?

Ana yili yakomboleka kuti ŵamwiŵasa mwawo atende upayiniya ŵakamuchisya kwa mwesi umo kapena kupunda pelepo? Komboleka nganakola machili gakwanila, nambope mpaka atende upayiniya wakamuchisya ni kulalichila maawala gamnono lisiku lililyose. Mwine akusaŵa ŵakutanganidwa ni masengo kapena sukulu mwamti yikusaŵa yakusawusya kuti alalichileje mkati mwa wiki. Naga yili myoyo mpaka asagule mwesi wawukwete masiku gakupumula gejinji kuti chalalichile pandaŵi jelejo. Pakalendala jawo alembe madeti gakusaka kuti chatende upayiniya wakamuchisya soni alembe ndandanda.—Mis 21:5.

ALOLELE FIDIYO JAKUTI AŴEJE ŴAKULIMBA MTIMA . . . MPAYINIYA, KANEKO AJANJE CHIWUSYO ACHI:

• Ana chisyasyo cha Mlongo Aamanda chikutujiganya chichi pakwamba yakusatenda Yehofa pakwakamuchisya ŵandu ŵasagwile kuti atende upayiniya?