Mmwesi wa Sepetemba, tuchikamula masengo gakwasalila ŵandu kuti Uchimwene wa Mlungu ni wampaka umasye yakusawusya yosope yatukusasimana nayo. (Mat 24:14) Ana tuchikamula chamtuli masengoga? Mmwesi welewu chatende yakomboleka kuti chiŵaŵalanjile ŵandu ŵajinji lilemba lyakusala ya Uchimwene wa Mlungu. Naga mundu jwine alosisye lung’wanu, champe Sanja ja Mlonda jagaŵila ja Na. 2 2020. Kaneko akusosekwa kumjendela mundujo mwachitema soni atende yakuti atandisye lijiganyo lya Baibulo pakamulichisya masengo kabuku ka Asangalaleje Mpaka Kalakala. Naga akusaka kutenda upayiniya wakamuchisya m’mwesi welewu, akwete upile wakupeleka mawola 15 kapena 30.

Pachangakaŵapa, Uchimwene wa Mlungu chiwujonanje maulamusi gosope ga ŵandu. (Da 2:44; 1Ak 15:24, 25) Myoyo kwende wosope tukamule nawo masengo gelega mwakulipeleka mnope kuti tulosye kuti tuli mbali ja Yehofa soni Uchimwene wakwe.